O le suaina o le Eleele mo le fa’atuina o le faleaoga fogafalelua i totonu o le Laumua o Rainmakers po’o le a’oga Aua Elementary, na fa’ataunu’uina i le itula e 11:00 i le aoauli ananafi. O se mea sili ona lelei mo le a’oga, lana PTA ma le afio’aga atoa, ona ua talimalo ai i latou i le Malo o Amerika Samoa i ona vaega e tolu fa’atasi ai ma le Sui Failautusi o le Initeria, se tasi e aiaia ma fesoasoani e fa’apasia mai tupe uma o lo’o fa’agaoioia ai le Malo o Amerika Samoa ma ona tagata o alaalata’i ma soifua ai.

O lea galuega ua atoa le valu o tausaga, o fa’atauanau lona amatalia, peita’i, sa ave le fa’amuamua a le matagaluega i nisi a’oga, o lo’o tuga tele lo latou mana’omia, ae fa’asalafa ai Aua Elementary mo le latou avanoa lelei lenei, ua talimalo ai i le ulua’i asiasiga a le Sui Failautusi fou o le Initeria, ma o se fa’amanuiaga lava lea mo le Laumua i Aua e tusa ai o folasaga sa fa’afofogaina i lea taeao fesilasilafa’i.

Ina ua mae’a sa tu’uina se avanoa i le afioga le Kovana, ma sa fa’apea ai lana tuleiga, “Fa’afetai mo le talisapaia o le sui na malaga mamao mai, ae o le mea e sili ai, e auga galuega fa’ataoto uma a Esther Kia’aina, ina ia fa’aleleia atili a’oa’oga a tatou fanau, ina ia gafatia e i latou ona fa’ataututu fa’afitauli e alia’i mai i o latou vaitaimi.”

“O le suaina o le eleele mo lenei falea’oga, ua fa’ataunu’u ai ni miti a le afio’aga i ona ta’ita’i, ia fa’aleleia atili le nofoaga o a’otauina ai tupulaga o le nu’u.” Sa ia fa’afetaia fo’i vaega ta’itasi o le Malo sa tofu sao ina ia mautinoa e o’o mai i le aso lenei, ua mae’a tapena le vaega a le Malo e ao ina fa’atino mo le galuega ia amatalia, le vaega o galuega a le Malo.

O le faleaoga fogafalelua e ese teisi mai lona fausaga ma ona potu ua pasia e aofia ai nai lo le tele o isi falea’oga fogafalelua o a’oga laiti ua mae’a fa’atutuina i le teritori. Ua suia teisi le ata ina ia o gatasi le galuega ma le tupe ua mae’a pasia e fausia ma totogia ai le Kamupani fa’akonekarate.

I le faleaoga lea i lona fogafale pito i luga, ua pasia e fausia ai falea’oga e fa e ofi i ai le fanau a’oga e to’a 35.

I lona fogafale pito i lalo, e fa’atuina ai le Potu Ai ma le Umukuka o le a’oga, fa’atasi ai ma le falea’oga e tasi, ua atoa i ai le lima o potu a’oga i lea falea’oga atoa. O ala sitepu ua fa’atulaga e  fausia ina ia mafai ona toso ai nofoa fa’ata’avalevale, ma faia se lifi e fa’alua ai ala savali, e fausia fo’i pa ina ia le pa’u’u ai tamaiti a’oga.

O le tau na manumalo ai le Nana’s Construction latou te fausia ai le falea’oga atoa e $947,000. ma e 12 masina ua mae’a pasia e fa’atino atoa ai lea galuega e le Kamupani Kamuta. Peita’i, o le vala lea, ua fa’ailoa e le Kovana i le tina pule, Fiapa’ipa’i Tuaolo Fruean, “E tatau na fausia na’o le lima masina lea falea’oga.”

O se mea ese na pa’au i ai le PTA, le afio’aga ma le A’oga atoa i  Aua mo le tama’ita’i Sui Failautusi, aua na latou foa’i meaalofa matagofie mo ia, ae maise sa latou fa’a-tuiga ia te ia o se laotu Tausala Filifilia, aua ua savalia le ala i Aua, ma ia mana’o e fia va’ai i le amataga o se galuega lelei mo le lumana’i o le laumua.

“O oe, o le matou Taupou, ia e toe sau i le tatalaga o lenei galuega!” Na sausaunoa fa’atausala le tama’ita’i i le Malae o Paepaeulupo’o, ma ua moni ai le fuaitau e fa’asino i le malae lea, “Ua siva Salevao, ae ta’avavale ulupo’o.” Na aiaiuli le sui o le KVZK Televise, Savusa e fa’amata’alia le aso o le Tausala, ma ua le toto fo’i se ua i le Laumua o Rainmaker, aua ua malie mata i va’ai.