Ads by Google Ads by Google

AMATA LE PISINISI TALITANE I TAMA’ITA’I E TO’ALIMA

APIA, SAMOA - O le mataupu lea o loo tuuaia ai se ulualii mai Samoa i lo la amataina lea o se la pisinisi talitane e ala i le faaaogaina o ni tamaitai talavou se to’alima, ua iloiloina nei e le Faamasinoga Faaitumalo i le vaiaso nei.

O le ulugalii o loo tuuaia e le malo i lenei mataupu e aofia ai le fafine o Metala James ma Sanele Sanele, ma o loo tuuaia i laua i moliaga ta’i 13 e aofia ai le faaaogaina o tamaitai i faiga faatalitane e le tusa ai ma ala o le tulafono.

I se faatalatalanoaga ma le Sui Komesina o le Matagaluega a Leoleo ma Falepuipui i Samoa ia Leaupepe Fatu Pula sa ia faamaonia mai ai i le Samoa News e faapea, o loo faagasolo i le taimi nei iloiloga e faatatau i le mataupu lea, ma e le’i maua mai se faaiuga i le taimi nei.

“E ese mai i le mataupu lea i le isi mataupu lea na e fesili mai ai i le vaiaso na te’a nei i niu faiga faatalitane o loo faia i Motootua, ae o le mataupu lea ua tuuaia ai le ulugalii lea, o loo tuuaia sa faataunuuina lea i nisi o faletalimalo i le taulaga i Apia,” o le saunoaga lea a Leaupepe.

Na taua e Leaupepe e faapea, o loo tuuaia e tamaitai na aafia le ulugalii lenei i lo la faaaogaina lea o i latou i faiga faatalitane, e aunoa ma se tupe sa o latou mauaina.

“O nisi o feusuaiga (tulou) sa faia e alii Saina faasaga i tamaitai nei sa faia lea i totonu o faletalimalo, ae o isi feusuaiga sa faaaoga i ai lalo o laau ae o loo matamata i ai le fafine (Metala) o loo tuuaia i lenei mataupu,” o le saunoaga lea a Leaupepe i le Samoa News.

O tupe e totogi e alii Saina ia Metala mo faiga faatalitane e amata mai i le $20 e oo atu i le $50, peitai o nei tupe uma e faaaoga uma e Metala, ae leai se tupe e oo i tamaitai o loo faaaoga i le la pisinisi.

E ese mai i le mataupu lea ua faagasolo lona iloiloina i luma o le faamasinoga, o loo i ai foi isi ripoti i se isi foi pisinisi talitane o loo faia i Motootua i se fale tuufua o loo sosoo ma le fale o le Ao o le Malo, peitai na taua e Leaupepe, e le’i oo atu ni ripoti e uiga i lenei mataupu sei vagana ai tala o loo feavea’i e nusipepa.

O tala e faatatau i pisinisi talitane i Samoa na amata alia’e mai i le tausaga e 2007, ma o nisi sa molia i luma o le faamasinoga e aofia ai tamaitai ma ni fafine o loo fai a latou ta’ito’alua, ae mo Amerika Samoa nei, talu lava le mataupu lea na alia’e mai i Pago Pago i le 2007, lea ua mafua ai ona faafalepuipui e le feterale se ulugalii mai Asia i lo la faatautaia o se pisinisi talitane, e lei toe faalogoina lava le upu lea i le teritori i le taimi nei