Ads by Google Ads by Google

Amata Fa’amasinoga Le Sa Avea - Palemia Isalani

Saunoa le sa avea ma Palemia o Isalani, Geir Haarde, sa ia faia lava na’o mea sa ia manatu e silisili mo Isalani.

E ui la i lea saunoaga, ae o lea ua amatalia lona iloiloga i luma o le Fa’amasinoga i Reykjavik. O moliga o lo’o fa’asaga ia te ia, o lona le anoanoa lea o le tulaga fa’aletonu o le tupe a le Malo i le tausaga e 2008.

O le Geir Haarde, o le ulua’i palemia lea ua fa’asaga ia te ia ni moliga tau le tupe fa’asoa a lona malo i le lalolagi atoa. O lo’o te’ena fo’i e ia lenei moliga e fa’asaga ia te ia, ma ua ia saunoa mai, e iloa lelei lava e lona tagata tautua i le atunu’u, o le a tele lava sona lagona o’otia i le taimi atoa o le a fa’atautaia ai le fa’amasinoga lea.

Ua fa’ailoa mai, o le taimi o le nofoa’iga a lenei Palemia, sa matua mumu fa’asolo atoa ai Faletupe e tolu a le malo Isalani, ona o le fa’aletonu tau le tamaoaiga o le atunu’u, o le tulaga fa’aletonu o le Icesave na matua o’otia ai uma le faitau afe o aiga i totonu o le atunu’u.

E ese mai lea, ae na i ai ma fa’aletonu i feutaga’iga i le va o Isalani ma Peretania e afua mai lava i le fa’aletonu o le tamaoaiga o le atunu’u, ma e le o toe fa’aleleia lava nei tulaga i le va o malo e lua e o’o mai i le taimi nei.

Ua fa’ailoa mai e amatalia iloiloga i le fale fa’amasino o Fanua o lea malo, Landsdomur, ina ia mua’i mautu ni fa’amaumauga o le fa’amasinoga o le Palemia e mulimuli mai i Reykjavik.

O lo ua fa’ailoa mai o nisi tagata o Isalani o lo’o latou fai mai o le fa’amasinoga o le Palemia ua na’o sina faiga fa’apolokiki e fa’ailoa mai ai na’o nai mea, ae le o se mea tele e mafai ona soloia ai ni afaina tau le malo ua i ai i le taimi nei. Ae o nisi ua latou fa’ailoa o latou lagona, ua alagatatau lea fa’amasinoga se’i manino ai nisi o mea o lo’o fia mautinoa e le Malo mai le ali’i palemia sa gafa ma le tamaoaiga o le atunu’u i lona taimi ua leaga tele.

Ua fa’ailoa mai, o le malo o Isalani sa matua afaina lava lo latou tamaoaiga ma o’o ai ina pe o latou faletupe tetele e tolu i le atunu’u e aofia ai Faletupe na tula’i mai ai le Icesaves, le faletupe lea o le Landsbanki i le tausaga 2008.

O Geir Haarde, 60 tausaga le matua, sa avea ma Palemia o le Faigamalo i lea taimi. Ua tu’ua’ia nei o ia i lona fa’atamala ma lona le magafagafa lelei o le fa’asoaina o le tupe a le Malo, peita’i, o lo’o ia te’ena lava nei tu’ua’iga uma e fa’asaga ia te ia. O lana tala, e leai ni fa’amaumauga aloa’ia sa ia le va’ai toto’a i le afaina o le tamaoaiga o le atunu’u.

O le fa’amasinoga lenei e fa’ato’a mae’a i le fa’aiuga o Mati, ae o lona fa’ai’uga e fa’ato’a maua mai po’o le fa i le ono vaiaso mulimuli mai.

saunia: Leua Aiono Frost