“Oi, o le a le umi o le lua tafaoga lea ua ou fa’alogologo atu i ai?”  Ua tilotilo ‘ese le lo’omatua, ua toe mafaufau ifo, ua vave lana tala i le toeaina, o lea ua maua ai si ana ova i le va lea.

E le i talanoaina e Lameko ma Tagiilima le umi o le tafaoga, a’o lea ua fa’alogologo atu le toeaina, o le vaiaso atoa lea ua ta’u mai nei ia te ia.

Ua ‘ata le lo’omatua ma fa’apea ane, “Meko, o le a ea le mea e te fa’apena ai. Ua fia nei tausaga o ta mafuta, sa i ai se fa’aletonu i lo ta va.

Tailo ia te oe, aua ou te le iloa atu le feoa’i solo o ou tamatama’i vae i aso ia e te alu ai i lau galuega, a’o le fafine lenei, o lona loto, fatu ma le agaga atoa, ua i ou a’ao Lameko, tago la ia e milimili ma fa’amafanafana lelei, ina ia mau ai pea i ou a’ao, i aso o totoe o lou olaga.” Na iloa ane nei e Tagiilima le ‘ata a lona to’alua, na fa’apea ifo i lona mafuafau, ua sao fo’i sia vaega i si toeaina.

“Va’ai oe si o’u to’alua pele, e leai lava so’u sasi ma so’u manatu i nisi itu i le ta mafutaga. Ua moni ma fa’amaoni lo’u alofa i a te oe Lameko, a’o le mea lea ou te va’ai atu nei i ai, e foliga mai o a’u o se fafine leaga ma le le alofa ia te oe. Lameko, o le fafine lenei e tumu i le alofa, ua matutua le ta fanau, ma e leai lava se tasi e toe mana’o mai ia te a’u, ua ou lo’omatua. Tu’u ia ou uiga na, e leai se mea lelei o le ta aiga e maua ai, taumafai e tau fa’amatu’u ese le nonoa lea e te nonoa ai nei a’u,  ua na o lo’u tau mole ai, ua leai se ea e manava ai, ma tu’u mai sina avanoa se i o’u alu ai ou te tafao. Va’ai oe, ou te le o alu i se mea e fa’aalu ai ni tupe, pe afai o le mea lena o lo’o e mafaufau i ai, e leai, o lea ou te alu i si o’u aiga.”

Ua tau to’a mai le loto o le toeaina i lea taimi, “Tagi, e leai, ou te le o fa’apea atu ia te oe, e sa ona e alu i lou aiga. O lea ou te iloa, ua fia tausaga o ta nonofo i lo’u aiga, ma fai mea uma. Ae sa tatau ona ta talatalanoa pe talafeagai le taimi e alu ai le lua malaga ma le teine. Vaai oe, o o tatou manatu, e le o le finagalo lea o le Atua, e le iloa lava mea e tutupu mai, ona o’o lea o ta’ua i se tulaga faigata.”

Ua tau oso fo’i le nenefu o le ala ata lua a le lo’omatua i lea taimi, peita’i, sa ia manatu ifo e fa’apea, afai ae fa’afetaui e ia, o lona uiga, o le a le o’o ona alu le la malaga i tua i si ona aiga.

“Meko, malie maia lou finagalo, se’i ma o ma Loimata i tua, ua ou fia o’o i si o’u aiga, ua ou fia va’ai i nai o’u tuagane o lo’o nofonofo mai i le aiga. O mea fa’apenei, e maua ai le nonofo fealofani o aiga. E i ai fo’i o’u manatu alofa i nai o’u tuagane, e pei fo’i o oe i lou uso ma lou aiga, aisea la e fa’apologa ai fua le mafaufau i mea e le aoga?”

Na iloa mai nei e le toeaina le maligi ifo o loimata o le lo’omatua ma liliu ‘ese i lea taimi. Na toe faliu mai nei Tagiilima ma ona loimata, “Lameko, fa’alogo lelei mai lava oe, ua afu la’u tautua i lou aiga, o mea uma mea uma, ou te punou ma le onosa’i i mea e fai o lou aiga. Po’o a tiga ma faigata sa feagai ma a’u i le taumafaiga o mea o lou aiga, sa ou le fa’alogologo tiga Lameko, aisea, ona o lo’u alofa ia te oe ma mata o le ta fanau.  Ae afai o le mea lea e te mana’o ai, ia ‘aua ne i o ma o, ae a ma o fo’i ia ‘aua nei atoa se vaiaso. Lameko, e leai lava se faigata i le tagata lenei, na ona tapena lava o a’u mea, ma ou alu i lo’u aiga, ae tu’u oe ma lau fanau i lou aiga.

“Lameko, e leai se faigata ia te a’u, pe afai o ou uiga ia, o le tagata ma si ona aiga, o le tagata fo’i ma lona fa’asinomaga, oi, o le a e mana’o lava oe na o lou aiga, lou aiga, ae fa’afefea si o’u aiga. E leai la Lameko, ia o gatasi le futia ma le umele, o lou aiga, ma si o’u aiga, ona tu’u fa’atasi lea, ‘o o ta aiga’, ta te malu ai i itu e fa o le kelope, ma le lalolagi atoa, uma.”

Na toe liliu ‘ese nei Tagiilima ma savali sa’o loa i luma i le potu malolo lea o lo’o i ai lana fanau tama ma lo latou tuafafine. E taunu’u ane le lo’omatua o lo’o talatalanoa ma talie lana fanau i le malaga lea o le a alu a Loimata ma lo latou tina. Na fa’apea le fa’aupuga a Eteuati, “Talofa e, i si teine o Loimata, ia ‘aua lava ne i e tu fa’aletonu, aua ua e iloa lelei lava le tulaga e o’o i ai oe, e matamata fo’i le aiga i tua, ae soli fa’asolo atoa oe e Tina.” Ua alu nei le talie a tama ma tilotilo ane i si o latou tuafafine fa’alogogata ma le gutu oso, e le pau se upu, pe a le o i ai lo latou tina i le fale.

Na fa’ateia le mafutaga a le fanau ina ua o latou va’ai mai i lolatou tina ua savali atu i totonu o le potu ma soloi ona mata i lona solosolo. “Tina, Tina, o le a le mea ua tupu?” Ua leai se tali a Tagiilima i lana fanau. Na saofa’i ifo nei i luga o le nofoa i lea taimi ma ona loimata. Ua le mau tonu mafaufau o tama, fa’apea le teine o Loimata, po’o le a le mea ua tupu i o latou matua. E ofo fo’i le loto ona o le vave ona liua o le fiafia i le fa’anoanoa, sa talatalanoa nei ma talie, a’o lea ua va’ai atu ua ‘ese le tulaga lea ua i ai nei.