Ads by Google Ads by Google

Alofa: Fa'avae ai Aiga —Vaega 69

Talutaluga fou o le olagaA’oa’oga a LoimataoapaulaO aso ma ona suiga, e mavae atu lea augatupulaga ma lea augatupulaga, a’o le olaga ma le soifua o le tagata e le tumau ise tulaga e tasi. Ua pei o le mou malie ‘ese atu o le la i le ao, fa’apea le masina i le po, ona fesilisili ai lea o le loto ma le mafaufau e fa’apea, a’o afea ea o le fotua’i mai ai ni talutaluga fou o le olaga. A lea ua tatou tuvae nei i talutaluga fou o le soifuaga, ma ona suiga, ina ua alafa’i mai i le manuia le tama’ita’i o Loimataoapaula mai i ona tofaga. Ua fa’apena fa’alogona ua o’o ifo i le loto ma le mafafau, o faigata ma puapuaga o le olaga sa savalia mai e o tatou tua’a, a’o lenei ua o tatou sa’a i ma’a o malie i le pule fa’asoaosa a le Atua Soifua i le ola ma le soifua o le tagata i aso uma.O suiga o le olaga e pei ona i ai nei, ua iloa ma ua molimauina ona ua fai i lagi folauga a tua’a ma ua lagomau mau nei i ti’a sa, a’o ala o le vavau sa o latou asaina, ma o latou tautiga ai, o lea ua o tatou oaoa ai nei ma o tatou sa’a ai i ma’a o malieUa le toe nofoia le nofoa o Taviti e matua ma aiga o Tagiilima, ua le toe va’ai fo’i o latou foliga pe toe fa’alogo i o latou leo. O galuega mamana ia a le Silisili ‘Ese i le ola ma le soifua o le tagata na Ia gaosia i lona fa’atusa.Ina ua maliu le lo’omatua o Naomi, na va’aia ma molimau e tagata ae maise o lona aiga, le alofagia ma le amanaia e tagata. O se maliu ua moni ai le upu, ua oloa lu’ulu’u, ona o le tamaoaiga ua maua e lana fanau, fa’apea Tagiilima ma Lameko, lea ua fa’atino ai fa’alavelave o le aiga.E fa’apena fo’i fa’alavelave na tula’i mai i totonu o lo latou lotoifale, ua leai se toe tau fa’asoasoa, ua lima malolosi fanau e fa’atino fuafuaga uma. Ina ua tu’ua le malo e le tama o Tagiilima le Sa’o o le aiga, le toeaina o Puleimeauma, na fa’apea fo’i le tulaga sa i ai, ona ua tagolima fanau, ua maua le tamaoaiga e fa’atino ai mea uma, ina ia sao ma uli le aso o lo latou tama.Ua avea le aiga o Lameko ma nofoaga tumau mo Tagiilima ma lana fanau, ae e i ai lava aso e maua ai le avanoa, e asiasi ai i si ona aiga i tua, ae maise o taimi o fa’alavelave e feagi ma lona aiga. E le gata i lea, ae o lo’o teu fatu i le loto ma le mafaufau o Tagiilima ia fautuaga a lona tina i le aso mulimuli na o la feiloa’i ai, ma o la toe fa’amavae ai.O aso la nei, ua le toe i ai se tulaga fa’apea e sefulu tatalo ma pese lotu e fitu fa’atoa taunu’u le pasi, ua leai, ua laulelei auala e fai malaga ma feafioa’i ai le mamalu o le atunu’u o lo’o alaala ma papaa’ao i nu’u ma alalafaga i tua. Ua le toe fa’alogoina le fa’asalalauga le totogia e fai mai e le ave pasi, pe a tuanu’u i luga o le mafa e pei ona masani ai, ua leai, ua alu fa’asasao lava le tama ua le toe malolo. O le vaitaimi lenei, e fai fai fo’i ‘auala o le sa’olotoga o lo’o i Amelika, e le maua auala i aso nei, o lea ua so’o ai alalafaga, ma ua ta’amilo i afio’aga i tua o le atunu’u.O le aso fanau o Loimataoapa’ula, lea na alu ane ai lona tama ma lana meaalofa o le api tele lea, ua fa’aaoga e le teine e fa’amaumau ai mea uma na tutupu ia te ia i lea aso ma lea aso. O le taunu’u ane o le lo’omatua o Maselina e tala’i saoga e fai mo le maliu o le aiga o Lameko i le afiafi, lea ua fai nei le talatalanoaga ma Tagiilima.Ina ua manava ane le galuega a Lameko, i le afiafi lava lea, e le i faia e Tagiilima se fa’aiuga, ae sa ia lagona o le tulaga e tatau ona fai, o le fa’atali lea se i taunu’u ane Lameko ona fai lea o le tala i a Maselina e tusa ai ma lana savali.Ua ‘ata’ata Loimata ma savali i totonu o lona potu, ma fa’apea ifo i lona loto, ma’imau e, pe ana tutusa pea aso o le olaga, e pei ona i ai lona va’ai atu i ona matua o fiafia, ae a o’o loa i aso leaga, ua na o le felelei solo o ipu ma ufi o ‘ulo i faiga a lona tina, o aso la ia e le fia manatua e le tama’ita’i. E le i umi ona taunu’u Loimata i totonu o lona potu, ae alu atu ma le tauvala’auga a lona tina. “Loimata, Loimata, o fea oe, oi, o le a e alu e te lafi i totonu o le potu, a’o ai e faia mea ia, fa’avave mai nei i fafo, ae ou te le i o’o atu e futi fa’atata mai lou ulu.” Ua na o le moei’ini o mata o le toeaina o Lameko i lea taimi. Ua le tautala Maselina, ae ua tilotilo ane i a Tagiilima ma ona mafaufauga e fa’apea, o se tagata se ua sili ona saua lenei tagata, peita’i, ua masani tagata o le auaiga o Lameko i uiga ia o Taigiilima.Na savali mai nei i fafo le teine mai i lona potu, na fetaui tonu ma le manava ane o le galuega a lona tuagane o Eteuati. “Loimata, o le a fo’i le mea ua vavao atu ai le lo’omatua, e le mafai lava ona maua se to’afilemu, tiga ona iloa o lea e i ai tagata i le fale, ae fai lava ia.” Ua le tautala le teine ae ua fa’agaioi loa le faiga o le vaiinu ma le mea’ai a lona tama lea ua manava mai, fa’atasi ai ma ona tuagane, lea ua i ai nei i totonu o le fale. Na liliu nei Eteuati ma fesoasoani i lona tuafafine i le fa’amautuina o le meatausami a o la matua.