Ads by Google Ads by Google

Amata Poloka Ofisa Leoleo mo le faamalosia tulafono luga o le alatele

O le itula e 6:00 i le taeao ananafi na amata aloaia ai le poloka faapitoa a le Matagaluega o le Puipuiga o le Saogalemu Lautele mo le lua vaiaso e faamalosia tulafono i luga o le alatele e pei o le fusi o le fusipa’u; nofoa mo le saogalemu o fanau laiti i totonu o le taavale; ave taavale ‘ona atoa ai ma le ave taavale saoasaoa.

 

O le poloka o lo o faatautaia e le Vaega o le Traffic Division a le Ofisa o Leoleo, i lalo o le taitaiga a Captain Muagututia John Cendrowski, lea na amata ananafa ae mae’a i le aso 2 o Iuni, 2013.

 

O lenei polokalame o lo o galulue faatasi ai le Matagaluega o Leoleo ma le vaega o le Puipuiga i luga o le Alatele a le Feterale (Federal Highway).

 

O se suiga i nei poloka, o le a le toe faia poloka masani e pei ona faatutu ai a latou faailoilo i vaega faapitoa o le auala e pei o luma o le CBT i Nu’uuli ma luma o le Evalani i Pago Pago, ae ua faaaoga vaega eseese o le auala e pei o Satala, Nu’uuli ma Iliili lea na maitauina ai pasika ma taavale a leoleo o lo o paka solo ai i le taeao ananafi mo le amataina o le latou.

 

Saunoa Muagututia e faapea, o le faia o poloka masani a leoleo o se gaioiga e le faatagaina i le tulafono. 

 

“O le autu o le polokalame lenei o le toe faamalosia lea o le saogalemu o tagata i soo se taimi, ina ia iloa e le atunuu o lo o faatinoina pea la latou tiute o le faamanatu atu lea o gaioiga e tatau ona faia i luga o le alatele i soo se taimi, ina ia taofia ai le tulai mai o ni faalavelave e ono maimau ai soifua o e pele i o tatou aiga,” o le saunoaga lea a Muagututia.

 

I le lua vaiaso talu ai na tulai mai ai ni faalavelave tau taavale na aafia ai ni tamaiti laiti se toalua, ma sa maitauina ai i ia faalavelave le le tausisia e ave taavale o tulafono e pei o le faaaogaina lea o nofoa mo fanau atoa ai ma le fusia o fusipa’u a fanau laiti.

 

“O le faalavelave muamua na aafia ai se pepe faatoa 6 vaiaso le matua, sa nononofo ma lona tina i le nofoa pito i tua o le taavale i le taimi na lavea ai le taavale, pau le itu e laki ai e le’i manu’a se vaega o le tino o lea alualutoto e ui e fai lava si matuia o le faalavelave na tulai mai,” o le saunoaga lea a Muagututia.

 

O le faalavelave lona lua na aafia ai se tamaititi e 8 tausaga le matua, ina ua lavea se taavale ma manu’a mitimiti ai o ia, ae na maua i ripoti e le’i fusia lona fusipa’u.

 

Sa i ai se polokalame na faatautaia e le Ofisa o Leoleo i ni taimi ua tuana’i, e maua ai e matua nofoa e faaaoga e fanau laiti i totonu o taavale e aunoa ma se totogi, ae talu ai ua le toe maua lea auaunaga, ua fautuaina malosi ai matua ina ia faatau ni nofoa mo fanau mai faleoloa i le atunuu, ina ia mautinoa ai lo latou saogalemu i soo se taimi e malaga ai i luga o le auala.

 

O se tasi o faafitauli o lo o maitauina pea i le atunuu e pei ona saunoa Muagututia i le taimi nei, seiloga lava e oo i taimi e faalauiloa ai poloka a le matagaluega o leoleo e faamalosia ai tulafono e pei o fusipa’u ona faatoa usita’i foi lea o le atunuu e faamau a latou fusipa’u.

 

“O le fa’amauina o lou fusipa’u o se galuega e tatau ona faia i taimi uma ma aso uma, soo se taimi e te oso ai i totonu o lau taavale, ia e manatua fusi muamua lau fusipa’u, e le o se matou galuega le faamanatu atu ia te oe e fusi lau fusipa’u, ae o ni isi taimi, a maua e leoleo se ave taavale e le o fusia lona fusipa’u, ona fai mai lea o le mau alofaga e faapea mai e a ma a, faamolemole, o le tulafono mo le fusiina o le fusipa’u e mo tagata uma e aofia ai tina ma’itaga ma tagata lapopo’a, ae le faapitoa mo na o se vaega o tagata,” o le fautuaga lea a Muagututia.

 

I le mataupu mo tamaiti e nonofo i tua o keli o pikiapu, na taua e Muagututia e faapea, o le isi lea mataupu o lo o tuu fesili i ai le toatele, peitai o le faafitauli o lo o i ai, e le o i ai se tulafono e faasa ai ona tietie fanau laiti i tua o keli o pikiapu i le teritori, e ui e le o faatagaina i le setete lata mai o Hawaii ma totonu o le malo tele lea tulaga.

 

O le taimi nei, o lo o galulue faatasi le Matagaluega o Leoleo ma le Ofisa o le Loia Sili mo le tuu faatasia o se tulafono e puipuia ai fanau mai le nonofo i tua o keli o pikiapu, ma le faamoemoe e tuuina atu i luma o le Fono Faitulafono pe a maea ona tuu faatasia lea tulafono mo sa latou faaiuga.

 

Saunoa Muagututia e faapea, e ui o taavale pikiapu e faalagolago tele i ai aiga Samoa mo taimi o faalavelave atoa ai ma le faiga o galuega ma feau, peitai e le taofia ai le galuega lelei e tatau ona faia, o le puipuia lea o le saogalemu o fanau laiti atoa ai ma soo se tagata.