O se lu’iga sa a’otauina muamua ai i latou fa’atinoa le vaega amata o le polokalama “Olaga Maloloina o le Fanauiti” ua mae’a nei, ae o lo ua fa’atulaga e amatalia mai i le ECE i Aua i le aso Faraile nei lea fa’amoemoe lelei.

O le vasega o fanau ua fa’atulaga e fuaina lo latou mamafa, ma le lapopo’a o latou tino o le 2-8 tausaga le matutua ma le 3-5 tausaga le matutua.  Manatua o le vasega o fanau o le a fa’aaogaina mo le polokalama lea, e latou te taulimaina le uati fa’apitoa e fuaina ai a latou galuega fa’atino i le aso, ma taimi fo’i e momoe ai. O lona uiga e le tatala esea nei uati, ae momoe lava ma ta’e’ele ma le fanau se’ia mae’a le vaiaso muamua.

O le uati fa’apitoa lea, o le masini lea e fuaina le aofaiga o gaoioiga fai a le tamaititi ma o fa’amaumauga aoga tele ia mo le polokalama mo a latou fa’ai’uga e fa’amaonia ai, o lo’o vaivai le fa’agaoioia o tino o fanau e tusa ma le mea’ai o lo’o ua saunia e tausami i aso ta’itasi.

E le gata i gaoioiga, ae o le a matauina fo’i le fua o mea’ai a le fanau ua aofia i le polokalama. E aoga mo le fanau lava ia, le matua, ae maise o le polokalama ia fai se aoga mo le tupu a’e maloloina o lou alo.

O e uma ua auai i le aufaigaluega a lenei Polokalama i le Land Grant a le Kolisi Tu’ufa’atasi, ua mae’a a’otauina lelei mo le tu’ufa’atasia o fa’amaumauga tau le tino, le mamafa ma le u’umi o le fanau a’o le’i amatalia le polokalama o aofia ai o ia.

O le a latou fa’ao’o uma atu nei faamaumauga amata, fa’atasi ma fa’amaumauga ogatotonu o le taimi atofa mo le polokalama e faia ai, atoa fo’i ma fa’amaumauga o le mae’a lelei o le polokalama e fa’aaogaina ai lea vasega o fanau.

E tusa ma le fa’amatalaga a le susuga Aufai Aufai Arteta, sa ia fa’ailoa ai, “E ao ina atoa lelei le 180 o fanauiti e fa’atino ai le polokalama lea o le a amata mai Aua ECE, si’i mai lea i Aoloau, ma toe fa’aofi mai i ai nisi fo’i ECE i le Fagaloa se’ia atoa lava lea faitauga.”

Manatua, ua mae’a saunia uma pepa e patino mo Matua ina ia latou sainia e mafai ai ona auai lona alo mo lea polokalama e toe fa’aititia ai lona mamafa, a’o itiiti lava i latou. O le fa’atautaiga o lenei polokalama e toe taumafai ai ai, ia fa’aititia le so’ona puputa o fanauiti a le atunu’u, aua ua matauina e tusa ma fa’amaumauga i le lalolagi, “ua numera tasi Amerika Samoa i lea fo’i afaina tau le soifua maloloina.”

Lona lua, ua mae’a fa’atulaga i Falema’i o le Lalolagi ma Inisiua fo’i, “O le so’ona puputa pe mamafa tele nai lo lou umi o i ai, o se gasegase e ao ina toe tineia a’o e soifua!” Pe afai e le atoa le aofa’iga fa’atulaga, ua fa’ailoa mai, o le a aofia ai ma fanau ua tausia i nofoaga fa’apitoa mo fanauiti po’o Day Care i le vasega o fanau e mafai ona fa’atautaia ai lenei polokalama aoga.

“Ua le taofia le polokalama mai le fa’agasolo loa, aua o se galuega e ao ina vave fa’ataunu’u, ia fua mai fo’i ni fua lelei pe a mae’a fa’atautaia.” O se toe fa’aopoopo mai lea a Areta e tusa ai ma le Polokalama CHL.

Ia Novema 13 & 14 sa fa’atautaia ai le semina i le Land Grant e a’otauina ai le aufaigaluega ma avatu i fafo latou fa’amaumauga e togi ai po’o sa’o, ma ua fa’ailoa mai, ua agava’a i latou mo lea faiva. Lea ua afua ai ona faia loa le galuega, ia fua mai fo’i ni fua lelei i lona taunu’uga.

O faia’oga na o mai mo lea kosi fa’aa’oa’o a le aufaigaluega o Dr. Marie Kainoa Fialkowski mai le UH Manoa ma Dr. Rachael Novotny, o se tasi na la’ua fa’atuina lea fo’i polokalama i Amerika. O lenei polokalama ua va’ava’alua ai le UH Manoa ma le Land Grant ASCC i lona fa’atautaiga.