O Lolesio, o se tama e tausa’afia ona uiga. Ai fo’i o le mea lea na ulumatua ai, on ate lavatia ona fa’apalepale i mea uma e tutupu i totonu o lo latou aiga. O lea la ua tu nei i le va lea, “Tina, se ‘aua e te loto vaivai fa’apena, fiafia o lea o le a e alu e asi lou aiga. O isi mea uma o le fa’atoaga, tu’u mai faitalia au ma va’ai, ae alu se i e o’o i si ou aiga, ua leva fo’i aso e te le i toe asiasi i ai.”

Ua na o le taso’o o le fogifogiina o le isu o le lo’omatua, ma fa’asi’usi’u mata ane i a Lameko lea ua savali mai nei i fafo ma saofa’i i le isi nofoa fa’atasi ma Lolesio. O lea la e taunu’u tonu ane Lameko, o lo’o fai le tautalaga a lona atali’i matua o Lolesio. Na iloa lelei e Tagiilima le mea e ao ona fai, lea ua fa’ataso’o ai nei le fogifogiina o lona isu. E tiga lava ona le tafe le isu o le lo’omatua, ae ua fa’ataga fogi lava ma soloi ona mata, ae leai ni loimata.

O faiga a le lo’omatua, o lo’o pu’e mai uma e le mea pu’e ata a Eteuati lana tama e tau ‘afa’afa ana amioga, ma e leai se mea o gole i le pupula a Eteuati. Ua na o le lulu o lona ulu ma tilotilo ane i lona tina ma fa’apea ona mafaufauga, “leaga lava le lo’omatua e poto tele e fai ana fa’asalalauga le totogia i si toeaina.” O Emani o lo’o tu i tua i le umukuka i le taimi lea. Na tau masalosalo Emani i lea taimi, ona e fa’alogologo mai, ua leai se tasi o toe tautala, ae ua na o le fogifogi isu o lona tina lea ua fai nei.

Ua ‘ata Emani ma lulu lona ulu ma a’apa ane e sa’eu le supo tapuvae povi, na fai e le teine o lo’o tapenaina le fale. Na tu nei Emani ma musumusu ane i a Litia, “Litia, o e fa’alogologo atu i lo’u tina, tiga lava ona leai ni loimata, ma le tafe le ‘isu, ae fai lava. Se a ta’u se kuluku, e le maua le kuluku a le lo’omatua lenei. Ua fai fo’i ana mea ia, ina ia alofa atu ai le toeaina ia te ia ma tu’u ai e alu i lona aiga.” Ua talie nei Emani ma Litia ma fai le la mea’ai.

Na toe fa’apea ane nei Litia, “Emani, fai lava oe, ae ‘aua ne i lagona mai e le lo’omatua, ua e iloa fo’i, e tu’u lou tama ae liliu mai ia te oe.” Na toe talie nei ma u mai o la tua i le potu malolo lea e fai ai nei le talosaga le leoa a Tagiilima i a Lameko ina ia tu’u atu la’ua e o mo le vaiaso e tasi.

“Tagiilima, ua lelei, ua ou malie atu e te lua o ma lau tama mo le vaiaso e tasi, na o le tasi lava le vaiaso lea ua ou malie atu e te lua o ai, ia ‘aua lava ne i sili atu.” Ua uma le fogifogi isu o le lo’omatua ae ua amata ona taletale, ua liliu ane nei ma fa’apea ane, “Lameko, o lea fo’i e fa’alogologo mai le ta fanau, ou te fa’afetai atu ua tafa lou finagalo e tusa ai ma la’u talosaga vaivai. Aua e te popole i le fa’atoaga, o le aoga lea o tagata faigaluega, o lea foi e maua o latou totogi, ua uma fo’i ona ou talatalanoa i ai, a lea e i ai Lolesio, o ia o le teutupe ma le failautusi o le fa’atoaga, o lona aoga tonu lava lea, a alu ‘ese le tama’ita’i pule o le fa’atoaga, o ia e tu i le tofiga lea.”

Na liliu ane nei le lo’omatua i a Lolesio, “Sio, ia va’ai lelei le fa’atoaga, ma va’ai tagata faigaluega, ua e fa’alogo mai. Ua uma ona ou talanoa atu ia te oe i le mea e tatau ona fai. O le vaiaso fo’i lenei e toe ave ai pusa talo ma pusa fa’i. O fuala’au ‘aina, o le na e te iloa le mea e fai. O lo’o fa’atau lava e faleoloa fuala’auaina, va’ai le fale ‘aiga o si toeaina o Kimi, ia ‘aua ne i motusia le fuala’au‘aina i le fale’aiga le na, o lo’o ‘on time’  lava le totogi a si toeaina o Kimi, i ana fuala’au’aina ia e ave i aso ta’itasi.”

E leai se isi na fa’auigaina le nanu a si lo’omatua, ae se i vagana ai Eteuati lea ua le pau se tala a lona tina i lea taimi. “Tina, se i toe fai tasi mai lava lau nanu, se i o matou fa’alogologo atu i ai, ae e te le i alu.

Ua alu nei le talie a Lameko ma lana fanau. “E a, ne i tou fa’apea lava ma le tou tama e le iloa e si tou tina nanu, va’ai outou, na ou alu fo’i a’u i le a’oga faitau pi a le Faifeau i tua. Va’ai outou ma le tou tama, e iloa fo’i e si o’u aiga fenanui, e le fa’apea na o outou tou te iloa e, o nanu panupanu a ia a si tou tina na maua ai to’u kikeli na tou te feoa’i nei ma outou.”

Ua maoga a’e nei le ‘ata a Loimata i le tala a lona tina. “Loimataoapa’ula, ia o le a le na a, tu’u ifo i lalo lou leo e, ou te le fia fa’alogo atu lava i ai, va’ai fo’i oe, i i’u leaga le ta malaga, fai fai fa’alelei mai au faiga. Ua e ‘amu’amu mai i le nanu a lou tina, e talofa e, i le olaga ua e o’o i ai. Na o si o’u alofa atu lava ia te oe. Po’o le a lava lou poto ma lou atamai le na, a e le usita’i, ma e le iloa ona ava ia ma’ua ma lou tama, o ou matua, talofa e, e leai lava se mea lelei e te maua. E toe ave’eseina e le Ali’i lou poto lena. Va’ai fo’i oe ne i o’u fai atu e te nofo. Sui mai le alaata e te sau ai Loimata, fa’alogo lelei ou taliga ma teu i lou loto upu ia ou te lafo atu ia te oe i aso uma. Tu’u mai i lalo i le ala ata muamua, ae le o lou fia oso i le alaata lua a le fale televise, e alu alu lava nenefu fa’asolo atoa, ona e lavea ai loa lea i lo’u lima.”

E faia pea!