Ua fa’ato’a asiasi mai lea o Malcom Maiu’u Floyd i le atunu’u o lona tina, ae ua loa ona fa’alogo o ia i tala’ave matagofie e fa’amatala pea e si ona tina e fa’atatau ia Amerika Samoa, ma lona tuputupu a’e o se talavou sa tausia ma fa’afailele i le alofa fa’asamoa o ona matua ma lona aiga to’atele, fa’apea lona nu’u pele o Pago Pago.

O le 32 ai lenei o tausaga o le soifuaga o Malcom Maiu’u Floyd, ae fa’ato’a manatu lea o si ona tina, ua tatau ona fa’ao’o mai lana fanau tama e to’alua: Malcolm Floyd e 9 tausaga e matua ai ia Malcom Maiu’u Floyd, lea o lo’o taalo ai nei i le NFL i le au a le San Diego Charges mo le 10 tausaga.

O Malcolm Floyd e ono tausaga sa ta’alo o ia i le NFL i le ‘au a le Houston Oilers, Tennessee Titans, le St Louis Rams ma le New Orleans Saints.

O atali’i nei e  to’alua, e matua uiga Samoa lava, e le so’ona tautala, i luma o tagata, ma e i ai uiga Samoa o le Fa’aaloalo ma le le gaoia ia i la’ua.

“O le mea tele a lo matou tina o le tautala ma fa’ailoa mai ia i matou uiga e ao ina matou faia, ae maise pe afai e i ai nisi o lona aiga, o ona tuagane ma uso matou te feiloa’i i fafo. Ia iloa atu ni uiga Samoa fa’aaloalo ia i ma’ua!” O se tala lea a Malcom Maiu’u.

O lo’o malolo ma’i lea alo o le atunu’u mai le ta’amilosaga lea sa uma atu nei o le NFL, ae ua toe tau amata nei ona olioli koleniga mo le isi ta’aloga o le tau fou, ma ua ia fa’ailoa mai, “Afai ae le toe gafatia e le tino ona fa’aauau le ta’aloga, o lo’o lava ma totoe tomai ua mae’a a’oa’oina ai e litaea ane e fai. O le isi mafuaga tonu lava lea, na ala ai ona mafaufau Mom, e aumaia i ma’ua, e pei o le tala fo’i lea, ‘atali’i mo le toe taliu mai i aiga!”

Ona o Maiu’u o lo’o fa’aigoa i le tama o Leataata Amisone Maiu’u - Floyd, o lea sa lagona ai e ia le mafanafana o lona toto Samoa ina ua tuvae, va’ai ma filo ai i totonu o lona aiga i Samoa nei. (O Leataata o le tina lea o nei taulele’a).

“O se lagona ua sili atu ai ona ou malamalama i mea sa fa’atino e si o’u tina a’o matou nonofo ai i Kalefonia. E tiga lava ona tele matou pili, ae o Mom lava latou e fai mai, ‘E tatau lava ona fa’ao’o le $500 lea i lo’u tuagane’. O mea na e matua fa’asa ai lava i matou ona tautala i se upu, pe faitio i se mea e faia e Mom, o lana tala, tau lava o le tou iloa, va’ai o fai, ae fa’atali le taimi e te malamalama atoatoa ai i mea a Samoa ma ana agaifanua fa’aleaganu’u.” O se tala lea a Maiu’u na fa’amatala.

“Lea la ua ou sau, tafefe i le aulelei, saogalemu, lafulemu ma le ola fiafia o tagata Samoa,” o Maiu’u lea.

Na filifili e Maiu’u ma Malcolm le a’oga e Fagaitua e muamua asiasi i ai, “Aua o le a’oga lena a Mom sa amata ai ana a’oa’oga.” O lo’o matou pasia fo’i le nofoaga o lona aiga, a’o itiiti o ia, ma soifua mai pea ona matua i Utusi’a, Fagaitua.

I lea asiasiga, sa talanoa ai ma fefa’asoa’i Maiu’u ma le ali’i faia’oga o le football a Fagaitua High, Pooch Ta’ase i ala e fa’aleleia atoatoa ai le va’ai a tama ta’alo e sapo ai polo, ma ala e mafai ona fa’ase ai sitepu i le taimi e pu’ea ai se tasi.

Ina ua mae’a mai le a’oga i Faga’itua, sa latou asia loa Tafuna, ma faia ai fo’i le talanoaga ma le faia’oga o le football i lea fo’i a’oga, ma faia fo’i lana fesoasoani e tasi mo le fanau a’oga i lea fo’i a’oga, ae le’i tu’ua e i latou ma le latou tina le atunu’u.