Amata Ta’aloga Pasiketipolo A’oga Maualuluga AS - Aso Gafua
Ua fa’atulaga nei le amataga o le Liki Pasiketipolo a A’oga Maualuluga i le aso Gafua nei, ma ua vala’auina matua ma i latou e fiafia i lea fo’i fa’agatama ina ia afifio ane e tapua’ia ta’aloga a le fanau a’o alofaiva i latou i a latou filigamaea i malae togia mo latou ta’aloga.
E lua vaega tetele ua fa’atulaga ai le fanau ta’a’alo i a’oga maualuluga uma i le teritori, o le Vaega a le Varsity mo le fanau i vasega 11&12, ma le Junior Varsity mo fanau i vasega 9&10 i a’oga maualuluga uma ua manatu e fa’aulu ni a latou ‘au ta’a’alo.
Peita’i, e i ai a’oga, ua ta’itasi a latou ‘au pasiketipolo ua fa’au’u mai, ma ua fa’aulu lea i le vaega o le Varsity. I le taimi nei e to’avalu a’oga o le a tauva i le vaega a le Varsity: Leone, Tafuna, Fa’asao Marist, Samoana, Fagaitua, Nu’uuli VocTech High, South Pacific Academy ma Manumalo Baptist High.
Mo le vaega a le Junior Varsity ua tula’i mai ai na’o: Leone, Samoana, Tafuna, Fagaitua, Polytech High & Fa’asao Marist High e tauva ai.
I le tausaga ua te’a i le ta’amilosaga Pasiketipolo lava a a’oga maualuluga, na faia’ina ai Lions i le Warriors i le 60 - 45 mo le sa’iliga lea o le Siamupini 2010-2011 i le Varsity lea, peita’i o le ta’aloga faitaulia e sa’ili ai le siamupini a le Jr Varsity, sa fetaui ai le Sharks mai Samoana ma le Toa mai Tafuna, na malepe fa’amoemoega o le Toa ina ua sola le Sharks ma le mea atoa i le la’ua fetauiga lea ina ua maua ona ‘ai e 43-37 a Tafuna.
I le tausaga la lenei, ua fa’amalo atu ai i le a’oga a South Pacific Academy Dolphins lea ua oso mai i luga o le fua, ae masie fo’i le ‘au a Manumalo Baptist Academy Flames lea ua lua ai nei tausaga o fa’aulu pea lana ‘au i le vaega a le Varsity i lenei tausaga.
Ua vala’au fa’apitoa mai le Taiulu o lenei Liki Pasiketipolo a le fanau a’oga maualuluga i le teritori i le mamalu lautele, ina ia fa’aalia o outou agaga sapaia o taumafaiga a fanau, i lo outou auai mai, fa’amalosi’au ane ma lagolagosua la latou taumafaiga i malae ua fa’atulaga mo a latou ta’aloga i afiafi o aso ta’itasi o le vaiaso.
Ua fa’ailoa mai fo’i le galulue malosi o faia’oga ma fa’atonu o ‘au ta’itasi ina ia mautu le taumafaiga a latou tama ta’a’alo mo a latou ‘au pasiketipolo, ina ia manuia fo’i a latou taumafaiga i le ta’amilosaga o lenei tausaga.
“Ia manuia lava le fa’amoemoe o ‘au uma, e leai se tasi e le mana’o i le manumalo, peita’i, o le ‘au lava sa sili ona tigaina ma usita’i i koleniga, o ia lava lena e tali i le manuia o ana taumafaiga i le fa’ai’uga!” O se tala mai lea a le susuga Valusia Talataina.
O le fa’atulagaga lenei o ta’aloga i afiafi ta’itasi o le vaiaso a sau, mai le aso Gafua se’ia pa’ia le aso Faraile:
Aso Gafua: FHS vs LHS- Malae TBA: SHS vs FMS -Malae Samoana
Aso Lua: NVT vs SPA- Malae TBA: THS vs MBA- Malae Tafuna
Aso Lulu: FMS vs FHS- Malae Malaeloa gym: LHS vs SPA-Malae Leone
Aso Tofi: SHS vs MBA- Malae Samoana: NVT vs THS- Malae TBA
Aso Faraile: FHS vs SPA- Malae TBA: FMS vs MBA- Malae Malaeloa gym
O ta’aloga uma lava ua fa’atulaga ina ia amatalia tonu i le itula e 4:00 i le afiafi ae o lenei liki e fa’asolo lava se’ia o’o ia Fepuari 23, 2012 lea e fa’atulaga e sa’ili ai le siamupini o vaega e lua o le ta’amilosaga: Varsity ma le Junior Varsity. O lona uiga o ta’aloga o le ‘pa’u ma nofo’ e amatalia lea ia Fepuari 2, 2012.
saunia: Leua Aiono Frost