Ua na o le punou o Loimata ua le tautala, ua lagona e le teine le mata muli i tala a lona tina. Ua lagona fo’i e Loimata le tiga o tala e lafo ane ia te ia i aso uma e mafuta ai ma lona tina. Peita’i, sa ia toe manatua, o tala nei, e le o ni tala e fa’apea ai ua le alofa lona tina ia te ia, e leai, o 'upu o le alofa moni, lea e lafo ane e lona tina ia te ia.

Na oso ane nei le toeaina ua fa’asalavei, ona ua fa’alogologo atu, e i’u lava ina o’o le a’ao malosi o le lo’omatua i si ona afafine, ae le i alu le la malaga i tua. “Ia o le a lua fa’atalitali la i le pasi o le afiafi, pe afai e te lua le manana’o e momoli oulua i tua, e a le na tonu?” Na tali le lo’omatua o Tagiilima ma lona loto fiafia, “Lameko, se pe e te fai mai i le taimi lenei ou te alu e fa’agutu le solofanua ou te ti’eti’e ai i lo’u aiga Lameko, e leai se faigata ia te a’u, ona o lea ua e malie mai ma te o ma Loimata e asi lo’u aiga.” Ua alu nei le talie a le fanau a Tagiilima, ma lulu o latou ulu, ua iloa lelei e tama, ua matua’i fuli le lo’omatua e fa’asuka lelei si toeaina, ua le magalogalo, ae ua matua’i suamalie e pei o le aisakulimi lea e fa’atau i le fale aisakulimi o ‘Isa.

Na savali ane nei Eteuati, ma musumusu i le taliga o lona tuafafine o Loimata, ona o lo ’o i ai le mea o lo ’o mana’o ai.  Ua pisi nei le lo’omatua mo le fa’avasegaina o tupe ma lisiti e tu’u atu i a Lolesio, le teutupe o le fa’ato'aga o Etena, a’o le i alu le la malaga i tua.  Na tu a’e nei i luga Loimata, ma savavali loa i fafo i le togala’au ma lona tuagane ma nofo nofo ai.

 “Eteuati, e ‘ese lava Tina ia ma ana tala e lafo mai ia te a’u. E le o malie lava lona loto i se mea ta te faia, ua ou le iloa po ’o le a se isi mea ou te faia, ina ia fiafia ai ma alofa mai ai, ia ta ita. Ua pei lava ta ita o se tagata ‘ese.” Na liliu ane nei Eteuati ma fusi  si ona tuafafine i lea taimi. Ua lagona le alofa, ina ua fa’alogologo atu i le tagi talatala a Loimataoapa’ula.

“Mata, ‘aua e te tagi, va’ai oe, o so ’o se matua alofa ma naunau i sana fanau, e a’oa’i, e lafo atu i ai tala e sili ona tiga, aisea, ina ia iloa, ma lagona ai e le tama po ’o le teine le mea e tatau ona fai. Afai la e te fa’alogo atu o lafo mai e Tina ia te oe 'upu ia, o 'upu o le alofa moni Loimata, leaga e leai se tina e mana’o e va’ai atu o ola falolo sana fanau, ia lafoa’i 'upu e le tau ai lou loto, ae ia e taofi mau i 'upu lelei e a’oa’oina ai lou olaga. Va’ai fo’i oe i a te a’u, po ’o a lava 'upu e lafo mai ia te a’u, ou te to'aga lava e folo le fuala’au o le onosa'i, onosa’i, onosa’i, ai ana o se fuala’au e leaga, ua leva ona ou oti, e a le ga.”

Na vave ona uma faigatala a Eteuati ma lona tuafafine, ae ua talie nei. Ua iloa lelei e Loimata uiga fa’aitu lua o lona tuagane o Eteuati, e i ai taimi e fa’alogo atu ua liu mai, a le o le na, e fa’alogologo atu Loimata ua fa’ai’i mai le leo o Eteuati, ai fo’i o le mea lea e pipi’i ai lona loto ia te ia.

“Mata, e te iloa lou 'ofu fo’i lea na ou va’ai o e 'ofu ai i le lotu i le Aso Sa lea ua te’a?” Na tilotilo ane nei Loimata i lona tuagane ma le le mautonu o lona mafaufau, pe aisea ua fesili ane ai i lona 'ofu lea. 

“Eteuati, o le a le mea ua e mana’o ai fua i lo’u 'ofu, o le 'ofu teine, e le fetaui le na mea o lou 'ofu fua i lo’u 'ofu, e le o oe o se teine, o oe lava o le tama.”

“Loimata si o’u tuafafine, va’ai fo’i oe, o le ituaiga fausaga lea e maua ai matou nei e lua itu, o le itu tama ma le itu teine, o le isi aso ua tama, o le isi aso ua teine, a pe a e tago e 'aumai lou 'ofu lena nanei ia te a’u, ae lua te le i o ma Tina, se i o’u fa’aaogaina.”

