Sa fa’ateia nisi i le afioaga o Fitiuta i Manu’a ina ua vaaia le va’alele a le Tausani Airline i le malae vaalele i Fitiuta i se vaitaimi lata mai nei. Ma o le fesili ua tula’i mai pe o afea e amata ai faigamalaga a le Tausani Airline i le va o Tutuila ma Manu’a.

Ina ua fesiligia e le Samoa News, sa fa’amaonia mai e Filifa’atali Mike Fuiava, peresitene o le Tausani, e faapea ua faalua ona faia malaga faata’ita’i a le vaalele lea e faaaoga mo faigamalaga a le Tausani.

E pei ona lipotia muamua e le Samoa News o le va’alele lea a le malo - sa taua muamua o le Segaula - ua lisi atu i le Tausani mo malaga i le va o Tutuila ma le Manu’atele.

Taua e Filifaatali e faapea o lo’o i ai lona faamoemoega e fono i se aso lata mai ma sui o le vaega fetarale o le FAA e talanoaina le tulaga o lo’o i ai le vaalele mo faigamalaga mo Manu’a.

Ua faailoa mai foi e Filifaatali e faapea e toalua pailate sa faafoeina fa’ataitaiga o le va’elele ae o le taimi nei o lo’o galulue pea i latou ina ia maua se faatagana mai le FAA e mafai ai ona amata malaga a le Tausani Airline.

I le taimi nei o lo’o faamoemoe le Tausani Airline e faaoga le laisene a le kamupani vaalele o le Freedom Air mai Guam e amata ai ana faigamalaga.  Ma o le Freedom Air o lo’o galulue faatasi ma le Tausani Airline.

O le autu o taumafaiga a le Tausani Airline, e pei ona taua e Filifaatali, ina ia tumau ona i ai faigamalaga o va’alele mo Manu’a.

Ua ma’ea ona faatulaga ofisa o le Tausani Airline i le malae vaalele fa’avaomalo i Tafuna. Ua faaaoga e i latou ofisa sa lisi i le Inter Island Airways, o se kamupani va’elele Amerika Samoa, ae ua tele masina ua le to’e i ai ni ana malaga ma e le o mautinoa se tulaga i lea kamupani va’alele.

Talu ai ona e leai se kamupani va’alele Amerika i totonu o le teritori e agava’a e tautua Manu’a i le taimi nei, o le mafuaaga lea ua faatagaina ai e le Matagaluega o Feoaiga a le fetarale le Polenisia e tautua Manu’a - i le malae va’alele o Ofu ma Fitiuta.