Aso Fa’afetai, Pulega & Aufaigaluega SPED

Ona o le agaga lava o le fa’afetai, e tatau ai ona tatou faia ma le fiafia mea uma, e ao fo’i ina mua’i si’i le fa’afetai i le Atua i le ola, malosi ma le poto ua ia foa’ia i aso ta’itasi e fa’atautaia ai le galuega, ae maise fo’i o fua o le agaga, fa’amaoni, usita’i, fa’alogo, mausali le olioli e fa’atino tiute uma.

 

O lea le agaga tonu o le fa’amoemoe na ta’ita’ia ai le aufaigaluega uma e silia ma le 40 o i latou i le pulega ma le puleaga a le Special Education i Faga’alu e fa’atino le latou galulue fa’atasi ma le fa’amoemoe e tasi, ia fa’aleo le fa’afetai, ia faigaluega ma le fealofani i tiute ua tofia ai.

 

Na amatalia le fa’amoemoe ina ua fa’atino le sailiga o le turkey i le taeao, ma e faitogi lea tulaga, aua ua mae’a tomavaevae le aufaigaluega i ona lanu e fa e fa’atauva ai i so’o se latou galuega fa’atino e faia mo le va fealoa’i.

 

O le Lanu Meamata e ona le sui sa ia mauaina le turkey, le susuga Alofa Taimanu. E ui ina to’atele le au saili, ae na fa’ato’a maua lava i totonu o le ofisa o le na ia nanaina le turkey, Papali’i Fa’anati. O se mea ua ‘ese ua o’o i afi o ta’avale ua sailia i ai lenei turkey, ua leai se pupuvao i autafa o le alatele e le’i sueni i luga ona o le naunau i le turkey mo le aiga.

 

O le fa’ailo po’o banners sa iloga ona mata’ina galuega uma, ae sa ese mai fo’i le faatinoga e le Lanu Mumu o le latou banner, peita’i, o isi uma fa’ailo sa matagofie fo’i.

 

O le savaliga sa mata’iga ai le to’atele o le Team Lanu Pa’epa’e. E to’afitu mai le to’asefulu o totino sa auai. I le toniga lava latou na mata’ina ai le Lanu Mumu aua sa saunia lelei ma laugatasia sui uma i le mitiafu lanu enaena ae tusia ai upu nei: Reliable, Effective, Dedicated.

 

I le tauvaga a turkey teuteuina, ua toe motu ai fo’i le taumafaiga a le Team Lanu Mumu, aua na matua fulufulu turkey moni lava ae maise teuga. Ona soso’o lea ma le Lanu Meamata i le latou turkey e fai ona apa’au laula’au.

 

O le Team Lanu Samasama sa latou fa’afoea le polokalama atoa mo lenei masina, ma sa latou asia fo’i le Maota Tausima’i o le Hope House i Fatuoaiga i le aso Lua, ma sa latou molita’i fa’amomoli o le alofa e aofia ai mea’ai paleni ma mea uma e fa’aaogaina i le tausiga o ma’i i le latou ta’elega, e o’o lava i moega e momoe ai.

 

Ua fa’alauiloa mai, o le masina o Tesema o le a pa’u lea i le Social Komiti latou te fa’atinoa ma ta’ita’ia le polokalama mo le Kerisimasi, ma e faia i le aso 19 Tesema, 2013.

Comment Here