O le vaiaso na te’a nei na amata faagasolo ai aoaoga a le Asosi Siisii U’amea Mamafa mo fanau o lo o aooga i aoga maualuluga i le atunuu, ona o le faanaunautaiga ia mafai ona faalautele atu lenei taaloga i tupulaga talavou o le atunuu, ma unai ai i latou ina ia fiafia e aoao lenei taaloga, ma fai ai i latou ma sui o Amerika Samoa i soo se falaga maea a le Pasefika ma le lalolagi i le taaloga siisii u’amea mamafa.

E tolu aoga maualuluga i le atunuu na auai i le ulua’i taimi na amata ai lenei polokalame i le vaiaso na te’a nei, lea na faataunuuina i le maota a tama tuai o le Malisi i Tafuna.

O i latou na faatautaia lenei aoaoga mo le silia i le to’a 20 tama aoga mai le aoga maualuga a  Samoana, Malisi/Faasoa ma Tafuna na faatasi ai, e aofia ai le alii faiaoga o le Asosi Siisii U’amea mamafa a le atunuu ia Lopesi Faagu, o le Peresetene o le Asosi ia Toetagata Albert Mailo, faapea ai ma isi faiaoga lagolago a le Asosi.

E tolu vaiaso o lo o faagasolo ai lenei aoaoga ma le faamoemoe, o le aso mulimuli o lenei aoaoga, o le a faia ai loa se tauvaga faataitai mo alii aoga uma ua mafai ona aoaoina, ina ia iloilo ai lo latou iloa i aoaoga sa aoaoina ai i latou.

I se faatalatalanoaga ma le susuga a Lopesi Faagu e tusa ai o nei aoaoga, sa ia taua ai lona agaga fiafia i le toatele o fanau aoga o lo o i ai le naunau e aoao ma faamasani i lenei taaloga.

“Pau lava le mea e mana’omia ona faasoa atu i fanau aoga ia ua faatasi mai i le aoga lenei, o le faamasani lea i tulafono ma metotino (technique) e faatino ai le taaloga, ae o le latou malosi ua i ai ua vaaia ai lo latou sauni e faatino lenei taaloga,” o le saunoaga lea a le susuga a Faagu, o se tasi o alo o le atunuu ua tele taaloga faavaomalo a le Pasefika ma le lalolagi o pine auro mai ai i le taaloga siisii u’amea mamafa.

Sa ia taua foi e faapea, o le mea lilo e mafua ai ona lelei ma alualu i luma tupulaga talavou i le taaloga lenei, o le amata koleni atu ao laiti i latou, ina ia lava se taimi e faamasani ai i tulafono ma auala eseese e faatino ai le taaloga.

“E eseese uma auala e faatino ai taaloga, e ese le auala e faatino ai le lakapi, o le football poo le fusu fo’i, e faapena fo’i i le siisii u’amea mamafa, e ese foi auala ma metotia e faatino ai lea taaloga, ae pau le itu e tutusa uma ai taaloga, ia malosi lou tino ma lelei lou mafaufau,” o le isi lea saunoaga a Faagu.

O fanau aoga uma lava ua atoa le ta’i 10 tausaga ma luga atu, o i latou tonu ia ua talia i lenei aoaoga e pei ona saunoa Faagu.

“O ai lava le matua e naunau e aumai lona alo e faamasani i lenei taaloga, faafesootai mai la matou Asosi i le nofoaga a Tama Tuai a Malisi i Tafuna, e le taliaina fanau e le’i atoa le 10 tausaga,” o le saunoaga lea a le alii faiaoga.

O le faamoemoega autu a le Asosi Siisii Uamea mamafa a le atunuu o lo o i ai, e fia tapena se au a Amerika Samoa mo taaloga a le Oceania lea e faia i Ausetalia i le ogatotonu o le tausaga nei.