E ui i le tuai ona amata o le polokalame e aloaia ai i latou uma e i ai manaoga faapitoa o le tino ma le mafaufau i le taeao ananafi i le malae o le Su’iga’ula a le Atuvasa i Utulei, peita’i e le i avea lea ma itu na taofia ai le fiafia o le fanau sa fa’apitoa i ai lenei aso, a o latou fa’alogologo ma le toto’a i le saunoaga autu mai le susuga a Rev. Uaea Satele, lea sa ia taua ai le tatau lea ona amanaia lagona ma leo o i latou uma e i ai manaoga faapitoa o le tino ma le mafaufau.

O le polokalame e pei ona fa’atautaia e le Ofisa e Puipuia aia tatau o i latou e i ai manaoga faapitoa o le tino ma le mafaufau (OPAD), na amata mai lea i se tamoega mai le Paka i Fagaalu, lea na filifilia ai fanau e to’a 10 latou te momoliina maia le fu’a o lo o afifi ai i totonu le kopi o le poloaiga fa’alaua’itele a le afioga i le Lutena Kovana ia Lemanu Peleti Mauga, e aloaia ai le avea o le masina lenei o Mati ma masina e faataua ai i latou e i ai manaoga faapitoa o le tino ma le mafaufau, ma fa’amae’a mai ai i le malae i Utulei.

Na fa’atumulia le malae o le Su’iga’ula i matua, uo, ofisa ma kamupani eseese na lolofi atu e lagolagoina lenei aso fa’apitoa mo fanau fa’apitoa a le atunu’u. Sa auai ai fo’i sui o le malo, e pei ona avea ai le afioga a Lemanu ma sui o le Kovana e auai i lenei polokalame.

O le sauniga lotu e tatala aloaia ai le fa’amoemoe na ta’ita’ia lea e le susuga a Rev. Uaea Satele, o ia fo’i lea na saunoa i le saunoaga autu o le aso, ona o ia fo’i o se tasi o totino o i latou e i ai manaoga fa’apitoa o le tino ma le mafaufau.

I lona tuputupua’e i totonu o lona aiga, o ia o se ali’i e po le vaai, na taua ai e Rev. Satele le amusia o ia e le to’atele o tagata, e le gata o le nu’u ae na oo lava fo’i i lona aiga sa latou fai fai upu ia te ia ma fai atu ia te ia, “oe lena le tagata ma’i, tau lava o lou ola”.

“E ui i lagona mafatia sa a’afia ai o’u lagona o se tagata ma’i, ae sa ou finau pea ina ia lagona e tagata lo’u leo ma latou amanaia o’u lagona fa’atagata soifua, o le mafua’aga lena ua fa’aeaina ai a’u, ina ua fa’aaoga a’u e le Atua e avea ma mea faigaluega mo lana galuega,” o le saunoaga lea a Rev. Satele.

Na fa’afetaia e Rev. Satele ofisa eseese o le malo o lo o ofoina atu le tautua e fesoasoani ai i fanau o lo o i ai manaoga faapitoa o le tino ma le mafaufau, aemaise ai o le fesoasoani a le malo ma aiga.

Sa ia tu’uina atu se lu’itau i fanau uma sa auai i lo latou aso faapitoa ananafi, ina ia aua ne’i fa’avaivai i upu ma tala a tagata e amusia ma faifai ia i latou, a ia finau e fa’aleo o latou lagona ina ia iloa ai fo’i e tagata e tutusa i latou uma i luma o le silafaga a le Atua.

Na taua e le afioga a Lemanu i lana saunoaga e fai ai ma sui o le malo, e ui i le eseese o uiga ma amioaga a tagata malolosi fa’apea ai i latou o lo o i ai manaoga fa’apitoa o le tino, peita’i o le itu taua e ao ona silafia e le atunu’u, e tutusa tagata uma sa faia e le Atua.

“Ia tatou malamalama ma amanaia lagona o i latou nei, ia tatou alolofa i ai ma fa’ailoa i ai, e i ai fo’i lo latou avanoa i luga o le laulau e pei fo’i o i tatou uma,” o le saunoaga lea a Lemanu.

O ni isi o polokalame sa fa’atinoina i le aso ananafi e aofia ai fa’afiafiaga ma pesega mai fanau e i ai manaoga faapitoa o le tino a le mafaufau, atoa ai ma tautua eseese sa ofoina atu e pisinisi ma kamupani eseese i le atunu’u.