Ads by Google Ads by Google

Amata polokalame fu’a i le malae Su’iga’ula i Utulei

O suiga mo polokalame o le fu’a o lenei tausaga, e aofia ai le avea o le malae o le Su’iga’ula a le Atuvasa i Utulei o le nofoaga e amata ai polokalame o le fu’a mo le umi e tolu aso, ae o le sisiina o le fu’a e fa’ataunu’u lava i le malae o le Veterans Stadium i Tafuna, i le aso Tofi, 17 Aperila, 2014 i le itula e 9:00 i le taeao.

 

O le aso 13 Aperila, o le aso Sa lea ua fa’atulaga e tatala aloaia ai polokalame o le fa’amanatuina o le 114 tausaga o le fu’a a Amerika Samoa i se sauniga lotu, e faia i le malae i Utulei, e pei ona fa’amaonia mai e le afioga i le Kovana le tumau ia Lemanu Peleti Mauga.

 

O le aso Gafua e sosoo ai e oo atu i le aso Lulu, 14-16 Aperila ua fa’amoemoe e faia ai fa’afiafiaga a au siva eseese i le malae lava i Utulei, ona fa’atoa oo atu ai loa lea i le aso ua fa’atulagaina mo le fu’a o lenei tausaga.

 

O aso fo’i ia e tolu o le a molimauina ai e le atunuu ni isi o suiga i le malae i Utulei, e le gata o fa’afiafiaga eseese o le a fa’atinoina ai, ae o le a maua ai fo’i ma le avanoa e molimauina ai taumafa o le a saunia e fale’aiga eseese ua lautogia mo lea fa’amoemoe.

 

E pei ona masani ai i le fa’amanatuina o le fu’a a Amerika Samoa i tausaga ta’itasi, e le gata e malaga mai ai ta’ita’i o atumotu o le Pasefika i le molimauina o lenei aso taua, ae le misia ai fo’i le malaga mai o ta’ita’i o le malo o Samoa, e pei o le Ao o le malo, le afioga a Tui Atua Tupua Tamasese, le afioga i le ali’i palemia ia Tuilaepa Aiono Sailele, faapea ai ma ni isi o sui o le malo.

 

O fa’afiafiaga faapitoa o le fu’a mo lenei tausaga e aofia ai pese ma siva mai le kamupani a le BlueSky ma le StarKist Samoa, o kamupani ia o lo o fai ma sui o kamupani tua i lenei fa’amoemoe, fa’apea ai le pese ua tapena i ai le afioaga o Pago Pago, ma le isi siva ua tapena i ai le afioaga i Vailoatai.

 

O le afioaga o Sa’anapu mai Samoa le valaaulia faapitoa ua fa’amoemoe e faafiafia i le fu’a o lenei tausaga, e pei ona tapena mai i le pese ma le siva.

 

Na taua e le Faatonusili o Paka ma Malaetaalo ia Maeataanoa Pili Gaoteote i le Samoa News e fa’apea, o le finagalo o le ali’i kovana, ia mafai ona siitia foliga vaaia o le malae i Utulei, e le gata o lo o fai ma taulaiga o tagata tafafao maimoa mai i le atunuu, ae o se suiga fo’i e fa’amatagofie ai Amerika Samoa.