O le taeao ananafi na amata iloiloina ai le mataupu i le va o l Faletupe o le ANZ ma le pulega a Alii ma Faipule o le afioaga o Pago Pago, i luma o le alii Faamasino Sili lagolago ia Lyle L. Richmond ma ana faamasino lagolago ia Mamea Sala Jr ma Muasau Tasina Tofili.

O lea mataupu na tofu atu i le Faamasinoga, ina ua faila e le ANZ sana talosaga ina ia poloaina le afioaga, e totogi atu le nonogatupe sa latou sainia i le 2006, mo le faamoemoe e toe faafou ai le  Pago Community Center lea na faaleagaina i le galulolo ia Setema 2009.

Na faamanino e le loia a le Faletupe o David Vargas i lana ulua’i folasaga e faapea, e tasi lava le mafuaaga na ala ai ona oo atu lenei mataupu i luma o le Faamasinoga, o le talosaga a le Faletupe ina ia toe totogi le paleni o le tupe sa nonoina e le afioaga, lea ua oo mai i le taimi nei e le’i mae’a ona totogi, faatasi ai ma le tupe tului.

Ae talu ai e le’i finagalo le loia a le afioaga o Pago Pago ia Mark Ude e faia sana ulua’i folasaga, sa tuuina atu ai loa e le Faamasinoga le avanoa i le itu tagi mo le valaauina o le latou ulua’i molimau, o ia lea o Malia Faalua, lea sa galue mo le Faletupe o le ANZ mo le 14 tausaga, ma faamuta ai lana tautua i le masina o Novema 2012.

Ao galue ai Malia i le Faletupe o le ANZ, sa avea o ia ma Taitai i le Vaega o Nonogatupe mo Pisinisi, Faalapotopotoga, Ekalesia ma isi.

O ni isi o ona tiute o le iloiloina o talosaga a tagata mo nonogatupe, atoa ai ma le aoina o faamaumauga uma e faatatau i tagata, pisinisi ma faalapotopotoga e fia faia ni a latou nonogatupe, lea e aofia ai ma le nonogatupe a Pago Pago.

I ni pepa ua avea nei ma mau faamaonia o lenei iloiloga sa tuuina atu i luma o le faamasinoga, o lo o taua ai se sainiga lima sa faia i le va o le  ANZ ma matai e to’aono o le afioaga o Pago Pago, e aofia ai le afioga i le Maoputasi ia Mauga Tasi Asuega; Tuaolo M. Fruean; Asuega Faamamata Lauvai; Vaivao Etelani, Fuaautoa Taufaasau ma le tofa ia Mageo Malu Mageo ua usufono.

I pepa sa sainia i le va o le Faletupe ma le afioga o Pago Pago i le aso 1 Fepuari 2006, o lo o taua ai le aofa’i o le nonogatupe sa faia e $558,674, mo le faamoemoe e toe faafou ma faatau ai ea malulu mo le Pago Pago Community Center ae o le a tuuina atu le 120 masina (po o le 10 tausaga) e totogi ai le nonogatupe, i le aofa’i e $8,342 i le masina, faatasi ai ma le totogia o le tului.

I faamaumauga o lo o taua ai e faapea, i le aso 21 o Tesema 2007, na toe sainia ai e sui e to’alima o le afioaga o Pago Pago ma le Faletupe se isi maliliega fou, ina ua le tausisi le Pulega a Alii ma Faipule i ulua’i tuutuuga po o le maliliega.

I lea la maliliega fou, e 84 masina ua toe tuu atu e totogi atoa ai le paleni, i le aofai e $6,300 i le masina, seia oo i le aso 21 o Tesema 2014 e mae’a ai.

E tusa ai o le talosaga a le Faletupe, o le tupe o lo o nofo aitalafu ai le afioaga e $399,350, faatasi ai ma le tului, o isi faasalaga ma le totogi o loia i le aofa’i e $11,000.

O lo o faaauau pea lea iloiloga i luma o le faamasinoga i le vaiaso nei.