Ua ufitia le aiga o Puleimeauma i le ao pogisa, ona ua amia e le Atua Soifua le tina o le aiga. O le ti’a e le maseua, o le tao ua velo i le paninoa, ma ua ifo, ua lagia ai nei le maota o aiga, ua lagona ai le leo i Rama, ina ua tagi aue ue Lasela. Ua ta’oto fo’i le manu sa tulia i fanua, aua ua gase toto le masina, ua puaoa le lagi, ma o le lagi lava lea e fa’asino i le aiga o Puleimeauma.Ua tagi tu’i fanau ma o latou fa’apea ifo,‘o outou uma o e, e ui ane i le ala, ina outou va’ava’ai maia, pe i ai ni tiga e tutusa ma tiga ua o matou o’o nei i ai’. Talofa, ua lagona le matuitui ma tiga o le oti, ua lagona tiga o mafutaga ae motusia, ae maise ai, o se e pele i le loto ma le agaga. Le oti e, o fea o i ai lou tui, le tu’ugamau e, o fea o i ai lou manumalo.Ua alu fa’asulusulu le feau i a Tagiilima ma Lameko i le po lava lea na maliu ai le lo’omatua o Silia. Ua potopoto le aiga e pei ona i ai tu masani a le atunu’u, a o’o i tai loloto o faigata ma puapuaga o le olaga nei, o a lava fita ma to’atuga o le soifuaga, e avea fa’amafanafanaga ma ala e mapu i ai le loto ma le agaga o le tagata. Na aunagi ane nei le tuafafine o Pule, le lo’omatua o Naomi, ia vave ona alu se feau e logo i a Tagiilima le fa’alavelave ua tupu i lona tina. Ina ua ma’ea lea, na amata ai loa ona soalaupule le aiga, ma talatalanoa i le mea e ao ona fai, na au tasi le aiga atoa ina ia alu Filipo e logo Tagiilima e tusa ai ma le fa’alavelave ua tupu i lona tina.O le lau aitu ua fai nei i totonu o le fale. Ua lagona fo’i e tagata o le nu’u le tagi tu’i o le fanau, ae sa va’aia le to’afilemu o le toeaina o Pule. Ua alu nei Filipo e fa’anoi le pasi ina ia o ai ma tama e logo Tagiilima ma Lameko e tusa ma le fa’alavelave ua tupu i lona aiga. I le afiafi lava lea i le fale o Lameko ma Tagiilima i le taulaga, na i ai se fa’ailo na masalosalo ai le loto o Lameko, ua fou i lana fa’alogo le tagi a le ve’a i talane o lo latou fale, ae le masani ai ona fa’apea. Na taumafai Lameko ia ‘aua ne i ona amanaiaina, peita’i, ua fa’aauau pe le tagi a le ve’a, ma na i’u ai ina tu a’e i luga ma tau’ai i ma’a. Na fesili i a Tagiilima po’o ia lagonaina, ae tali Tagiilima e leai. Ua nofo Lameko ua le toe tautala, ua i ai lona manatu e sili pe a ‘aua ne i toe fesilisili i a Tagiilima. O lea ua iloa atu nei e le o lagona e Tagiilima, a’o lea toetiti tagi le ve’a i totonu o le fale.Ua le manogi se mea ‘ai i a Tagiilima i lea afiafi, talu ona fo’i ane i le fa’ae’ega o ona matua, ua na o le taoto i totonu o le potu moe ma tagitagi ai, ua fiu fo’i Lameko e tauanau, ae ua leai lava, ua le mafai e le teine ona tu’u ‘ese ona mafaufauga i ona matua, ae maise lava o lona tina o Silia, ona o lea ua ia iloaina mai i lona tama, e le o malosi lona tina, talu lava ona alu ‘ese mai le aiga, ua le toe tutusa le malosi o Silia e pei ona i ai i aso a’o o latou mafuta. Ua leai se isi mea e toe ofi i le mafaufau o Tagiilima i lea taimi, pau o lea, ua ia fia iloa pe ua taunu’u manuia le malaga a na i ona matua pe leai. O lea la e taunu’u ane le savali a Filipo ma tagata o le nu’u, o lo’o taoto’oto pea Tagiilima i totonu o le potu, a’o Lameko o lo’o talatalanoa ma ona tausoga na o’o ane e tafafao ma asi ane i la’ua i le afiafi.Talofa, e le o iloa mai e Tagiilima, sa fa’apea le tulaga na o’o i ai lona tina i le taimi na taunu’u ai i lo latou aiga i tua. A tonu fo’i, o le pogai lea o le fa’alavelave, ona e i ai le manatu, afai ua alu ‘ese se tasi e pele i le loto ma le agaga, ae o lo’o mafaufau pea ma mafaufau pea i ai, e le ‘asa ona tutupu mai ai ma’i, o le mafaufau ma ua a’afia ai ma le loto o le tagata. O ma’i ia ona ua manatu ma ua le mafai i ai se togafiti. Afai loa e o’o i se tulaga fa’apea, o lona uiga e leai lava se vai fofo e mafai ai, ua na o le toe fia va’ai atu ma fia pa’i atu i ai.Na iloa mamao mai e Lameko le alu atu o le pasi, ua tau mafaufau nei pe i ai se aiga e i ai se pasi la’u pasese i talane o lo latou fale, po’o nisi fo’i aiga o tua atu e i ai se latou pasi. Ua lagona i tino o Lameko, ua i ai le fa’alavelave ua tupu i tua, ona o lea ua alu atu le pasi ae le masani ona alu atu i lea taimi. O le isi itu, ua leva le po ma ua tatau fo’i ona malolo latou ia, a’o lea ua alu atu le pasi i lea taimi. “Oi ta fe fe, ua i ai le fa’alavelave ua tupu.” Na pei e nofo le fatu o Lameko, ina ua tu nei le pasi i luma o le fale, ae la’a mai i lalo le uso o le tama o Tagiilima, le toeaina o Filipo.Na tu a’e nei i luga Lameko ma savali atu e fa’afeiloa’i le savali atu a Filipo. “Filipo, se talofa, su su maia i fale nei.” Ua savali atu nei Filipo ma ulufale loa e le i toe fa’atali. Na molimauina e Filipo le matagofie o mea uma o lo’o i totonu o le fale o lo’o nonofo ai nei Lameko ma Tagiilima, e pei lava ona o’o i ai le mafaufau o le lo’omatua o Silia ina ua taunu’u ane ma Pule i le aiga o Lameko. Ua fetilotilo fa’i solo Filipo, ona o se fale ua mautu lona fausaga, atoa ai ma meafale o lo’o i totonu, ua mautu mea uma, e leai se mea e fa’aletonu i le va’ai.E faia pea!