O le vaiaso nei lea na amata la’u ai uta a ni isi o Matagaluega a le malo mo le amata fausiaina lea o galuega mo le faaleleia o atina’e i Manu’a, e pei ona malilie i ai le kovana sili ma faatonusili o matagaluega ma ofisa a le malo, i le mae’a ai o sa latou asiasiga i Manu’a i le vaiaso na te’a nei.

O le malaga a le MV Sili i le aso Gafua na te’a nei na vaaia ai le tele o uta mo mea faufale mai le Matagaluega o Galuega a le malo sa la’u i Manu’a, atoa ai ma ni isi o uta mai le Matagaluega o Faatoaga e pei o tiapula ma laau ola ua la’u e toto i Manu’a.

I se talanoaga ma le Faatonusili o le Matagaluega o Galuega a le malo ia Faleosina Voight i le taeao ananafi, na faamaonia mai ai e le tamaitai faatonu le auina atu o ni isi o uta a lana matagaluega e faatino ai galuega i Manu’a.

Fai mai Faleosina, o le uta a lana matagalueuga ua auina atu i Manu’a e aofia ai taga sima mo le fausiaina o le auala i Ta’u, atoa ai ma ni isi o mea faufale e amata ai ona fausia ofisa e pei ona finagalo i ai le alii kovana.

Ina ua fesiligia pe o i ai se faamoemoe mo le auina atu o ni ana tagata faigaluega e faaopoopo i lana aufaigaluega o lo o galulue i Manu’a, e fesoasoani i le faatinoina o galuega nei, na saunoa Faleosina e faapea, “o lo o lava tagata faigaluega o lo o faatinoina galuega i Manu’a mo le taimi nei, ae afai lava e i ai se manaoga e tula’i mai i se taimi o i luma, o le a toe vaavaai i ai le Matagaluega.”

Na na taua e le Sui Faatonusili o le Ofisa o Faatoaga ia Peter Gurr e faapea, e silia i le 400 tiapula ma laau ola e pei o tipolo ma koko ua auina atu i Manu’a i le malaga a le MV Sili i le vaiaso nei, mo le faamoemoe e faasoa i Ofu ma Olosega atoa ai le Faletolu i Ta’u, Faleasao ma Fitiuta, ina ia fesoasoani ai i le unaia o faatoaga i le itumalo o Manu’a.

“E na o laau ma tiapula na ave i le malaga a le vaa i le vaiaso nei, ae o lo o i ai le faamoemoe o se taimi o i luma o lo o fuafua e auina atu ai ni tagata faigaluega e fesoasoani i le aufaigaluega o lo o i ai i Manu’a, ae faatoa faamautu tulaga na pe a toe taliu mai le malaga a le Faatonusili mai fafo,” o le saunoaga lea a Peter.

O le po nanei lea ua faamoemoe e toe taliu mai ai i fanua le faigamalaga a le afioga i le faatonusili o le Ofisa o Faatoaga ia Lealao M. Purcell, lea na ia tuua le teritori i le aso Tofi o le vaiaso na te’a nei, ona o ni isi o fuafuaga e aofia ai ma sa latou fonotaga ma sui o le Ofisa o Faatoaga a le malo tele, le USDA, mo le faamautuina o ni isi o mataupu aua le atina’e ma le faaleleia o faatoaga i Amerika Samoa.

I le ulua’i malaga a le alii kovana sili mo Manu’a i le vaiaso na te’a nei, lea na latou asia ai ma sui o lana kapeneta motu ta’itasi o Manu’a, na maua ai le avanoa e auina atu ai e le Ofisa o Faatoaga tiapula e 400 ma koko ola e 100, mo le faamoemoe e toto i totonu o Manu’a.

Na faamaonia e Lealao i le Samoa News a’o i ai i Manu’a, o tiapula ia ua amata ona la’u atu i Manu’a o le ituaiga o le ‘Samoa 1 ma le Samoa 1’, o talo lelei ia o lo o taatele i Samoa i le taimi nei.

E ese mai i tiapula ae ua finagalo foi le alii faatonu e la’u le koko ma isi ituaiga laau e toto ma faaola i Manu’a, ina ia amata ona toe una’i tagata e toto faatoaga i Manu’a.

Na faaalia e le kovana sili a Lolo Matalasi Moliga i faatonusili ao i ai i Manu’a e faapea, o faatoaga le isi alagatupe e sili ma vave mo aiga Manu’a, a’o taumafai le malo e toe faatulaga lelei lona atina’e ma le tamaoaiga i le taimi nei.

Saunoa Lealao, o lo o i ai le faanaunauga afai ae tulaga lelei faatoaga i Manu’a, e maua le avanoa e la’u mai ai i Tutuila e faatau ai i le maketi po o le polokalame a le School Lunch.