O le mataupu lea ua molia ai se fafine Amerika Samoa i Alaska i lona fa’aaoga lea o fa’amaumauga o lafoga a tagata Amerika Samoa e faila ai lafoga i Amerika, o se amataga lea o su’esu’ega o le a fa’agasolo i tagata mai Amerika Samoa nei, o lo o faia le amio o le faila lea o a latou lafoga i Amerika, e pei ona taua mai e se sui sinia o le Ofisa o le Tupe a le malo.

E pei ona ripotia e le Samoa News i le vaiaso nei le pu’e fa’apagota e le malo feterale o le tina o Pepe Anetipa, 58 tausaga mai Amerika Samoa nei, ona o tu’uaiga i lona fa’aaoga lea o fa’amaumauga o lafoga a tagata o lo o nonofo i Amerika Samoa, e faila ai lafoga i Amerika ma le fa’amoemoe, e maua ai tupe mo lafoga toe fa’afo’i i se auala tau fa’asese ma le tau fa’avalea.

Na taua e le susuga ia Melvin Joseph, lea sa avea muamua ma le Pulesili o le Ofisa o Lafoga a le malo, a o lea ua avea nei o se faufautua e fa’apea, o le mataupu fa’asaga ia Anetipa, “ua na o se amataga lea o su’esu’ega i tulaga o lafoga mai Amerika Samoa o lo o faila i Amerika”.

A o tau vavala mai ai ni isi o fa’amatalaga e uiga i lenei mataupu, e le o mafai e le vaega su’esu’e a le feterale ona latou fa’amatu’uina mai ni isi o fa’amatalaga loloto e uiga i le mataupu a Anetipa, e le o mafai fo’i ona aofia i totonu o fa’amaumauga ua faila fa’asaga i lenei tina i luma o le fa’amasinoga fetarale.

Mo se fa’ata’ita’iga i ni isi o mataupu e le o manino mai i le taimi nei, e le o manino pe sa tu’uina atu e tagata Amerika Samoa ia na faila e Anetipa a latou lafoga i Amerika, le fa’atanaga ia te ia na te failaina ai a latou lafoga i fafo, pe o le mea fo’i sa iloa lelei e i latou nei gaioiga uma o lo o faia e le ua molia.

O se tasi o fesili e le o mafai ona tali i le taimi nei, pe sa fa’asoa mai e Anetipa se vaega o tupe sa maua mai lafoga a tagata ta’ito’atasi sa ia failaina, pe sa ia teuina uma ma fa’aaoga mo ia lava.

Ae afai sa ia lafo mai se vaega o nei tupe i tagata Amerika Samoa sa ia faila a latou lafoga i fafo, pe na fa’apefea ona lafo mai nei tupe, pe sa lafo mai le siaki i le falemeli, lafo mai i se kamupani lafo tupe, pe sa teu sa’o fo’i i totonuo teugatupe a i latou nei i faletupe i Amerika Samoa.

Na taua e le loia a le malo feterale ia Thomas Bradley i le Samoa News e fa’apea, o lo o ia te ia tali o fesili uma nei, ae talu ai e le o mafai e le feterale ona fa’alauiloa fa’alaua’itele fa’amatalaga nei, o le mafua’aga fo’i lea o le a le mafai ai ona ia talanoa i ai.

Ae i se ripoti sa fa’asalalau e le alaata o le KTUU-TV i Alaska, o lo o taua ai e Bradley e fa’apea, o le tele o le vaega o le tupe sa maua na fa’aaoga e Anetipa, se’i vagana ai se vaega itiiti sa ia lafo mai i tagata faila lafoga i Amerika Samoa.

“O ni isi o vaega o lenei tupe sa lafo mai e Anetipa i tagata faila lafoga na te iloa, o ni isi taimi na te taofia uma le tupe, ae o isi fo’i taimi na te taofi se vaega ae lafo mai i Amerika Samoa le isi vaega”, o le saunoaga lea a Bradley.

Ae na taua e Joseph e fa’apea, o tagata faila lafoga a le atunu’u o lo o pito sili ona pagatia i le mataupu lenei o le faila o lafoga i Amerika, aemaise lava pe afai e taofi e le tagata o lo o ia failaina le lafoga se vaega tele o le tupe, po o le taofi fo’i lea o le tupe atoa.

Na toe manatua e Joseph se taimi ua te’a ina ua la taumafai e le alii kovana sa i ai i lena vaitaimi o Togiola T. A Tulafono, e fa’amanino i le au totogi lafoga i le atunu’u e fa’apea, afai e le i maua se totogi o se isi i totonu o Amerika, e le tatau lava ona faila sana lafoga i Amerika, peita’i, e foliga mai lava o le to’atele o le atunu’u sa latou manatu mama i lea lapataiga.

Sa taua e se tasi sa galue muamua i le malo e fa’apea, atonu o se tasi o mafua’aga na mafua ai ona manatu mama tagata faila lafoga i le lapataiga lenei i le taimi ua te’a, e leai lava se tagata Amerika Samoa ua molia e le feterale i le faila o lana lafoga i fafo.

Sa ia taua fo’i e fa’apea, e ui lava e tuai gaioiga a le vaega su’esu’e a le feterale i le tau su’esu’eina o lenei mataupu, o le mea moni lava ia, e i ai lava le taimi e molia ai i latou nei.

O le amataga o le tausaga lenei sa tu’uina mai ai e le Teutupe a le malo ua tuumalo ia Dr. Falema’o ‘Phil’ Pili se fa’aaliga i le to’atele o tagata totogi lafoga a le atunu’u, o lo o faila a latou lafoga mo ni tupe maua i le IRS, ona o le naunau ia latou maua se vaega tupe tele mai le alagatupe lea e agava’a ai na o tagata faila lafoga i Amerika, le ‘Income Earned Tax Credit’, ae o lea fa’amanuiaga tau tupe e le agava’a ai Amerika Samoa ma isi teritori o le Iunaite Setete.

Na taua e le Pulesili fou o le Ofisa o Lafoga o lo o i ai nei ia Richard Jimmerson e fa’apea, e le gata ua tele tausaga o tupu mai pea lenei fa’afitauli, ae o le taimi nei, o lo o latou galulue fa’atasi ma le vaega a le FBI atoa ai ma le IRS, i le fetufaaina lea o fa’matalaga e uiga i lenei mataupu.

Na taua e Jimmerson e fa’apea, na pau lava le fa’amanuiaga tau tupe e agava’a ai tagata totogi lafoga a Amerika Samoa, e na o le ‘Additional Child Tax Credit (ACTC), lea o lo o fa’atupe mai e le IRS.

fa’aliliu Ausage Fausia