Ads by Google Ads by Google

ASIA E LE MATAGALUEGA SOIFUA MALOLOINA TAGATA MANU’A

E leai se tagata o lo o aumau i Manu’a i le taimi nei e le’i o’o iai asiasigaa a foma’i ma sui o le Matagaluega o le Soifua Maloloina, lea na malaga i Manu’a i le lua vaiaso talu ai, i lalo o le ta’ita’iga a le faatonusili, le susuga Motusa Tuileama Toatolu Nua.

 

I se faatalatalanoaga ma se sui sooupu mo le Matagaluega o le Soifua Maloloina ia Margret Sesepasara, sa ia faamaonia atili mai ai le tulaga o le asiasiga sa alo atu i ai le matagaluega.

 

O le aso 22 Fepuari na taunuu ai le aumalaga i Ofu ma Olosega, ma amata ai loa le tautua e ala i le asia o tama ma tina matutua o lo o nofo fale, faapea ai fanau aoga ma tagata uma o lo o i ai.

 

O le lona fa o aso, na fa’aauau ai lenei tautua i Faletolu i Faleasao, Ta’u ma Fitiuta.

 

“E leai se tagata Manu’a matou te le’i asia i le lua vaiaso na matou i ai, e le gata o tama ma tina matutua, ae faapea foi ulugalii, tupulaga atoa ai ma fanau aoga seia oo i pepe, ma ua matou vaaia le fiafia o i latou ina ua latou maua lenei auaunaga mai le Matagaluega o le Soifua Maloloina,” o le saunoaga lea a Sesepasara.  “O le isi vaega o le au malaga sa gafa ma le polokalame o le asia o aiga mo nai tama ma tina matutua, ma o tamaitai foma’i sa gafa ma le tautua lea, o le isi tautua sa matou malaga ma matou o foma’i fainifo e to’alua, lea na maua le avanoa e siaki uma ai oloa o fanau aoga i Manu’a atoa”.

 

O foma’i faapitoa e to’alua na auai i le malaga sa gafa le isi toatasi i le fuaina o le toto, suka ma le fatu, a’o le isi i le siakiina o tino o fanau laiti.

 

O le faletua ia Sesepasara sa gafa ma le tautua o le puipuia o tina ma tamaitai mai le gasegase o le ‘kanesa o le susu’, lea foi sa ia taua le faamanuiaina uma o tina ma tamaitai Manu’a i le isi lea a latou tautua.

 

O se lagona faamomoi loto e pei ona taua e le faletua ia Seseparasa le tulaga sa maitauina i tama ma tina matutua i Manu’a, ina ua maua le avanoa latou te feiloa’i ai ma tuuina atu i ai le tautua ua tele tausaga latou te lei mauaina.

 

O se tasi o faafitauli sa feagai ma tagata matutua i Manu’a i le tele o tausaga ua tuana’i atu, e oo lava fo’i i tina ma’itaga, o le faa faigata lea ona malaga mai i Tutuila nei mo talavai, e le gata e taugata le pasese, ae ua fefefe foi tama ma tina matutua e toe felelei mai i vaalele ona ua matutua i latou.

 

Na faaleo e le alii faipule mai Manu’a ia Toeaina Faufano Autele lona agaga faafetai e fai ai o ia ma sui o lona itumalo, ona o le tautua sa mafai ona tuuina atu e le matagaluega o le soifua maloloina.

 

Saunoa Toeaina e faapea, ua ia maua tala mai aiga uma o lona itumalo, e leai se isi o i latou e le’i asia e foma’i, ma o se tala fiafia lea mo ia ina ua manino i lana faafofoga o lo o soifua maloloina pea tagata Manu’a.

 

Na taua e se tama mai Manu’a i le Samoa News e faapea, talosia ae faaauau ai pea le auaunaga lenei a le matagaluega o le soifua maloloina, ina ia maua ai pea e tagata Manu’a le avanoa e vaai ai le foma’i i avanoa faapenei.

 

Sa ia taua e faapea, “afai e lelei mo Tutuila ma Aunuu ona vaai le foma’i i aso uma, e lelei fo’i mo tagata Manu’a lena tulaga.”

 

Ua i ai nei se faamoemoe o le masina nei e asia ai e le matagaluega tagata i le motu o Aunuu.