O le aso 12 Mati, 2012 ua fa’atulagaina e le Pulega ma le Ofisa o le Arts Council o le a amatalia ai latou asiasiga i e uma na tusia o latou suafa i le Lisi o e Fa’afiafia i la tatou sisigafu’a o le a fa’atautaia i lenei tausaga, 2012.

O le aofaiga o i latou po ’o fa’alapotopotoga, sosaiete ma ekalesia ua mae’a lisia o latou suafa mo fa’afiafiaga o la tatou sisigafu’a ia Aperila 2012 e 31i latou, ma ua fa’atulaga ai lenei asiasiga, ina ia mafai ona maimoaina fa’afiafiaga, po ’o a lava ni fa’atinoga ua manatu sosaiete ma fa’alapotopotoga e fa’aalia mo le maimoaga a le mamalu o le atunu’u, e fa’afiafia ai o tatou agaga i lenei tausaga.

Ua fa’atulagaina ina ia ta’ifa  sosaiete e asia i le aso e tasi, ae faia fo’i i le afiafi i le taimi ua manava mai tagata mai galuega ma tu’ua fo’i a’oga. Ua 'iloga mai e i ai a’oga ua lisia i nei fa’afiafiaga, ma ua fa’atulaga ina ia muamua i ai asiasiga a le Ofisa lea. Ua le fa’atulagaina fo’i se taimi o le afiafi, o lona uiga, e mafai lava ona asia i latou i le taimi e mae’a ai a’oa’oga i le aoauli.

Ua tatala le asiasiga i le a’oga maualuga a Malisi ma Fa’asao i Lepuapua, ona soso’o ai lea ma isi fa’alapotopotoga o lo ’o tulaga ane i ai, e aofia ai 'Autalavou Metotisi i Leone i le itula e 5:00 i le afiafi, Samoa United Pentecostal i Puapua ae fa’ai’u ai lea ulua’i aso o asiasiga i le Strings of Psalm i Puapua lava i le itula e 6:00.

O le aso Lua e amatalia lea i le 'Autalavou Ekalesia Katoliko i Malaeloa i le itula e 5:00 i le afiafi, soso’o ai ma le 'Autalavou Metotosi Malaeloa ma le 'Autalavou CCAS i Malaeloa lava i le itula e 6:00 ae fa’ai’u ai i le 'Autalavou Katoliko a Pava’ia’i.

O le aoga Pava'ia'i Elementary Swing Choir e soso’o ai i le aso Lulu, Mati 14, 2012 pe’a tu’ua le a’oga, ona soso’o ai lea ma le fa’afiafiaga a le Aiga Ta’afua i 'Ili'ili i le itula e 5:00 i le afiafi. Ua fa’aulu mai fo’i le fa’afiafiaga a le 'Aumaga 'Ili'ili o le a soso’o ai ae fa’ai’u le asiasiga i le Fa’afiafiaga o lo ’o tapena e le CCCAS Youth a 'Ili'ili lava.

I le aso Tofi Mati 15, 2012, ua fa’atulaga ai le asiasiga mo le 'Autalavou A’asu i A’asu Fou, soso'o ai ma le asiasiga o le 'Autalavou Metotisi i Nu’uuli, ae fa’ai’u ai i le asiasiga o fa'afiafiaga ua tapena mai e le Penina Tausala i Nu’uuli lava.

Aso Faraile e amata mai le galuega a le Komiti lea i le Loso South Seas Revenue i Vaitogi, soso’o le ai le Mafutaga Tina AOG i Capstone, 'Ili'ili, asia ai lea ma le Fa’afiafiaga a le “Fai Ou Vae” i 'Ili'ili lava, ae fa’ai’u ai i le SISDAC Youth i Ottoville.

I le aso Gafua Mati 19, 2012 o le amatalia asiasiga a le Komiti lea i le 'Autalavou a St Joseph i Fatuoaiga, soso’o ai ma le fa’afiafiaga a le Baha’i Youth i Tafuna, Soso’o lea ma le fa’afiafiaga a le Petesa Uta ae fa’ai’u ai i le fa’afiafiaga a Petesa Tai Youth.

O le aso Lua 20 Mati, ua amata i le asiga o le fa’afiafiaga a le 'Autalavou Katoliko i Masefau, soso’o ai lea ma le asiga o le fa’afiafiaga a le 'Autalavou EFKAS i Fagaitua, soso’o ai le 'Autalavou CCCAS i Lauli’i ae fa’ai’u ai i le tapenaga matagofie ma ua lologo mai tala a le Star Kist Samoa Inc.

O toega uma o le a fa’atautaia lea i le aso Lulu, 21 o Mati, ma e fa’afofogaina ai e le Komiti le fa’afiafiaga a le Island Magic Band i Aua, soso’o lea ma le tapenaga a le Pago Pago CCCAS Youth, fa’asolo mai ai i le 'Autalavou Katoliko a Fagasa. O le a soso’o fo’i ma le asiga o fa’afiafiaga a le 'Autalavou EFKAS i Fagasa lava, ae fa’ai’u mai ai i le maimoaga i le fagaloa, ia Fagatogo Metotisi ma Faga’alu CCCAS i o latou sao mo le fa’amoemoe o la tatou sisigafu’a 2012.

Ua fa’ailoa mai o le a taumafai e maimoaina tulaga o le o mai i totonu o le 'au fa’afiafia, o le tu’ua fo’i o le nofoaga fa’afiafia, Togiga, ia le silia ma le 15 minute le polokalama atoa, fa’afofogaina pesega pe a mai o latou leo, o le fa’alogo o le 'au fa’afiafia i ta’ita’i, ma se sao i tulaga fa’ale-aganu’u.