Momoli Loimataoapaula e ona matua i le Kolisi

Ua amata a’oa’oga a Loimata i le Kolisi e pei ona i ai ana fuafuaga i le tausaga a’oga ua amata nei. O se aso fiafia mo ona matua fa’apea ona tuagane sa o latou taupua’i faiva a’o alo Loimata mo lana su’ega. O lea ua fa’amanuiaina, ma ua maua ai le avanoa e a’oga ai i le Kolisi. O le aso tonu fo’i lea na taunu’u ane ai le uso o Tagiilima, le lo’omatua o Malia. O lana masani lea, o le asiasi ane i si ona uso ma lana fanau pe a o’o i le fa’aiuga o le masina. E tele itu e fa’auiga ai le alu ane o le uso o Tagiilima ua avea fo’i lea ma ala ua fai ai tala a le aiga o Lameko e fa’apea, “O lea fo’i ua sau le lo’omatua, e alu nei fo’i ma se la’uga.”

Ina ua logo tala Tagiilima i fa’amatalaga a tagata o le aiga o Lameko, sa le i toe fa’atali le lo’omatua, na la’a sa’o loa i le fale o le isi tausoga o Lameko lea na faia le fa’amatalaga. Na iloa e Tagiilima le fa’amatalaga lea, ona o le isi fo’i tausoga o Lameko na alu ane e fa’amolemole i a Tagiilima, i se ‘ato talo e fai ai le oso o lana tama e malaga i Niu Sila, o lea la ua maua le ‘ato talo ona o le fa’amolemole, ae ua toe fa’amatalatala nei ma isi gaogaosa e le tatau ona faia, ona e le maua ai se filemu o se aiga. O tulaga lava ia, a i ai se mea e mana’o ai ina ia fia maua, ona alu lea fai fua tala ma fa’amatalaga o isi, e leai se filemu na o le vevesi ma le felotoa’i e o’o i ai i le va o aiga.

“Nive, fa’alogo lelei mai lava oe, e leai sau feau e te tautala ai fua i le sau a lo’u uso e asi mai a’u ma la’u fanau. O le a e tautala fua o ni au mea, o ni au tupe, se fa’ama ma le auvae pe a fa’alogo atu na o le nofonofo i le fale ma ‘ai le savili. Aua le fa’amanogi leagaina fua le ea a le Ali’i na foa’i mai e te manava ai, manava i se ea fou se i fa’asa’osa’o ai lou fai’ai, ae ‘aua e te faia fua fa’amatalaga fa’apea, aua na o le vevesi le mea e o’o i ai tatou. Se tautala le tagata e fa’alogo atu na te mafai ona fai mea o le aiga. Oi! a ou pologa a’e ma ou ma’i i le faiga o mea o le tou aiga, ae tou te fai fai tala ia te a’u, mafaufau ma saga mafaufau, ae ‘au le fa’aalua le ea ma le manogi leaga.” Ua leai se tala na toe gagana ane ai Nive i a Tagiilima i lea taimi, ae ua na o le fa’atoese nei.

 “Nive, o a’u o se tagata e sili ona alofa i a te outou ma a outou fanau, ia outou manatua le mea le na. Po’o a mea tou te le maua, e tu mai le fafine nofotane lenei e fai mea uma, aisea, ona o lo’u manatu alofa mai ia outou i lo outou lima vaivai, a’o fa’amatalaga nei tou te faia, se na o fa’amatalaga e tagi ai le loto ma maligi ai loimata.”

Na toe fo’i Tagiilima i lona fale ma lona loto malie ina ua uma ona masua atu lona le malie i a Nive ona o fa’amatalaga na ia faia e uiga i lona uso. E ui ina lagona e Tagiilima le tiga ae ina ua taunu’u i lona fale, sa lagona le filemu o lona loto, ina ua ma’ea ona talatalanoa ma Nive. E moni lava e tiga upu ma tala, ae sa lagona lava e Tagiilima lona alofa i le va’ai atu i le fanau a Nive, ma le tulaga o lo’o i ai, e lima vaivai. O le tele o mea a le aiga e fai, e leai ni saoga a Nive ma lona to’alua, ona e leai se tasi o faigaluega, e laiti fo’i tamaiti. Na tuli ane nei e Tagiilima lana tama o Eteuati ma le pepa talo, ma fasi povi e lima, e fai ai le mea’ai a le fanau a Nive ma Tau. O uiga ia o Tagiilima, e fa’agalo gata i a Lameko ma lona aiga, ae maise o lana fanau.

O le aso muamua o Loimata i le Kolisi na o lava ona matua e momoli. O le mea e sili ona malie ai, na amata lava i le taeao le a’oaiga o Loimata, ina ua va’aia le oso a’e o ave o le la, o lea ua tu le ta’avale i luma o le falea’oga o lea lava e fai.

“Loimata, o lea ua e ulufale i le Kolisi, ia e mata ala i mea uma e te faia, ‘aua ne i e alu i ta’iga a isi teine, e leai se mea lelei e maua ai, ae ia e punou ma lou loto atoa e fai au mea’aoga. Va’ai lelei au mea’aoga, va’ai lau ‘ato fou lea na fa’atau i tupe o le fa’atoaga, lea ua aoga ia te oe, e feavea’i ai au meaa’oga, ua e fa’alogo mai.”

Ua ‘ata Loimata ma tilotilo ane i lona tama fa’atasi ai ma ona mafaufauga e fa’apea, “Se i tau fa’ailoa mai lava ia te a’u, o tupe o lana fa’atoaga lea ua fa’atau ai la’u ‘ato a’oga, o le lo’omatua lenei se.” Na toe fa’ate’ia nei mafaufauga o le teine ina ua toe fa’alogo atu o fa’apea mai lona tina.

“Va’ai oe, o tupe o le galuega a lou tama, o lea e fai ai fa’alavelave a lona aiga, a tele mai lava fa’alavelave, ia o le tele fo’i le na o ana tupe e alu. A’o tupe ia, ia o tupe ia a si ou tina, o tupe lava a Tagiilima na maua i ona lima ma lona afu, lea ua maua ai lau ‘ato a’oga fou e te alu ma oe i le a’oga. Ia e finafinau ma e tauivi i au meaa’oga, ona e maua lea o le poto, ae le o lou finau e fa’alauiloa isi mea e le tatua ona faia, ua e fa’alogo mai?”