O le tusi na ia faia i le vaiaso ua tuana’i lea na alu ma lona atali’i la’ititi i le a’oga i Apia ma ave i lona tuafafine, o le tusi lea na fa’ailoa atu ai i a Tagiilima le talatalanoaga a lo latou aiga i le suafa matai, lea ua leva ona ta’atia ma ua tatau ona faia i ai se fa’ai’uga. Ua iloa lelei e Lolesio, o le mafua’aga lea ua o’o atu ai lona tuafafine, fa’atasi ma lana tama teine e to’atasi o Loimataoapaula. Na toe liliu ane nei le toeaina ma opo atu Loimata, ma ta’ita’i i totonu o le fale.

Ua ulufale i totonu Tagiilima ma ua fetilotilo fa’i solo ona mata, ua mautu ma tu lelei lona tuagane ona o le to’atele o le fanau o lo’o i Niu Sila. O le tama ulumatua o lo’o i Fiti mo ana a’oa’oga. O le teine lona lua ua nofo tane i le palagi i Niu Sila. O le isi afafine o Lolesio, o lo’o nofotane i Tutuila.

E to’avalu le fanau a Lolesio ma Analosa ma ua tu lelei ai nei le aiga i tua, ona ua mautu le fanau o lo’o sa’ili manuia i atunu’u i fafo. O le fale na o la faia ma Lameko ina ua ma’ea le maliu o lona tina o Silia, o lea ua toe fa’atele ma fa’alelei e lona tuagane ma ua nonofo ai nei. I lana va’ai i lea taimi, e leai se mea e tasi na toe suia se i vagana ai le toe fa’afou ma le toe soso’o i tua o lea ua va’aia ai nei le tele o le fale.

Ua saofa’i ifo nei Tagiilima i luga o le nofoa fa’amalu ma tau soloi lona afu, e le i umi lava ae fa’apea le tala a le lo’omatua, “Ua tele le suiga ua i ai, a Lolesio, talofa e, a toe manatu i la aso i nai o tatou matua i le lima vaivai ma le mativa, e le mafai lava ona galo i le loto ma le mafaufau.”

Na iloa ane e le toeaina le toe a’apa ifo o lona tuafafine ma toso a’e i luga lona solosolo ma soloi ai ona mata. “E talofa e, ma’imau e, pe ana fa’apea o lo’o soifua mai pea o tatou matua, se i o la va’ai i mea ua tatou maua i lenei vaitaimi. Ua uma atu o la soifua, a’o lenei ua tatou maua mea e tatau o na fa’aalu e tausi ai i la’ua.” Ua le tautala le toeaina o Lolesio i lea taimi, ua na o le punou ifo o lona ulu, ma le le iloa e se tasi, ua fa’apena fa’alogona ua o’o i le toeaina le tuagane o Tagiilima.

Ua toe manatua tulaga sa i ai le soifuga i la aso, ua toe manatunatu i faigata ma puapuaga na o’o i ai, ua toe manatunatu i le mativa ma le le tagolima sa i ai, ma e le mafai lava ona galo i le loto ma le mafaufau.

O suiga fou ua i ai nei, o le aga’i lea i luma o le soifuaga ua i ai, ae maise ai o le aiga o Tagiilima ma ona tuagane. O lea ua toe feiloa’i nei, ua avea lea ma ala ua toe manatunatu ai i le olaga na ola mai ai ma ona faigata. E moni lava e fai ma alu ane Tagiilima e asi latou, ae e le umi ona nofo, e alu ane i le taeao ona toe fo’i lea i le aoauli po’o le afiafi fo’i, a’o le taimi la lea, ua va’ai atu nei lona tuagane o Lolesio, o le malaga tu sa’o lea ua sau ai nei le lo’omatua, ona o le anoanoa’i o atigipusa fa’apea ma ‘ato pa’u.

Ina ua taunu’u le malaga a Tagiilima ma lana tama i lona aiga, o le taimi lava lea na iloa ai e tagata o le nu’u fa’apea ma le Fa’afeagaiga ma lona Faletua o lo’o galulue i totonu o le afio’aga. E le i ai se manatu o le lo’omatua o le a alu ane se faiga lotu a le Faifeau ma lona Faletua i lea afiafi, pau le mea sa ia mana’o ai, ia lava se taimi e mafuta ai i ona tuagane ma a latou fanau, ae maise o le mataupu na mafua ai ona o’o ane i lona aiga.

“Tagiilima, ia o lea ua sau le tama, fai mai o le itula e fitu o le a o’o mai ai le Faifeau ma lona Faletua mo le faigalotu, o lea fo’i ua sauni mai le aiga mo le alalafaga.” Ua te’i le lo’omatua, sa le i manatu i ia itu. “O, ia ua lelei, fai i le Faifeau ma lona Faletua e tala mai a’ao tatou te failotu fa’atasi. Ae tala’i atu i le tatou aiga, ou te le fia pupula atu lava i se tagata, e leai ni tupe e fai ai ni o latou lafo, ou te le o sau mai Tutuila, o lea ou te sau mai Apia i le aiga o lo’u to’alua, e tutusa pau lava tupe ia tatou te fa’aaogaina. Tala’i atu la’ia i le tatou aiga la’u tala le na, e le o le ata o le Pelesitene o Amelika lea ou te sau ma a’u, e leai, o le ata o si toeaina o Malietoa.”

 Ua ‘ata nei lona tuagane ma tilotilo ane i si ona tuafafine, fa’atasi ai ma ona mafaufauga e fa’apea, “E leai ni uiga o le tuafafine o lo latou tama o Naomi e ave’esea i lona tuafafine lea, e pei lava na tofi lua se ‘ulu. E fai sa’o mai lava fa’amatalaga e le taofiofia.

“Tagiilima, se o mea lelei mea na, e tatau ona e fiafia o lea e amanaia mai oe e lou aiga, ae maise ai o lea fa’atoa oulua o’o mai ma Loimataoapaula, fa’atoa o’o mai lava lea o lau tama teine i lo tatou aiga, ia fiafia la’ia, ae ‘aua e te fa’apena.”

Ua ata Tagiilima ma fa’apea ane i lona tuagane ma lona to’alua, “O le aiga o tatou, o se aiga ua sili ona to’atele ona tagata, ua ou le iloa po’o ai o le a velo atu i ai le oa, a’o ai o le a pulapula mai mata. Ua tatou iloa fo’i, e tatau ona o mai na o le tama ma le tina, ae tatou te va’ai atu nei, e muamua mai le toeaina ma le lo’omatua, ae mulimuli mai tua tamaiti ma taga pepa.”