Ads by Google Ads by Google

Amata ta’aloga afeleti a a’oga maualuga

Ua fa’ailoa mai le amatalia o toleniga o Ta’aloga Afeleti a A’oga Maualuluga a le tatou malo i le aso ananafi i le Malae Ta’alo i Tafuna, Veterans Memorial, ma e to’alima a’oga maualuluga o lo o tauva ai e aofia ai Leone, Tafuna, Fa’asao/Marist, Samoana ma Faga’itua.

O le amataga o nei ta’aloga e amatalia lea i ta’aloga ma tu’uga a tama’ita’i. E tusa lava pe na’i tama’ita’i tu’uga nei o le a fa’atautaia, ae o lo ua i ai le fa’amoemoe, e auai uma lava a’oga e lima nei ua mae’a fa’aulu o latou igoa e auai i tu’uga ma tauvaga Afeleti o lenei tausaga.

O isi tu’uga faitaulia uma o le a fa’asolo atu i lalo taimi ma aso e faia ai i le Malae lava i Tafuna, le Veterans Memorial:

Aso Gafua: Ianuari 30: Tu’uga mo Tama

Aso Lulu Fepuari 1: tu’uga a tama’ita’i #2.

Aso Gafua Fepuari 6: Tu’uga Tama #2.

Aso Lulu Fepuari 8: Tu’uga a Teine.

Aso Gafua Fepuari 13:  Tu’uga a Tama

Aso Lulu Fepuari 22: O le aso lea ua fa’atulagaina mo le sailiga o siamupini i tu’uga uma lava teine ma tama.

O ta’aloga nei o le a tauva ai le fanau filifilia mai a’oga ta’itasi i le vaega o tama’ita’i ma ali’i fo’i:

Togi o le Ma’a Salafa [Discuss], Togi le Ma’a Mamafa [shotput], Velo o le Tao [javelin], tamo’e i le 100 mita, tamo’e i le 1,500mita, 4X1 100mita Relay, Tu’uga o le 200 mita, Tu’uga o le 400 mita,  Tu’uga o le 800mita 4X4 Relay.

Ua fa’apea fo’i ona fa’alauiloa atu i matua, o tamaiti a’oga, ae maise o uo mamae a i latou o lo ua mae’a tusia o latou suafa i nei tu’uga, ina ia o mai uma i le malae e sapai ma fa’amalosi’au i a outou tama ma teine tutu’u ina ia manuia a latou taumafaiga i le malae i Tafuna.

E tusa ai ma se fa’amalosi’au mai a le ali’i o Clayton Mahuka, lea e ta’ita’ia lea fo’i ituaiga o fa’agatama i le vasega o a’oga maualuluga, sa ia fa’ailoa mai ai, “O le taua lava o le taumafaiga a le fanau ta’a’alo o le va’ai atu lea o fa’amalosi’au mai si ona aiga, ma ana uo ae maise uso ma tuafafine i a’oga e o mai ai. O i’ina e toe una’ia lava le i si malosi e fa’auma ai le maila!”

Ua fa’ailoa mai e Mahuka e fa’apea, “O se mea matagofie le maimoa i nei ituaiga o fa’agatama, aua e matua oso fo’i se mea malie i le vasega o le au maimoa pe a va’aia miliga ua a’asa mai luga o le malae. E oso le tu’uga latou, ae oso ai fiva o e maimoa, ae maise pe a va’aia le motu mai o lona alo ma o lo’o tau soso mai ai se i si tama tutu’u. Maliu mai matua, e sapaia le fanau, atonu ua misia le ta’aloga muamua i le aso ananafi, ae ‘aua le toe misia le vaiaso a sau i le aso Gafua ma le Aso Lulu, e te fa’amalosi’au ai i si au ‘au po’o lou alo fo’i, ia manuia lana taumafaiga.”

“O lenei ituaiga o taumafaiga, e na’o le tagata tauva lava e faia le manumalo, ma afai ae gafatia e le tagata lea le tulaga muamua, o se fiafiaga lena o lana a’oga atoa, faatasi ai ma lona aiga. Ia manuia le taumafai i e tauva, ma e mautinoa lava e maua lava e le sui na lava koleni le tulaga muamua!”

Afai o fia tauva lou alo i lea ituaiga o ta’aloga, e mafai ona e vala’au mai i le telefoni 699-1657 ma fesiligia po’o i ai pea se avanoa, ae a leai, e i ai fo’i le tausaga fou mo lona ulufale ae ‘aua ne’i so’ona fagaina o ia i mea tausami lololo, ma mea’ai e tele ai le ga’o i lenei tausaga atoa.