Ads by Google Ads by Google

Amata Vasega mo le Polokalame 4 tausaga i le Kolisi

E to’alua fanau aoga ua faamoemoe e faauu i le ogatotonu o le tausaga nei, talu ona amata le Polokalame ta’i 4 tausaga i totonu o le Kolisi Tuufaatasi i Malaeimi, e saili ai tikeri a fanau aoga mo soo se matata.

I se feiloaiga a le Pulega o le Kolisi Tuufaatasi ma le Komiti o Aoga a le Senate i le vaiaso nei, na faamaonia ai e le pulega a le Kolisi lea tulaga i luma o le komiti, ina ua fesiligia e Senatoa Fuata Iatala se tulaga ua i ai lea polokalame.

E ui i faafitauli tau tupe lea o loo feagai nei ma le kolisi, peitai na faamaonia e Uta Tagoilelagi i luma o le komiti, o loo taumafai pea le pulega a le kolisi e saili nisi seleni faaopoopo, ina ia mafai ai ona faatupe lenei faamoemoe, ma o le taimi nei, ua i ai se isi vaega tupe fesoasoani mai le malo tele e $1.8 miliona ua faamaonia mai e faatupe ai lea polokalame.

O le aso 6 o Aperila o loo fuafua e taunuu mai ai le komiti o aoga o loo latou asia kolisi i totonu o setete ma teritori e aofia ai ma Amerika Samoa, mo le faamautuina o le tulaga lelei o le aoga ma le faamoemoe, a mae’a loa le asiasiga lea, ona amata aloaia loa lea o Polokalame tai 4 tausaga.

E lei faalauiloa mai e le pulega a le kolisi le aofai o tamaiti aoga ua fuafua e talia i totonu o le uluai polokalame e 4 tausaga lea o le a tatalaina nei, na pau le itu na mafai ona faamaonia i luma o le komiti a le Senate, o le faanaunauga autu ua tatalaina ai lenei polokalame, ia maua pea e fanau aoga le avanoa e ao tauina ai i latou i totonu lava o le atunuu, ina ia taofia ai le tau malaga atu i fafo e aooga ai.

E ui o lea ua faalauiloa e le Pulega a le Kolisi la latou faamoemoe i le tatala aloaiaina lea o le Polokalame tai 4 tausaga mo fanau aoga, peitai ua taoto atu i ai ma se fautuaga mai le afioga i le alii Senatoa ia Galeai Tuufuli, ina ia silasila toto’a i a latou taumafaiga o loo fai nei, ina ne’i avea lo latou naunau e amata le polokalame 4 tausaga ae emo ane le ata e le mautu ma lelei.

“O le fautuaga i le pulega a le kolisi, fai muamua ia mautu le polokalame tai 2 tausaga o loo i ai nei, ona faatoa fai ai loa lea o le polokalame lena e  4 tausaga, fai se mea e tasi ia mautu lelei, aua nei outou manatu tele i le polokalame tai 4 tausaga ae emo ane e faaletonu, ae afai e mafai, fai ia lelei,” o le fautuaga lea a le afioga Galeai.

 O le fuafuaga mo le amataina o le polokalame tai 4 tausaga i le kolisi tuufaatasi, e le o se fuafuaga na faatoa alia’e mai i le tausaga nei, ae o se fuafuaga ua leva ona faataoto mai e le kolisi, lea foi na saunoa i ai kovana Togiola Tulafono i se tasi o ana polokalame i faaiuga o vaiaso.

O le mafuaaga autu ua faatulai ai lea polokalame e pei ona saunoa Togiola, ia mafai ai e fanau e le o maua le avanoa e ulufale atu ai i kolisi ma aoga i fafo ona maua le avanoa e a’otauina ai i mataupu ia e ta’i 4 tausaga e ave ai.

Sa ia taua, o nisi o aiga e le gafatia le itu tau tupe e auina atu ai fanau i fafo mo aoaoga, ma o le isi lea auala o loo taumafai malosi ai le malo, ina ia mautinoa e maua uma e fanau aoga avanoa nei e aoaoina ai.

Saunoa le alii kovana, o le faanaunauga autu o le malo, ia mafai ona siitia i luga le tulaga o aoaoga ma ia a’o tauina alo ma fanau a le atunuu ia atamamai, aua o i latou ia o le lumanai o le atunuu i le lumanai.