Amata fa’amasinoga autu susuga Michael Sala

O le taeao ananafi na amata aloaia ai le faamasinoga iloilo o le sa avea ma Faatonusili o le Matagaluega o le Puipuiga Faalotoifale a le teritori, le susuga Michael Sala, ona o tu’uaiga faasaga ia te ia, e afua mai i le faalavelave o lo o tuuaia o ia na ia so’aina ai se alii a’o savali i luga o le auala i le masina o Ianuari 2013.

 

O le faamasinoga autu a Sala o lo o iloiloina lea e le afioga i le alii faamasino sili lagolago ia Lyle L. Richmond, ae o le alii loia ia Marcellus Talaimalo Uiagalelei o lo o tula’i mo le itu a le malo, ma le susuga ia David Vargas o lo o tula’i mo le ua molia.

 

I faamaumauga a le faamasinoga o lo o taua ai e faapea, i le aoauli o le aso 22 Ianuari, 2013 pe tusa o le itula e 1:00, na tula’i mai ai se faalavelave e latalata i Laulii, ina ua so’a ese taavale se ali’i pe a ma le 20 tausaga sa savali i luga o le auala ma manu’a ai.

 

O lo o finau malosi le malo i luma o le faamasinoga, o le susuga a Sala na faafoeina le taavale na mafua ai ona manu’a le alii na aafia, peitai o lo o teena malosi e le ua molia nei tuuaiga.

 

E tusa ai ma faafinauga a le malo, o lo o taua ai e faapea, sa inu pia Sala i le taeao o le aso 22 Ianuari, 2013, a’o le’i tula’i mai le faalavelave e pei ona molia ai o ia.

 

O se tasi o molimau na valaau e le malo e molimau i le amataina o lenei iloiloga ananafi, o se tamaitai e faigaluega i le Fale Talimalo o le Sadies by the Sea i Utulei, lea sa ia faailoa i le faamasinoga e faapea, i se taimi o le aso 22 Ianuari, 2013 a’o tiute i le Faleaiga, le vaega o lo o faatau atu ai le ‘ava malosi (bar), sa ia vaaia ai Sala ma lana paga ua ulufale atu i totonu o le pa pia, ona oka lea e Sala o la mea inu ma lana paga.

 

Na taua e le molimau, e lua mea inu sa oka e Sala i le taimi a’o tiute ai i totonu o le pa pia i le taeao lea, o mea inu e taua o le (double shot of Bloody Mary), ae sa i ai foi isi mea inu sa oka e Sala i le isi tamaitai faigaluega sa sui ia te ia o Joanne lona igoa, ina ua alu i se fonotaga sa faia i le potu fono a le fale talimalo o lo o i le foga fale i luga o le fale.

 

Na manatu le malo latou te valaauina le isi tamaitai faigaluega o le Sadies by the Sea sa tiute i le taeao lea, o ia lea o Joanne, peitai ua malaga o ia i fafo ma le atunuu, ma ua le mafai e le malo ona maua se fesootaiga ma ia.

 

O le isi molimau na valaau e le malo e molimau mo le latou itu, o le alii leoleo ia PSO II Fale Mareko, lea sa tiute i le aoauli na tulai mai ai le faalavelave i le itu i Sasa’e o le motu.

 

Na taua e Fale e faapea, a’o ti’eti’e atu i la pasika leoleo ma le isi alii leoleo e aga’i atu i Onesosopo Park, sa la vaaia ai se sipi leoleo lanu uliuli o paka mai se bus stop i Tafananai, lea e sosoo atu lava ma le paka i Onesosopo, ma sa faailoa atu e se alii leoleo o lo o tu ai i le vaega na tula’i mai ai le faalavelave, o lo o i ai se tamaititi o lo o manu’a, fai mai sa so’a e se taavale a’o kolosi i luga o le auala, ae le o iloa po o le ta’avale a ai.

 

Na taua e Fale i lana molimau e faapea, sa fesili i le alii na lavea e igoa ia Clinton i le mea sa tupu, ma faamatala atu ai loa e faapea, o ia na so’a e se pikiapu a’o savali mai i luga o le a’ega i Laulii, ma o lea pikiapu e lanu uliuli o lo o aga’i i le itu i Sasa’e o le motu, ma le numera o le laisene o le 7318.

 

A’o faagasolo le molimau a le alii leoleo, na faauilavea le loia a Sala ma finau e faapea, e le tatau ona faaaogaina ni molimau faalogo i le mataupu lenei, aua e le’i i ai le leoleo i le taimi na tupu ai le faalavelave, sei vagana ai faamatalaga a le alii na lavea o lea ua molimau mai ai.

 

Talu ai e le’i i ai le alii na manu’a i le faamasinoga ananafi, na mafua ai loa ona talia e le faamasinoga se talosaga a le malo ina ia faamalolo le fofogaina o le mataupu, ae se’i tau saili mai nisi o molimau a le malo, e aofia ai ma le alii sa manu’a, ina ia faa faigofie ai lenei mataupu.

 

O lo o faagasolo pea iloiloga o lenei mataupu i luma o le faamasinoga maualuga i le taimi nei.

Comment Here