Ads by Google Ads by Google

Ao e le DMWR - Lapisi o le Alititai

O le matua faula’i le uta o lapisi o so ’o se ituaiga, ua mae’a aoina mai e le vaega maulu a le Matagaluega o le Vaomatua ma le Gataifale ma ua la’uina mai e va’a i uta ina ia mafai ona lafoa’ia i le Fa’atafuna i Futiga.

Ua fa’ailoa mai, na amatalia mai la latou mauluga i le afio’aga o Fagasa, peita’i o le a fa’agasolo mai i isi afio’aga e aofia ai ma le Fagaloa i se vaitaimi o lumana’i nei, e le o toe mamao.

O lenei galuega o lo ’o fa’atupeina mai e le NOAA i se tinoitupe ua fa’atulaga e mafai ona fa’amamaina ai le gataifale ona o afaina sa lutia ai i tatou i le Tsunami o le 2009.  O lea tinoitupe ua fa’akonekarateina ai le Matagaluega o lo ’o Puipuia le Vaomatua ma le Gataifale DMWR ma le Moon Divers ina ia latou maulu i ogasami loloto o le gataifale fa’atasi ai ma le aloalo, e aoina mai uma i luga le tele o le Lapisi o lo ’o ua pa’ulia ai, ma e le tatau ona i ai i na vaega o lo tatou Si’omaga.

O le aso Lua na te’a nei, na amatalia ai lea galuega ma ua toetoe a magoto le va’a na alu atu fa’apitoa ina ia lafoa’ia i ai le Lapisi mai nei vaega au maulu, ma la’u mai ai i uta. I se va’aiga i le aotelega o le Lapisi, ua ‘iloga ai, masalo o lo ’o i ai se fale’oloa lavalava i le Alititai.

O lapisi nei o lo ’o mafai ona ‘aumaia i luga mai le mamao e tusa o le 90futu le loloto o le ogasami sa maulu i ai nei sui. Ina ua o’o mai i uta le Lapisi, sa fa’ae’e i pikiapu tetele ma la’uina i Futiga e lafoa’i ai.

E le’i mafai ona ‘aumaia i luga isi lapisi tetele e aofia ai mea mamafa e pei o pusa ‘aisa, nofoa tetele ma mea fa’apena, aua e ao ina fa’aaogaina maea ma va’a e lifi mai ai i luga nei ‘oloa aua ua mamafa i le suasami.

Ua tu’utu’u mai i le itu sami papa’u le sa’iliga o lapisi, aua ua va’aia le tele na’ua o atigi apa, atigi fagu, lavalava o so ’o se ituaiga, masini laiti e fa’aaoga i le umukuka ma maota o aiga,  ma pepa i’ila lava latou ua faula’i atu i na ogasami e tulata i a’ai tu matafaga.

“O lo ’o tele na’ua pea le aofa’i o le Lapisi o lo ’o i ai i gataifale o Fagasa ma Tula, fa’atasi ai ma le itu i Poloa e aga’i mai i Leone.” O lapisi e aofia ai ‘oloa e pei o pa’u ta’avale, apa ato fale, ma le anoanoa’i o ‘Oloa tau eletoronisi i totonu o fale ma totoga o ta’avale o so ’o se ituaiga.

O isi nofoaga e matua ‘iloga lava le tele na’ua o le Lapisi o lo ’o i ai i o latou alititai e aofia ai Fagatogo ma Utulei, Aunu’u ma Aua, Matu’u ma Auto. O lenei galuega, afai e te va’aia i ai, ‘ave i ai sau fa’amalo, aua o se galuega lelei lava ua latou fa’atinoina. Ona o tulaga loloto o le tai, e le mafai ai ona so’ona faia fa’alausoso’o lea tulaga, ae fai ma fa’atulaga fo’i itula e i ai I lalo o le sami mo tagata maulu uma lava.

O lo ’o i ai fo’i se isi vaega o lenei galuega fa’amama e ao ina faia i le foga’ele’ele. E aofia ai galuega e fa’atino e afio’aga po ’o ni isi fa’alapotopotoga i nu’u, e aofia ai ekalesia, sosaiete a tina, po ’o ‘autalavou.

O se isi vaega, e mafai ona va’aia ituaiga o lapisi o lo ’o matele ina lafoa’ia i le sami, ona faia lea aga’i i ai a’oa’oga, ina ia le toe tupu lea tulaga, ae ia lafoa’ia tonu le lapisi i nofoaga ua mae’a fa’amautu i ai.

Ia faia fo’i ni fonotaga fa’alea’oa’oga ina ia fa’apupula atili i tagata nofoaga ua mae’a pasia ina ia lafoa’ia i ai lapisi fa’apenei, ae le o le fa’atamala ma so’ona lafoa’ia i le gataifale e fa’aleagaina ai le ofaga mo meaola uma o le sami, e toe o’o mai lava lea a’afiaga ona o lo ’o tatou tausamia i’a ma figota o le sami.

O le susuga le ali’i pule sili o le Moon Divers, Howard Dunham, sa ia fa’ailoa mai le anoanoa’i o lapisi o lo o ua i ai nei i le alititai e le tatau ona i ai, ma ua ia fa’apea ai, “O lea ua aumaia i luga na’o lapisi ua mafai i lenei taimi, ae o lo ’o tele na’ua lapisi mamafa i lalo, e ao ina o’o i ai le galuega, ae o le isi taimi mulimuli mai e faia ai le galuega tele mo na ituaiga o Lapisi Lafoa’i.”

Pe afai e i ai ni fesili e fia fesiligia ai lenei galuega ua fa’atautaia e le DMWR ma le Moon Divers, e mafai ona e vala’au ane ia Lawrence i le numera telefoni 633-4456.

saunia: Leua Aiono Frost