Amata fa’aitiitia pili a le LBJ i le masina fou

O le aso 1 Aperila lea ua fuafua le Pulega o le Falema’i i Fagaalu, e amata fa’aitiitia ai pili e totogi e le atunuu i le falema’i pe a vaai le foma’i, e pei ona fa’amaonia e le ta’ita’ifono o le Komiti Fa’afoe ia Mase Akapo i luma o le komiti o le Soifua Maloloina a le maota o sui i le aso Faraile na te’a nei.

 

O le pili e $20 o lo o totogi e le atunuu pe a fia vaai le foma’i o le a faaitiitia i le $15.

 

Ina ua fesiligia e afioga i faipule le tofa a Mase e faatatau i le faaitiitia o pili a le falema’i, na saunoa ai le taitaifono e faapea, toeititi lava mae’a gaioiga a le pulega o le falemai ma le komiti faafoe mo le tuu faatasia o se latou ripoti e faatatau i lea suiga, ma le faamoemoe a mae’a ona tuuina atu lea i le alii kovana.

 

O le fonotaga a le Komiti Faafoe i le aso ananafi e pei ona saunoa Mase na faamautuina ai ni isi o vaega o lea ripoti, ma tuuina atu ai loa i le ali’i kovana mo sana faaiuga.

 

E ui na faafetaia e ni isi o faipule le fuafuaga e faaitiitia ai pili a le falema’i, ae mo le alii faipule mai le itumalo o Tualauta ia Larry Sanitoa, e le o lona finagalo lea e faatatau i lenei mataupu, ona o lo o i ai lona popolega i avea le vave vave o le falema’i i le faamamaluina o lea suiga ma itu e aafia ai tulaga o tupe maua a le falema’i.

 

Saunoa Sanitoa e faapea, a’o le i faamautuina e le pulega tuai a le falema’i ua mavae atu le suiga i pili ua i ai nei e pei o le $20, sa latou galulue faatasi ma le faigamalo atoa ai ma le fono faitulafono, e iloilo ma vaavaai i se tupe e gafatia e le atunuu ona totogi i lena vaitaimi, atoa ai ma se alagatupe e ono mafai ona fesoasoani ai i le atina’eina ma le faaleleia o le auaunaga a le falema’i.

 

“O le $20 e pei ona totogi e le atunuu i le taimi nei i le falema’i, o le tupe lea sa manatu le falema’i ma le fono ua talafeagai ma gafatia e le atunuu ona totogi, ae afai o lea ua outou vave vave e fai le faaiuga e toe aveese le isi $5 o le tupe lea, ona ou popole ai lea, ina ne’i mae’a atu le isi 6 masina ae outou toe o mai i le fono ma faapea mai ua sese la outou faaiuga ua fai,” o le saunoaga lea a Sanitoa.

 

Na faamanino atili e le alii faipule lona finagalo ma ia taua ai e faapea, e tatau i le falema’i ona fai ni a latou suesuega i aafiaga o tupe maua a le falema’i pe a faaitiitia totogi o pili, atoa ai ma tupe o lo o maua i le taimi nei i pili o lo o totogi e le atunuu.

 

Na faaiu le saunoaga a Sanitoa i lona fautuaina lea o Mase, e sili pe a faateletelegese le fuafuaga o le aveesea o le isi $5 mai pili a le falema’i, ae fai muamua sa latou suesuega i tulaga i tupe e maua pe afai ae faia lea suiga.

 

Saunoa Mase e faapea, ua uma ona vaavaai le komiti faafoe i tulaga uma e pei ona saunoa le alii faipule, e le gata o tupe o lo o maua e le falema’i i le taimi nei, ae faapea fo’i i tupe e maua pe afai ae faamamalu suiga e pei ona fuafuaina.

 

Na faamautu fo’i e Mase e faapea, ua i si isi avanoa tau tupe ua mafai ona tatala mai mo le falema’i e pei o tupe fesoasoani mai le Medicaid ma le Medicare, pau le galuega e fai o le saili o tupe e faafetaui ai tupe nei mo le fa’aaogaina.

 

Ae na toe faamanino e Sanitoa e faapea, o se tasi o mafuaaga o lana fautuaga e faatuai le faaiuga e faaititia ai totogi o pili mo le falema’i, o lea ua taoto se fuafuaga a le Fono mo se pili e aveese ai le lafoga o totogi e 2% lea o lo o maua ai e le falema’i le isi alaga tupe i le taimi nei.

 

E talitonu le alii faipule ia Sanitoa, o le $20 o lo o totogi e le atunuu i le falema’i i le taimi nei, o lo o gafatia e se vaega toatele o le atunuu ona totogi, ae o le polokalame o le ‘sliding scale’ a le falema’i o lo o i ai, e fesoasoani ai i tagata lima vaivai, ae faateletelegese le faaitiitia o le isi $5 sei mautu lelei isi fuafuaga tau tupe mo le falema’i.

Comment Here