Na avea le sauniga o le suaina o le eleele e faapaia ai le amataina o le galuega o le faleaoga fou a Aua Elementary, ma itu na maua ai ma le avanoa e asia ai e le sui failautusi o le Initeria ia Esther Kia'aina fanau aoga, faapea ai faiaoga ma sui o matua a Aua Elementary i le aso Faraile na te'a nei.

O lea galuega ua atoa le valu o tausaga, o fa’atauanau lona amatalia, peita’i, sa ave le fa’amuamua a le matagaluega i nisi a’oga, o lo’o tuga tele lo latou mana’omia o fale aoga, o le saunoaga lea a le fofoga o le aso ia Paopaoailua J. Fiaui.

“O le suaina o le eleele mo lenei falea’oga, ua fa’ataunu’u ai ni miti a le afio’aga i ona ta’ita’i, ia fa’aleleia atili le nofoaga o a’otauina ai tupulaga o le nu’u,” o le saunoaga lea a le afioga i le kovana ia Lolo Matalasi Moliga.

Sa ia fa’afetaia fo’i vaega ta’itasi o le Malo sa tofu sao ina ia mautinoa e o’o mai i le aso lenei, ua mae’a tapena le vaega a le Malo e ao ina fa’atino mo le falea’oga i Aua ia amatalia, le vaega o galuega a le Malo.

O le sao o le tama’ita’i fa’atonu o Galuega Lautele a le Malo, Faleosina Voigt, o ia lea sa ia aumaia le auivi fa’ataoto o le galuega o le a fa’atino e le kamupani ua manumalo i le tauofoga, le Nana’s Construction mai Pago Pago.

I le faleaoga lea i lona fogafale pito i luga, ua pasia e fausia ai falea’oga e fa e ofi i ai le fanau a’oga e to’a 35. I lona fogafale pito i lalo, e fa’atuina ai le Potu Ai ma le Umukuka o le a’oga, fa’atasi ai ma le falea’oga e tasi, ua atoa i ai le lima o potu a’oga i lea falea’oga atoa. O ala sitepu ua fa’atulaga e  fausia ina ia mafai ona toso ai nofoa fa’ata’avalevale, ma faia se lifi e fa’alua ai ala savali, e fausia fo’i pa ina ia le pa’u’u ai tamaiti a’oga.

O le tau na manumalo ai le Nana’s Construction latou te fausia ai le falea’oga atoa e $947,000 ma e 12 masina ua mae’a pasia e fa’atino atoa ai lea galuega e le Kamupani Kamuta. Peita’i, na talosaga le Kovana, “E tatau na fausia na’o le lima masina lea falea’oga.”

Na fa’afetaia e Voight ia Kia’aina e fa’apea,“Fa’afetai ona o lou naunau ina ia sologa lelei le fa’agasologa o le Malo o Amerika Samoa, ua e pa’au mai ai lava i lenei mamao, ina ia e lagona le ala o matou savalia.”

O se mea ese na pa’au i ai le PTA, le afio’aga ma le a’oga atoa i  Aua mo Kia’aina, aua na latou foa’i meaalofa matagofie mo ia, ae maise sa latou fa’a-Tuiga ia te ia o se latou Tausala Filifilia mo le Laumua i Rainmaker, “ Ua e manatu e savalia lenei ala ma i matou, ua e mana’o fo’i e te va’ai i le amataga o se galuega lelei o le lumana’i mo le laumua,” o nisi ia o upu o le aso.

“O oe, o le matou Taupou, ia e toe sau i le tatalaga o lenei galuega!” Na sausaunoa fa’atausala le tama’ita’i i le malae o Paepaeulupo’o.