Ads by Google Ads by Google

Alofa: Fa'avae ai Aiga

“Letina, fai fa’alelei au faiga sia’ula, e te iloa le upu fo’i lea, faifai la mu, fai fai la mu, tautala ma fautua lelei i a outou tane, ona iloa lea e le tamaloa le tulaga e tu ai, ae le o muimui muimui, ia o le tulaga lea e o’o i ai, a fai mea o le aiga, ae sola sola aisea, e le iloa fai ni mea, e le iloa tautala, ua ou le iloa la po’o a mea e iloa fai.”E le i toe tali Letina i a Naomi, aua ua iloa lelei e Letina, e alu alu lava e i’u ina tu mai Naomi ia te ia. Na liliu nei i tua Letina ma lona le malie i lona uso ma tomumu, “O le lo’omatua lenei, tiga lava ona punou si nei tamaloa e fai mea o le aiga, ae fai mai lava ia o Pio e leaga, ua o’o mai fo’i lo’u le fia nofo i lenei aiga.”O le tomumu a Letina lea na fai nei, o lo’o fa’alogologo mai i ai lona tuagane o Filipo. “Letina, se onosa’i, e te le i au masani lava i uiga o lou uso, onosa’i.” O le musumusu ane lea a lona tuagane o Filipo. “Filipo, ua ou le iloa, e fai uma e ia tala o tagata, ae le se i va’ai i le gaioi a lenei tamaloa, ae fai mai lava o Pio e leaga. Ua toetiti fo’i tapena ma’ua i le aiga o Pio ma te nonofo ai pe afai o le faiga lea.”Ua le tautala Filipo i lea taimi, ua na o le tilotilo ane i lona tuafafine la’ititi. “Letina, onosa’i, ua e iloa lava lou uso, e pa vale i le tele o taimi. O aga a ia a le tagata ua leai se to’alua, e faufautua i ai.” Ua alu nei le talie a Filipo ma Letina, ua fai fai tala nei, ae e le o lagona mai e Naomi. O le isi itu, o la’ua ia ua lavevea i a Naomi.Ina ua ma’ea le talatalanoaga a le aiga lea na fai na aunagi nei le lo’omatua o Silia i a Pule ina ia o la o i le fale ua sau le vaivai, ma na fa’amavae ai loa Silia ma Pule, ae o lo’o nofo nofo pea nisi vaega o le aiga potopoto.Na ona iloa mai lava e Filipo ua tula’i Pule ma Silia, e le i tele lava i se pito, tu a’e loa fo’i ma ia ma ua fa’amavae ma Segi. O Segi e le i mana’o e vave o i le fale, ae ua iloa lelei lava e Filipo le tulaga e o’o i ai ia ona o lea ua tula’i ‘ese Pule ma Silia. Afai a e nofonofo umi i le potopotoga lea e fai nei ma lona tuafafine matua, o lona uiga e i’u ina liliu mai Naomi ma fa’ataunu’u le taina o lona ulu e pei ona folafola mai ia te ia.O le isi itu na manatu i ai Filipo e sili ona tula’i ‘ese, ona sa fai o lona uso matua o Pule e tau sefeina ia pe a o’o i tai loloto o faiga mea a le aiga. “Ia Naomi, o le a ma o fo’i ma’ua, se i fai sina malologa ua alu le aso o fai nei mea.” Na tu a’e nei i luga Filipo ma savali atu ua fa’amavae i le to’alua o Sina, le tamaloa palagi o Simi (Jim). “Simi, me see you tomorrow…okay….me love you Jimmy….” Ua ‘ata le palagi ma tilotilo ane i lona to’alua.Na fa’atatoso nei vae o Segi i lea taimi, ona sa i ai lona manatu se i toe nofonofo ma talatalanoa ma Sina lea na o mai mamao ma lona to’alua palagi mai Niu Sila i le fa’aipoipoga a Tagiilima. O le mea na fia nofonofo ai Segi ma talatalanoa ma Sina, ona e fai fo’i si lelei o le simili a si lo’omatua. E mo’i lava e le i lelei tele, ae ua feololo, a fa’aopoopo lava e Segi le uka ma le li, ia ua ukali, ona alu ai lava lea fa’apena. O lea la ua fia nofo nei Segi se i fai ana nanu ia i le to’alua o Sina, ae ua seu e lona to’alua o Filipo.“Se o oe se Filipo, se ua malosi tele lou pala’ai i a Naomi, o le mea le na ua e fia vave alu ai. O lea e tau fai la’u nanu i le palagi, ae e seua le mea. Na ou alu fo’i a’u i le a’oga Filipo, ta’ilo fo’i i le simili a le palagi pe maua si a’u fo’i taumafaiga vaivai na ave ai a’u e o’u matua i le a’oga faitau pi Samoa a le Faifeau.”Ua na o le savali o Filipo ma ‘ata’ata i tala a lona to’alua. Ua iloa lelei lava e Filipo, o lona uiga, o le faitaupi Samoa lea na a’oga ai si lo’omatua, ae le o le faitau pi fa’apalagi. “Ioe Segi, se i aulia taeao, ona ta o lea i le fale o Naomi, ia na e fuli lava lea e faitau le pi fa’apalagi na e a’oga ai i le a’oga a le Faifeau, i le palagi.” Ua na o le tomumu o Segi ma tau sa’e le ‘ato o lo’o i ai i totonu pilikaki e lima, o le fasi pua’a, ma nai talo na maua mai i le ‘aiga o le fa’aipoipoga a Tagiilima ma Lameko.