Ua ‘ata leo tele Loimata ma tu i luga. “Eteuati, o le a le uiga o lau tala, oka, oka e, o le a e ‘ofu fua lava i lo’u 'ofu, aisea?” Na tilotilo nei le tama i ona tamatama’i vae, ma ua ea a’e nei i luga, “Se ou te alu ai i le siva i le po taeao ma te o ma Lipine.” Ua u’u le gutu o Loimata i lea taimi ma tilotilo ane i a Eteuati. E moni lava o a ni isi uiga o Eteuati, ae e iloa lelei lava e Loimata, o si ona tuagane lava lea e sulu i ai pe a mana’o i se mea, ona o lo ’o faigaluega lelei Eteuati. “Ia ua lelei, ae tolotolo mai la i tua i le fa’amalama nanei e avatu ai, ae va’ai lo’u ‘ofu i masae, ua e iloa o oe e masomasoa, a’o a’u o le teine mo’i.” Ua ‘ata Eteuati ma toe tali ane i lona tuafafine, “E, va’ai outou, o outou na ua agasala ai le lalolagi e, talu ai le tou fia a’ai fua i le apu a Atamu. A’o matou nei, na o le eva lava i lau fau malu ma o keige e su’e kama, ae a.” Na ‘ata nei Loimata ma toe tepa tasi ane i lona tuagane, e taufa’alili ma fa’atiga ulu ia te ia, peita’i, e iloa lava e le tama’ita’i le naunau o ona tuagane ia te ia.

Ua na o le tutu nei o Lameko ma lana fanau tama ma tilotilo ifo i atigipusa e valu ma atopa’u e lua, ae le aofia ai ma ato fa’afafa e tolu. Ua u’u le gutu o le toeaina ma tilotilo ane i le lo’omatua, ua toe mafaufau le toeaina, pe o le a le taimi o le vaeluaga o le po na fai ai atigipusa nei, ona e leai lava ni pusa fa’apea sa ia va’ai i ai. O le isi itu na manatu i ai le toeaina, po ’o a mea o lo ’o i totonu o atigipusa nei ua va’ai atu i ai. Ua talie tama ma tilotilo ane i lo latou tina.

Na fesili nei le toeaina ona o lona fia iloa, “Tagi, o lua mea ia e 'ave i tua?” Na tali Tagiilima, “Ioe, Meko, o mea na e 'ave i si o’u aiga i tua.” Ua lulu le ulu o le toeaina o Lameko, ae oso ane le fa’asalavei tala o Eteuati, “Tina, e fa’afefea ona ofi i totonu o le pasi nei atigipusa. A’o a mea o i totonu o atigipusa, oka oka, se ua tumu lalo nei.” Na lili nei Eteuati ma savali, ma toe fa’apea mai, “Fa’atali atu se i o’u alu e va’ai la’u atopa’u po ’o atoa uma ou mitiafu ma o’u 'ofutino fou na fa’atau mai ananafi.”

Ua alu nei le talie a Lameko ma lana fanau ma tilotilo ane i si o latou tina e fai mai lava ia o lona aiga, o lona aiga, ae po ’o le a fa’afefea latou ia.

Ua liliu ane nei Tagiilima i lana tama tautala so’o, “Eteuati, na o le si’i lava o pusa na, tu’u le tautala so’o, oi, a tausi tausi outou ua outou feola ona tou le alolofa lea i lo’u aiga, o lo’u aiga na tu malosi mai i le tausiga o outou, na o ni fanau se ua fa’amasinosino mai mea e fai. E leai sa outou fe'au tou te tautatala ai i mea ia, na o lo outou malolo lava pau le na, a ou loto lava e si’i atoa le fale lenei e fa’atu i tua i lo’u aiga, o le mea lava lea e fai.” Ua leai se tasi na tali, ae ua liliu ane nei tama ma toe fa’atulaga lelei atigipusa aua le malaga a si o latou tina i lona aiga.

O totonu o atigi pusa nei, o lo ’o i ai 'ulo, o falai, o ipu, so ’o se ituaiga ipu, o sipuni, o tui, ma naifi fai mea’ai.  O isi atigipusa o pusa mea’ai. O le isi atigipusa, o ta’aiga ie ma ie ta’i lima iata, e tufa mo tagata o lona aiga, pe a taunu’u, ia tofu lava si tina ma le ie e su’i ai si ana puletasi. O totonu o le ato lea ua motu le ‘au ma toe su’i i le filo, o lo ’o i ai le vaega tupe, ua uma ona fa’avasega e le lo’omatua. O le tupe e tufa atu i nai ona tuagane ma a latou fanau, fa’apea teutusi a Fa’afeagaiga o lo ’o galulue i le galuega a le Atua i lona nu’u. O uiga ia o Tagiilima e le mafai ona galo i le loto o Lameko ma lana fanau, aua o le loto atoa o Tagiilima, o lona aiga.