O le Aso Gafua na te’a nei na amatalia ai le Tolauapiga a le Polokalama a le 4H Community & Family Consumer a le Land Grant - ASCC ma e silia ma le 120 tamaiti o lo’o aofia i ai. O le toe polokalama lenei o polokalama e tolu lelei o tolauapiga sa fa’asolo mai ma e i ai se so’otaga ma le Polokalama a le  Operation Military Kids lea sa latou tautai lua maia togalauapi amata e lua.

“O le silia ma le 120 tamaiti lea ua tu’ufa’atasia nei, o lo’o fa’atautaia ai lava fo’i polokalama masani ona faia a le Polokalama 4H Community & Family Consumer, ua a’otauina le fanau talavou i le taina o Ukulele ma pesega fa’asamoa moni. O isi tomai e fa’aaoga mea o maua i laufanua e fatuina ai ula ma teuteu o maota ma laoa.”

O se fa’amatalaga lea a le tama’ita’i o Nellie e tusa ai o le latou toe polokalama mo lenei tu’uaga.

“E ui lava ina soso’o mai nei tolauapiga e tolu, ae o se fiafiaga sili o le va’aia lea o le naunauta’i mai o le fanau ia auai i lenei fa’amoemoe. Sa moetasi mai isi tolauapiga muamua, peita’i, o lenei taimi ua faia ina ia usu mai i le taeao ma toe fo’i i aiga i le aoauli.”

O nisi o le fanau, e fou ia i latou le tomai o le su’isu’i, ua a’otauina i latou, ua fa’apena fo’i ona a’oa’o i latou i ituaiga mea’ai eseese ma ‘aiga paleni mo le soifua maloloina lelei. O lea itu, ua soso’o ane ai ma le a’otauina i le kukaina o mea’ai, le umi e kuka ai fuala’au ‘aina, ae maise o le ituaiga mea’ai ia fa’atele ma ituaiga mea’ai e fa’aitiiti i lau ‘aiga e tasi.

O le tulaga o pesega ma siva fa’asamo, ua le misia i lea fo’i vasega fa’apitoa. O le vasega o fanauiti, e matua fiafia e pepese ma olioli ma faia’oga i le amataga o vasega i le taeao, pe a mae’a le tatalo.

I le vasega o galuega taulima, e iloa e i latou ona salu tuaniu ina ia gaosia ai salu lima ma faia ai pe’ape’a, o polo e ta’a’alo ai, o pulou mo le la ma isi galuega taulima Samoa fa’apena. I le isi itu e gaosia ai e i latou le fa’ava’a o ata tapu’e. Ua a’oina fo’i i latou i le fa’aaogaina o mea pu’eata ia maua so latou ata e ave i le aiga i le fa’ai’uga o lenei tolauapiga.

Ua faia fo’i teuteuga mo latou pulou, o mea e mafai ona fa’aaogaina e i latou i le vevela o le la, ma ua fa’aaoga ai mea ilaila uma ua mafai ona tufaina mai e faia’oga. Ua teuteina a latou elei o ofutino ma mitiafu, ae maise o ie tie dye ma i lau lava mamanu e te fiafia ai.

O nei ituaiga o a’oa’oga, e fa’asolo ai lava vasega e lima ua vaevaeina i ai le aofaiga o le fanau ua mae’a lesitalaina mo lea tolauapiga i le fale ta’alo a le ASCC. Ona o le aso ananafi o le aso Malolo mo le sisigafu’a a le Manu’atele, sa malolo ai lea fo’i togalauapi, peita’i, o le a toe fa’aauau i le aso e pei ona lautogia ai.

“E matua fiafia matou ua maua le avanoa e toe maua ai isi matou uo fou, ae maise e fa’amalosia matou e te fa’amasani i le isi ou uso e te le masani ai lava!” O se tala lea a Hekoti Hekoti o Nuuuli Polytech.

“Tele le aoga o le tolauapiga lenei, ua ta fiafia ai, ae ua le nofo fo’i i le fale ma fai fe’au masani, peita’i, o lea e a’oa’o ai fo’i le faiga o fe’au i le fale, ma ua fiafia, ua fa’ateleina ai lota iloa ma le tau fa’atonu fo’i o matou.” O se tala lea a Tommy Wudrough mai Manulele Tausala.