Ads by Google Ads by Google

AMATA LIKI KIRIKITIO O LE FU'A

I le aso ananafi na toe usuia ai le fono a le mamalu o le Ofisa Tau Samoa, le Afioga i le fa'a-Tui o Lefiti Pese, le Failautusi o Mata’upu Tau Samoa, ma le tofa i le tau To'oto'o o Nanai Afuola, ma le tofa i le Ta'ita'i Komiti o le tausaga nei o le Tofa ia 'Aau, ma lona lagolago le Tofa ia Mui.

Sa fetalai le tofa ia Nanai Afuola, e laulau uma mai tulafono ua tasi i ai le komiti o le liki o lenei tausaga,

 (1) Tolu faiaina a le 'au ma malolo.

 (2) A toe va'ai loa se 'au e 'ese mai ai le kapeteni latou kapeteni, ua tautala tele, ona avatu lea i luma o le falei'e, e fai ai se i’uga.

 (3) So 'o se tagata lava e na te fa'aalia na uiga le mafaufau i le taimi o le ta'aloga, o le a fai loa i ai le I’uga o le komiti, 1-fa'ate'a ‘ese ma le ta'amilosaga. 2- pe, te'i ua afaina ai uma le 'au.

 (4) E le mafai e se tagata na ta'alo i se isi 'au ona toe fa'aaogaina i se isi 'au, tusa pe na o le tasi le nu'u ae lua 'au kirikiti, o le mea lava e tasi.

Na saunoa le Afioga i le fa'a-Tui, Lefiti Pese, "O le mea nei o le kirikiti e faia pea e tupulaga o afio’aga ma alalafaga mai i aso ia, a'o lenei e fa'aauau pea e lenei tupulaga i o'o mai i le vaitaimi nei. Mea lea ou te fa'amalo ai ia te'i latou o fai lenei fa'aaga-tama ma mea e fiafia i ai, va'ai i le vaitaimi lenei, ua amata ona ta'aalo tupe tagata, e mafaufau fo'i le i isi atunu'u i le kirikiti palagi, ua amata ona fa'atau o tama ta'aalo." saunoa le Afioga ia Lefiti, "A'o lo tatou atunu'u, o lea lava e fai lava i le taimi nei o Fu'a, mea ua masani ai Samoa, e fai ma le fiafia le mea nei o ta'aloga, i le ava fatafata ma le tausa'afia. Pau lava le mea e fautua ai, o le ta'aalo fa'atamali'i ma le ta'alo fa'atausala, aua nei oia le va, po 'o le a le mea e i'u ai le ta'aloga, e toe 'oso fo'i le la. O le malo po 'o fea o i ai, a'o le fealofani o le mea lea e pito sili ona fia matamata i ai le atunu'u."

Na mae'a loa le saunoga a Lefiti, ona si'i lea o lima o isi kapeteni e talosagaina le mamalu o le Ofisa Mata’upu tau Samoa, e manana'o i ai e sui mai le tolu faiaina ona malolo lea o lena 'au i liki. Na fa'atu mai e le isi kapeteni o le 'au o Pago 'Aeto le (5) lima, fai mai o ia, "E manatu fo'i i le vave tele ona malolo mai o isi 'au, pe afai o le tolu ma malolo pea ona fai ai la outou Komiti mamalu, ae tagataga'i fo'i, ua le toe faigofie le sa’iliina o tupe e nei onapo, e tau su'e se tupe e fa'aulu ai, ona o le to'atele o tagata e fiafia i lenei ta'aloga e le faigaluega uma, o lea la ua ou tula’i atu, e a pa'e tu'u i le lima fa'amolemole."

Na tula'i le tasi kapeteni a le Lupelele #2, "O a'u ou te mana'o i le fa (4) faiaina, ona o lenei, e i ai 'au e o'o i le tolu faiaina ona te'i lava lea ua fa'apeapea atu ai lava ona ua mautinoa e latou 'ia, o le toe aoga ua tolu faiaina, ae afaina ai isi 'au ua o mai i pasi, ua mao mai a'o o le totogi fo'i o pasi latou ia. O le mea lea ou te fa'atuina le (4) fa, faiaina, ma le fa'aaloalo lava."

Na fai le palota ma manumalo ai le (4) fa o faiaina, ona malolo lea.

Na tula'i fo'i le sui o le 'au a tama’ita’i Masefau ma ua fai mai ai, o la latou 'au e le toe fa'aigoaina o le 'Mosiula' a'o finagalo le mamalu o tina ma teine, o le 'a fa'aiogaina nei o le 'Aloi-i-afi'.

E sefulu ono 'au a ali'i ae tolu lava 'au a tama’ita’i, e lei iloa se aso o le amata ai ta'aloga a tina, ae o le a amataina i le aso liki a tane, i ta'aloga nei e lua o le Mosi'ula mai Masefau ma le Fetu lele #2, ma le ta'aloga lona lua, o le 'Lega' mai i Poloa ma le siamupini o le tausaga 2011, le Fetulele #1.

Ona fa'asolo ai lea o ta'aaloga ta'itasi i aso uma o le vaiaso atoa ia se'i maua ai 'au e fa e sa’iliina le siamupini o lenei tausaga.

Ma na mae’a loa ona fetalai mai le tofa ia Nanai Afuola, "O le se'iga o tatou pepa, o le sui i lenei tausaga, o le ta'aalo le 'au na muamua ona fa'aulu, ma le 'au na mulimuli mai ona fa'asolosolo lava lea."

O 'au nei a tane: (1) Mosiula - Masefau, (2) Lega - Poloa #1, (3) Lega -  Poloa #2, (4) Manu'ula - Vatia, (5) Lupelele - 'Ili'ili #1, (6) Lupelele - 'Ili'ili #2, (7) Eagles- Pago #1, (8) Eagles- Pago #2, (9) Pisisami - Vaitogi #1, (10) Pisasami - Vaitogi #2, (11) Sinapati - Tafuna, (12) Mua'au - Faleniu #1 (13) Mua'au - Faleniu #2, (14) Fetulele - Tula #1, (15) Fetulele - Tula #2, (16) Alofau.

Au a tama'itai: Teine o le 'Aloi-i-afi mai Masefau (2) Teine o le Manuula mai i Vatia, (3) Teine o le 'Pago Girls' mai i Pago Pago.