Ads by Google Ads by Google

Amata afiafi taeao poloka a leoleo

O le afiafi o le Aso Lulu o le vaiaso nei ua faatulaga e le Matagaluega o le Puipuiga o le Saogalemu Lautele, o le a amataina ai la latou poloka masani i vaega eseese o le atunu’u,  se’ia uma le faamanatuga o le tausaga fou ia Ianuari 2, 2012.

I se feiloaiga a le Samoa News ma le Sui Komesina o Leoleo, le tofa Leseiau Laumoli i le aso ananafi, na fa’ailoa mai ai e Leseiau e fa’apea, e amata atu lava i le 6:00 i le afiafi lea tautua masani a le Ofisa o Leoleo, se’ia mae’a le faamanatuga o le tausaga fou.

E lei faalauiloa mai e Leseiau nofoaga o le a fa’ataunu’u ai a latou poloka, peitai sa ia ta’ua, o le a ‘ese’ese uma lava nofoaga e fa’atautaia ai e leoleo la latou poloka i le taimi o aso fiafia, ina ia mafai ai ona mautinoa le saogalemu o tagata femalagaa’i i luga o le alatele.

A’o lei amataina le tautua masani a le Ofisa o Leoleo, ua fautuaina le mamalu o le atunu’u ina ia tausisia tulafono i luga o le alatele i taimi uma, aemaise ai lava le tagofia o le ‘ava malosi ma fa’afoe le taavale.

“O fautuaga masani lava e tuuina atu i le mamalu o le atunuu, aemaise lava o lea ua tatou agai atu i le faamanatuina o aso fiafia o lenei tausaga, ina ia aua le soona tuu lafoai taavale i fanau laiti, tusa lava poo se nofoaga latalata e fia fai ai le faatau, e lelei lava le alu o le tagata matua e ave le taavale ina ia mautinoa le saogalemu o tagata uma,” o le saunoaga lea a Laumoli.

“Mo i latou o le a tagofia le ava malosi i aso fiafia o le kerisimasi ma le tausaga fou, aua le inupia ma alu i le taavale, afai o le a e inu, nofo lelei i le fale pe vili foi se taxi pe afai e te malaga mo tafaoga,” o le saunoaga lea a le Sui Komesina.

E ui o lea e lei amataina le poloka masani a leoleo, o loo faaauau pea ona taofia ma molia nisi o loo maua le feoai i taavale ao latou tagofia le ava malosi.

Mai le toa 21 o i latou na taofia e leoleo i le faaiuga o le vaiaso na tea nei ona o tuuaiga eseese, o le toa 9 o i latou ia o loo tuuaia i le ave taavale ona, ma o i latou ia e aofia ai se alii loia sa galue mo le Ofisa o le Loia Sili, lea ua avea nei ma loia fautua a le falemai o le LBJ, atoa ai se tasi o tamalii o le atunuu sa avea ma Senatoa i le Foo Faitulafono.

O le toatele o i latou nei na taofia i le faaiuga o le vaiaso, na toe tatalaina uma i tua i le taeao ananafi e le faamasinoga, i lalo o poloaiga e ao ona latou usitai i ai, ma o nisi o ia poloaiga e aofia ai le tatau lea ona toe oo atu i le aso lea o le a toe valaauina ai a latou mataupu, aua nei toe tagofia le ava malosi, ma ia aua foi nei o latou toe soliina se tulafono a le malo.

Saunoa Laumoli, o le  faanaunauga autu o le matagaluega o leoleo, ia maua e le atunuu se kerisimasi fiafia ma se tausaga fou manuia, e aunoa ma ni faalavelave e tutupu mai ai, e pei foi o le faaiuga o le tausaga na tea nei, lea e laiti lava ni nai faalavelave matuia na tulai mai ai.

“O le faanaunauga o le afioga i le Komesina ma le matagaluega o leoleo, ia mataala le atunuu uma ma ia tausisi i le tulafono i taimi uma, ina ia faasaoina ai soifua o soo se tasi o le atunuu, e pei foi ona maitauina i le tausaga na tea nei i le vaitau lenei, lea foi sa toa filemu mea uma e ui e itiiti lava ni nai faalavelave na tulai mai ai,” o le saunoaga lea a Laumoli.

E na o le lua lava faalavelave na maliliu ai nisi i le taimi o aso fiafia o le tausaga na tea atu nei.

O le faalavelave muamua na tulai mai i le afioaga o Masefau i se siva sa faia ai mo le kerisimasi, ina ua faaaoga e se alii 20 tausaga se fagu e ta ai le ulu o se isi alii ma pau ai loa ma manu’a ai, mulimuli ane na i’u ina maliu ai lea alii, ma le isi faalavelave na tulai i Aunuu, ina ua fasioti e se alii 44 tausaga lona uso ma’i ina ua le lava tausi, e ala i lona titinaina lea o lona uso i le uaea moli.