Ads by Google Ads by Google

Amerika ia Iran - Fa’afo’i mai le Va’alele

Ua mae’a talosaga le Peresetene o Amerika, Barrack Hussein Obama ia Iran, e toe fa’afo’i mai le latou va’alele su’esu’e, le ituaiga lea e leai se pailate ae fa’atonutonu atu e le ki rimote, ina ua le mailoa lava e Amerika, “pe na fa’apefea ona o’o i lima o le vaega leaga meatau a le vaega lelei.”

O se mea lena o lo’o tu’ufesili pea lava le Matagaluega o le Puipuiga o le Saogalemu o le Malo Tele, pe na fa’apefea ona maua lea va’alele, ae leai ma se mea o afaina, peita’i o le ituaiga va’alele lea, e le mafai ona maua e meava’ai mamao radar va’alele ia.

O lona valu ma le ituaiga elemeni o lo’o fausia ai lona tino, o mea na e le mafai ona maua e masini va’ai mamao o so’o se ituaiga. E mautinoa, sa i ai se tala na tusia ma fa’ailoa mai, o lo’o misi le toe fo’i ane o se tasi o va’alele nei o le fuava’alele su’esu’e fa’apitoa i luga a’e o Iran, Iraq ma Afakanisitana.

Ae na fa’ate’ia le CIA i le ‘aumaia o se polokalama fa’apitoa i le televise, ua fa’ailoa mai ai le ata o le va’alele lea a Amerika, o lo o solo mai le tino e fitafita Iran, ma ua latou fiafia e fa’aagiagia mai ai ma le Fu’a a Meleke i lea lava ata televise na latou pu’eina, ina ia fa’ailoa mai ai ia Amerika, ua latou maua le “isi fa’amau o lo latou ofu tau.”

I lea talosaga na fa’ao’o atu e le Peresetene, na saunoa lava le tama’ita’i Failautusi a le Setete o Amerika, Hillary Clinton, “Ua tatou iloa Iran, e le taitai lava ona tali mai, ae o le mea sili, e le nofo mau ai tatou, e faia pea le faiva o le feso’ota’i, pe tua ma ni a, ae i ai lava ala e feutaga’i ai Amerika ma so’o se malo o le Lalolagi.”

O lea ituaiga o va’alele ua fa’aigoaina o le RQ-170 Sentinel ma o le amataga lava o le vaiaso na te’a na iloa ai lea va’alele ua i ai nei i lima o tama leaga. Ua fa’ailoa mai e Tehran, o lenei va’alele sa aumaia i lalo e a latou faiga fa’amiliteri, ae ua fa’ailoa mai e Uosigitone, “E leai, e i ai se vaega o le va’alele na fa’aletonu, ma ua tulaueleele ai i laueleele o Iran lea ua maua ai e lea malo se tasi o aseta a Amerika, e le o lau maua le fausaga ma ona metotia maoa’e lea e fausia fa’apitoa ai, ina ia le mafai ona maua e masini va’ai mamao po’o reita.

E ese mai le fiafia o Iran ua latou maua fua lenei va’alele, ae ua fa’ailoa maumaua’i mai i le polokalama a le televise Iran lea na fa’ailoa fa’alaua’itele mai ai lea va’alele, ua fa’ai’ui’u fo’i ona aumaia uma i fafo fa’amaumauga a Amerika sa i ai i totonu va’a fa’apitoa, ae ese ai le fita o le tulaga, ua maua uma ai ma le ituaiga o fausaga o le tino atoa o le va’alele, ua le mafai ai ona maua e masini va’ai mamao, aua o lo’o feoa’i atu lava tama nei i le vateatea, ma tapu’e mai ata uma lava o nofoaga fa’apitoa a le vaega a Talipana ma isi tam sese, ia na maua sa’o mai lava i Pakisitana, le tama o le ata, Osama bin Laden.

Ua fa’ailoa mai e le ali’i Ta’ita’i fono a le Komiti mo le Saogalemu o Iran, Parvis Sosoui, na ia fa’ailoa ai, o nei fa’amaumauga uma ua maua mai i totonu o lenei va’alele, o le a fa’aaogaina e lo latou malo, e faila ai se latou tagi fa’asaga ia Amerika i le fa’amasinoga fa’avaomalo, ona o lo latou sopoia o le va fa’avaomalo i tulaga o le tuaoi ma le nofo filemu o malo uma.

Na fa’ailoa i lipoti a Iran, e tusa ma le 155 maila le mamao mai i totonu o le tuaoi o Iran ma Afakanisitana na o’o mai i ai lea va’alele, ma ua mafua ai ona latou fanaina mai i lalo e fa’aaogaina ai latou meatau fa’asaipa.

Ua i ai le popolega i le taimi nei ia Amerika, e fa’apea ai, e le tatau lava ona maua e le vaega a Iran ma isi malo o lo’o latou auaufa’atasi, ona iloa le suiga o le vali lea e vali atoa ai le va’alele ina ia le mafai ona maua e masini reita. Afai ae maua, o le a tele na’ua fo’i nisi fa’afitauli e mafai ona o’o mai ia i tatou ona o lea matati’a a Amerika, ua maua fo’i e Iran ma lana vaega leaga.

Ua mae’a fa’ao’o nei e Iran ma lana faigamalo se tusi fa’asea e fa’asaga ia Amerika ma ana su’esu’ega nana mai le latou malo, ma ua maua nei le tele o nei fa’amaumauga e avea ma molimau i se fa’amasinoga o lo ua loma nei.

Ua faia le latou mau, e le tatau ona toe fa’aauau ona faia e Amerika nei ituaiga o sailiiliga nana mai le vateatea. Ua fa’ailoa mai e le Ofisa Autu o le Militeri a Amerika Pentagon, o lo’o fa’aaogaina nei va’alele rimote ina ia mafai ona fa’amaumauina uma faiga fa’aniukilia lea e gaosia ai meatau i Iran ma isi fo’i atunu’u o lo’o au i ai le malolosi o Reita lea e fa’apipi’ia i nei va’alele fa’apitoa.

Source: Associated Press