Ads by Google Ads by Google

Alofa: Fa'avae ai Aiga

Na tu a’e nei i luga le toeaina o Pule i lea taimi, ua tu’u atu i lona tuafafine e faia le fo fo mo Silia. E le i umi, ae va’aia le ausulusulu mai o le solo a Filipo ma lona to’alua, le lo’omatua o Segi.

Na tutusa lelei le faiga lea na alu ane muamua ai Naomi, e tau manuo mai lava i le auala e le i o’o mai i totonu o le fale.

“Pule, Pule, o le a le mea ua tupu?” O le aunagi ane lea a lona uso o Filipo. “Ua fa’ateia ma’ua ina ua alu atu Tovi’o, ua ma tu tu a’e loa sau ma le solo. O le a le mea ua tupu i a Silia, e fa’ama’ima’i” Na va’aia e Filipo foliga fa’anoanoa o lona uso matua. Ua iloa lelei e Filipo ma Segi le mea ua tupu, ona sa mata’i pea e Segi uiga o Silia i le taimi na fai ai le talatalanoaga a le aiga, e leai se gaoia o le lo’omatua.

Na fetaui tonu le saofa’i ifo o Segi ma le fa’apea loa o le tala a le lo’omatua o Silia lea ua pulou nei le ie ‘afu, “Ta fia va’ai i si a’u tama o Tagiilima, Naomi ua ou fia va’ai atu i si a’u tama o Tagiilima fa’amolemole.”

Na avea le tagi a’e a le lo’omatua ma ala ua loto vaivai ai Naomi ma Segi i lea taimi ua lagona ai le tulaga e fa’apea ua sili atu ona lagona e Silia ia tiga ina ua alu ‘ese Tagiilima na i lo se isi lava o i la’ua. O Naomi ma Segi ua feagai nei ma le ma’i o Silia, ua avea fo’i lea ma ala ua maua mai ai sina to’a o Silia i lea taimi. “Silia, a e toe fia va’ai i lau tama, ona e loto tele lea, tatalo i le Atua ina ia tu’u mai le avanoa e te toe va’ai atu ai i lau tama.

E leai lava se isi auala Silia, ‘aua e te loto vaivai, ia o tatou fa’afetai fa’atasi i le Atua, ua maua le tofi lelei mo Tagiilima. Ae ia e loto tele pe a fai o lou mana’oga lea ma e tatalo i le Atua, o Ia o le tali o o tatou mana’oga uma.”

Na toe liliu nei Naomi, “O fea tama, Sina, ua a le vai vevela, oe se gaioi, va’ai fo’i oe i tilotilo mai lou to’alua palagi ua toso fa’atata atu oe e, tu’u le fia papalagi, ma au gaioi na, e te le masani ai, gaioi mai i le gaioi fa’aSamoa na ola mai ai, fa’avave.” Na toe liliu nei po’o fea Lolesio, “Lolesio o fea oe, gaioi mai ma ala mai tou faia,i o lea e fa’atali  ma ua.” E leai se tama po’o se teine na tu fa’atemeteme, ua gaioi uma ina ua va’aia le tino o Naomi ma fa’alogo i lona leo.

A’o fa’atalitali pe tua ma ni a le fofo na fai nei, o le taimi lea ua na o le lue ane i sasa’e, lue i sisifo le ulu o le tamaloa palagi, lea ua fa’afesaga’i nei ma Filipo. A alu alu upu ua le iloa, velo i luga lima ma fai le fa’atusatusaga o upu ia e ta’u. Toeitiiti lava le isu  o Pule a tau ai le lima taumatau o Filipo i le tau fa’amalamalamaina o ana nanu ia e fai nei ia Simi.

Ua na o le tau a’a o si palagi i lea taimi, ua mau ai lima e lua o Filipo i le ua, na i’u lava ina a’apa ifo le palagi i lana taga ma u’u a’e i luga lana ato tupe, ma tatala loa. Na a’apa atu nei Filipo e taofi le lima o Simi, ae ua le mafai le palagi. Ua matala le ‘ato tupe, ma ua se’i mai nei i fafo e Simi le tupe Niu Sila e limasefulu tala, ma tu’u ane i a Filipo. Ua leai se leo o Filipo i lea taimi, ae na o le lulu ane o lona ulu i le to’alua o le tama a lona tuafafine ma lona loto fa’afetai, ua maua sia vaega oa, aua le fagu pulu e fiafia i ai.

Na pei o le ‘emo o le uila i aso loulou o le tau, le gaioi a Filipo i le momonoina o le tupe  i totonu o lana taga, ua lagona lona popole, ina ne i iloa ane e lona tuafafine o Naomi.
 “Naomi, ua a, ua tau maua mai se to’a o Silia.” O le fesili ane lea a le toeaina o Pule. Na tu a’e nei i luga le lo’omatua o Naomi ma savali ane i le itu o lo’o nofo atu ai lona tuagane. “Ioe, ua tau to’a mai, Pule o le a le mea ua tupu, va’ai oe, letioa lava a le tautala Silia i le taimi na fai ai mea a le tatou aiga, ia o fua la ia, e teu teu i le loto e i’u lava ina fa’atupu ma’i, afai e le tu’ua ma le malosi lona loto, e i’u lava ina fa’atupu ma’i ai.”

Ua le tautala Pule i lona tuafafine, ae ua punou ifo ma ona loimata. Talofa, e le o iloa mai e Tagiilima le tulaga ua o’o i ai lona tina, ua avea o ia ma avega mamafa i le mafaufau ma le loto o lona tina.