Ads by Google Ads by Google

Aso Fa’asamoa A’oga Malisi Fa’asao

Na amatalia le aso fa’asamoa o le a’oga maualuga Fa’asao ma Malisi i le ava o le feiloa’iga na saunia e le vasega 12, ma sa matagofie lea fa’atinoga o le aganu’u. I le latou polokalama fa’asolo mo le latou aso e fa’apito i a’oa’oga fa’asamoa i ana agaifanua, na fa’atulaga ai e tauva vaega e fa o vasega ta’itasi mai le 9 se’ia o’o i le 12.

Ua tofusia i latou ma le Tausala ma le Manaia Filifilia e fa’atauva ai, ma e tatau ina o’o ane i le fa’aiuga o le fa’amoemoe i le afiafi o le aso Tofi, ua maua le “Tausala ma le Manaia o Fa’asao Malisi 2012-2013.”

I le tauvaga solo fa’asamoa, sa iloga ona matagofie le fa’asologa o mafaufauga o tama’ita’i uma lava sa tauva ai. Peita’i i lona fa’ai’uga, sa manumalo ai le solo a le vasega 10 na fofogaina ma tusia e Rosalia Taotofi. O isi sui sa tauva ai o Theresa Lafaele mai le vasega 9 na tulaga lua, o Ana Selefuti Tago na tulaga tolu ae tulaga fa ai Masitika Laniuvao mai le vasega 12.

I le tauvaga Puletasi a paga tauva i le tausala ma le manaia a vasega ta’itasi, na tulaga muamua ai le vasega 12 i o latou togi e 119, o i la’ua ia o Cecilia Reid ma Leuma Tuitele. Tulaga lua le Puletasi a le vasega 10 ia Elizabeth Snyder ma Michael Aitaoto. Tulaga tolu ai le Puletasi a le vasega 9 lea na tauva ai Lusi Tago ma Charles Asalemo, ae tulaga mulimuli ai le puletasi a Tiara ma Isopo mai le vasega 11.

I le vaega tau le folafolaga o to’ona’i i totonu o Ekalesia i aso Sa ta’itasi sa tulaga muamua ai le sui tauva o Niko Lelevaga nau ke vasega 10; tulaga lua o le ali’i o Etuale Lafaele mai le vasega 12; tulaga tolu o Tulifau Ameto mai le vasega 11, ae tulaga fai ai Francis Vesesio o le sui o le vasega 9.

I le Sula Toga a tama’ita’i  na tulaga muamua ai  Filomena Stowers mai le vasega 12, tulaga tutusa lea o le tulagalua i sui mai le vasega 9 ma le 10 o Loretta Liu ma Seilala Stowers, tulaga tolu ai le vasega 11 i le latou sui o Tupu Papali’i.

I le vaega o le Ofu Laula’au o paga tauva sa manumalo ai: Sui o le vasega 12 - Cecilia Reid ma Leuma Tuitele. I le tulaga lua sa tula’i mai ai sui o le vasega 10 ia Elizabeth Snyder ma Michael Aitaoto, ae tulaga tolu ai le Vasega 9 ia Lusi Tago ma Charles Asalemo; tulaga fa ai sui o le vasega11 i ona sui tauva o Tiara ma Isopo.

I tulaga o fa’afiafiaga fa’asamoa i Mauluulu, Sasa ma taualuga uma a vasega ta’itasi, ua fa’ailoa mai ai, ua laugatasia i latou uma nei i le tutusa lelei, matagofie toniga, ae maise o fa’afiafiaga i mauluulu ma latou siva sasa.

I le aotelega o nei galuega fa’atino uma sa gapatia ai vasega uma o le Fa’asao Malisi High, ua fa’ailoa mai e fa’amasino le tu’ufa’atasiga e fa’apea:

Manumalo a’ia’i i ‘ai e 639 o le Vasega 10. Tulaga lua i ai le vasega 9 i ‘ai e 630. Tulaga tolu i ai le vasega fa’ai’uaso 12 i ‘ai e 600, ae tulaga fa i ai le vasega 11 i ona ‘ai e 583.

I le tofiga o le Tausala ma le Manaia o Fa’asao Malisi 2012 - 2013 ua manumalo mai ai le tama’ita’i lalelei o Cecilia Reid ma Leuma Tuitele o le Vasega fa’ai’uaso.

Sa faia fo’i se tautalaga a le ali’i Peresetene o le PTA ma le latou fo’i Siva i lea afiafi, e toe amatalia lelei ai lana nofoa’iga, aua ua suia nei lea nofoa’iga i lana nofoa’iga fou lava! Na auai uma le fa’atama o le Pule’aga Samoa Pago Pago, Kuini Weitzel ma sui o le Aufaigaluega ma le Ituaiga Sa fa’apea le mamalu o le PTA ma le fanau a’oga i lea fo’i taumafaiga ia fa’asao mai le Gagana Samoa mai le mou atu, ae maise fo’i o Tu ma Agaifanua a le atunu’u, ia fa’atumauina lea i loto ma agaga o le fanau ia ola ai!