E tasi lava le vaega o lo o pito sili ona tulimata’i i ai le silasila a le toatele o le atunuu, aemaise lava i latou sa lagolagoina le faamoemoe o le afioga i le Kovana Sili ia Lolo Matalasi Moliga, ma le afioga i le Lutena Kovana ia Lemanu Peleti Mauga, o le vaai lea i suiga ua leva ona valoia mai, a’o le’i taitai taunuu mai i lenei faamoemoe.E ui e na o le tolu tofiga ua maea ona faalauiloa e le tofa a Lolo ma le afioga a Lemanu mo le la nofoaiga fou, peitai na taua e ni isi i le Samoa News, ua lava tofiga ia ua faalauiloa mai e atagia mai ai, ua amata ona vavala mai suiga sa folafola e Lolo ma Lemanu i le atunuu.“Ou ke fia vaai a’u i gisi suiga kekele i le kele o Makagaluega a le malo faapea ai Ofisa ku maoki, ua kakau oga sui uma kagaka lakou ke faakaukaiga Ofisa gei o le malo, o iiga o lo o i ai le maguia o le akuguu,” o le saunoaga lea a se tasi o tama matua e malaga mai i le itu i le Falelima i Sasa’e sa auai i le aso o le faatautoina o Lolo ma Lemanu mo le tofi kovana ma le lutena kovana.E tolu Ofisa na lisi mai e le tama lea e fia vaai ai i ni suiga lelei ma le manaia, ma o is matagaluega a le malo, o ni isi ia o matagaluega taua e pei o le Ofisa o Tupe, Ofisa pulea tagata faigaluega ma le Ofisa o Femalagaaiga.Ina ua maea ona faalauiloa e le tofa Lolo le Komesina o Leoleo ma le Failautusi o le Ofisa o Mataupu Tau Samoa i le faaiuga o lana ulua’i saunoaga faa kovana, na vaaia ai foliga vaaia o ni isi o le atunuu e pei e le talitonu.E toalua isi leoleo na fesiligia i ni o la manatu e tusa ai o le komesina fou lea ua filifilia mo le isi 4 tausaga, sa lue lue ulu o le au vaega lea ma faailoa mai i o la lima matua le saini o le “manaia” pe “lelei foi” e aunoa ma ni upu na talanoa mai ai.O ni isi o Ofisa o le malo o lo fia vaaia e le atunuu ni suiga, o le Ofisa o le ASPA atoa ai ma le Ofisa o Faatoaga.Na taua e le afioga i le alii Kovana Sili ia Lolo Matalasi Moliga i lana uluai saunoaga faa kovana e faapea, afai o le autu o lenei faamoemoe o le faia lea o ni suiga, ua la sauni ma le afioga i le Lutena Kovana ia Lemanu Peleti Mauga mo ia suiga.Pau le itu e ao ona malamalama i ai le atunuu, e i ai tagata o le a le fiafia i suiga, peitai e mafua ona fai suiga i soo se malo, e le gata ia manuia ai le atunuu a ia manuia ai foi tagata uma.