A o le i tuua e le afioga i le Sui Komesina le tumau o le Matagaluega o Leoleo le atunu’u mo fafo i le po anapo, sa ia fa’amaonia i le Samoa News i le vaiaso nei, le amata aloaia ai lea o su’esu’ega lotoifale a le Matagaluega o Leoleo, i tu’uaiga fa’asaga i amioga le taupulea mai ni isi o ali’i ma tama’ita’i leoleo.

E ui e le i fa’ailoa mai e le afioga Save Liuato Tuitele suafa o leoleo o lo o faia fa’asaga i ai nei su’esu’ega, peita’i sa ia fa’amaonia lona fa’atonuina o su’esu’ega ina ia fa’agasolo fa’asaga i tu’uaiga nei.

“O lea ua amata su’esu’ega a le Matagaluega o Leoleo e tusa ai o le tele o le mau tu’uaiga fa’asaga i amioga le taupulea a ni isi o leoleo”, o le saunoaga lea a Save i se talanoaga ma le Samoa News i luga o le telefoni i le vaiaso nei.

Ina ua fesiligia le afioga Save pe matuia tu’uaiga o lo o faia fa’asaga i leoleo o lo o a’afia, na tali le Sui Komesina le tumau, “atonu e le matuia tele i auala sa latou fa’atinoina ai gaioiga e pei ona tu’uaia ai i latou, ae i lalo o le latou tautoga sa faia latou te puipuia le saogalemu o le atunu’u, o iina e mafai ona ou fa’apea atu ai e matua sili lava ona matuia”.

O ni isi o mataupu e pei ona aga’i i ai su’esu’ega fa’alotoifale a le Ofisa o Leoleo, o mataupu e aofia ai tu’uaiga mai se ali’i pagota, sa fa’ao’olima ni isi o leoleo o le toese ma pagota ia te ia, o isi tu’uaiga e aofia ai le mataupu lea na faila ai e se aiga mai Pago Pago sa latou tagi fa’asea i le Ofisa o le Komesina, fa’asaga i ni ali’i leoleo sa latou fa’ao’olima i se tamaititi o le aiga e a’afia i le gasegase o le mafaufau, fa’apea ai ma le mataupu e pei ona tu’uaia ai se leoleo o le Falepuipui Tamaiti, i lona fa’ao’olima lea i se teineititi o lo o taofia ai i le falepuipui.

Na fa’amaonia mai e Save le mae’a lea ona faia o suiga fa’asaga i leoleo o lo o faia aga’i i ai su’esu’ega, e ala i le tofia o i latou e galulue i isi vaega o le Ofisa o Leoleo, a o fa’agasolo ai suesuega a le Ofisa tutotonu a leoleo.

E le o se taimi muamua lenei ua alia’e mai ai tu’uaiga fa’asaga i ni isi o leoleo e aofia ai ma ni isi o leoleo o le toese, i lo latou fa’ao’olima lea i ni isi o pagota.

“O le fa’amaoniga o le tula’i so o mai o lenei fa’afitauli, o lea o lo o fa’agasolo i luma o le fa’amasinoga fa’aitumalo i le taimi nei le mataupu fa’asaga i se ali’i leoleo o le toese, o lo o tu’uaia i lona fa’ao’olima lea i se ali’i pagota, ma e foliga mai ua leva ona tutupu fa’afitauli nei ae ou te le i o o mai i le ofisa lenei”, o le saunoaga lea a Save.

I luma o le fa’amasinoga fa’aitumalo i le taeao ananafi, na taua ai fo’i e le afioga i le ali’i fa’amasino ia John L. Ward II le tulaga lava fo’i lea e tasi, ina ua sauni e tu’uina mai lana fa’aiuga fa’asaga i se ali’i pagota na ta’usala i lona fa’ao’olima i le isi fo’i ali’i pagota.

Saunoa Ward II e fa’apea, ua tele mataupu e faatatau i faaoogalima o lo o tutupu i totonu o le toese ua oo mai i luma o le fa’amasinoga, e le gata i le fa’aoolima o pagota i isi pagota, ae oo lava foi i leoleo ua faaoolima pagota.