O le aso a taeao lea ua fuafua le pulega a le falemai o le LBJ e amata ai ona faamalolo tagata faigaluega mai a latou galuega, i le mae’a ai lea ona tuuina atu i ai e le pulega o ni tusi faaali e faailoa i ai lea fuafuaga.

I se ripoti na maua e le Samoa News na taua ai le ova atu i le toa 200 tagata faigaluega ua fuafua e faamalolo mai a latou galuega, lea e aofia ai ni foma’i pe tusa ma le to’a 23 (physicians, silia i le to’a 60 tama’ita’i foma’i (nurses).

Na faamaonia e le afioga i le alii Senatoa ia Fuata Dr. I’atala, o ia fo’i o se foma’i o loo faaauau pea ona galue mo le LBJ i luma o le Senate i le taeoa ananafi, o le taeao a taeao lea ua faalauiloa mai e le LBJ e amata ai ona faamalolo pe vaea tagata faigaluega.

Na faailoa e Fuata i luma o le maota maualuga e faapea, o le faaiuga lea ua faia e le pulega a le LBJ, ua lagona ai le faanoanoa o le loto, ona o lea lava ua o’o lenei faafitauli i ona taunuuga matuia.

Ina ua fesiligia e le Samoa News na saunoa ai Fuata e faapea, e le o mautinoa pe toa fia le aofai o tagata faigaluega ia o le a vaea i le aso Faraile nei, na te le o iloaina foi pe toa fia le aofai sa’o o fomai o le a vaea, pau lana saunoaga, e ono sili atu i le toa 23 e pei ona taua i le ripoti

E lei auai le alii Senatoa i le fonotaga a fomai lea na faia i le taeao ananafi, peitai sa ia taua, ina ua latou feiloai ma nisi o fomai i le po o le aso Lua na te’a nei, sa ia vaaia ai foliga le mautonu o nisi o i latou, lagona faanoanoa atoa ai ma le tele o fesili o loo tuu fesili ai le toatele, pe aisea ua tulai mai ai lenei faafitauli.

“O ni lagona faanoanoa ma le le mautonu na oo i le toatele o i latou nei, e oo lava foi ia te a’u, ona o lea o le a afaina a latou galuega sa tauto e tautua ai mo le atunuu,” o le saunoaga lea a le alii Senatoa ia Fuata.

Saunoa le alii Senatoa, e foliga mai e amata faagasolo atu lava i le aso Faraile nei le vaeaina o tagata faigaluega seia oo atu i le aso 19 Fepuari lea ua taua i le tusi na tuuina atu e le pulesili o le falemai i tagata faigaluega.

Na taua e le alii o Michael Gerstenberger i lana tusi sa tuuina atu i se tasi o tagata faigaluega a le falemai, “o lou aofia ai i le faaiuga e vaea mai lau galuega o se fuafuaga sa faavae mai lea i luga o tulafono ma taiala o loo faafoe ai tagata faigaluega a le falemai, ae le faapea o le tulaga sa i ai lau tautua poo le taua foi o oe ma lau galuega mo le falemai.”

Fai mai Gerstenberger i lana tusi i tagata faigaluega, o lenei faaiuga ua faia ona o le faafitauli tau tupe ua feagai nei ma le falemai. Na taua e le Taitaifono o le Komiti Faafoe a le falemai i lana tusi i le alii kovana, e ono le mafai e le LBJ ona totogi ana tagata faigaluega atoa ai ma pisinisi o loo aitalafu ai pe a oo atu i le aso 22 Fepuari.

Saunoa Fuata, e le mafai ona galue toatasi na o se fomai e aunoa ma le i ai o teine fomai latou te fesoasoani i le faatinoina o isi galuega e pei o le fuaina o le fiva, sueina o le toto, siaki le tata o le fatu ma tuu faatasi faamatalaga uma e uiga i le gasegase.

“E taua tele le i ai o se teine fomai na te faia isi galuega e fesoasoani ai i le fomai, aua afai o le tulaga lea o le a i ai, o lona uiga o le a tele galuega e faatino e le fomai, ma i’u ina tula’i mai ai se isi faaletonu e ono aafia ai se faaiuga e fai, ma ono aafia atu ai ma le gasegase, ma i’u atu ai loa i se isi tulaga e pei o le faila e le gasegase o se tagi faasaga i le fomai ma le falemai, e mafua mai ona o le tautua sa faaletonu ona fai, ae le iloa na mafua ona faaletonu ona ua tele tiute ua faatino e le fomai,” o le saunoaga lea a le  alii Senatoa.

Na asia e le Samoa News le nofoaga autu o le falemai o le LBJ i le taeao ananafi pe tusa o le 7:30 e oo atu i le 8:30 i le taeao, ma vaaia ai le to’a filemu o mea uma, e tau leai foi ni tagata na aga’i atu mo le vaaia o se foma’i.