Ads by Google Ads by Google

Alofa: Fa'avae ai Aiga— Vaega 93:

E pipi’i tia ae mamao ala

Ua tu’ua a’oga sa feagai ma Loimataoapaula, ma ua maua ai nei le malologa a le tama’ita’i. O lana malologa lea na ia maua ai le avanoa, e asiasi ai i le aiga o si ona tina i tua. Na lagona e le teine le fiafia o lona loto, ona ua mafai ona tu’u ane ia e ona matua, e alu e asi le aiga o lona tina. Ua le taulau le fa’amoemoe o Loimata sa i ai, ona sa i ai le manatu o le tama’ita’i, o le a alu na o ia, peita’i, ua ma’ea ona tapena e lona tina o Tagiilima a la ‘atopa’u ma lana tama, ma o le a malaga fa’atasi se i asia  lona aiga, ma se i o’o Loimataoapaula i lona aiga.

Na toe liua le fiafia i le fa’anoanoa, ona ua mautinoa e le teine, e le mafai ona ia maua se taimi paninoa e tafao ai, ona o lea o le a la malaga fa’atasi ma lona tina.

Na tomumu nei Loimata i lona tuagane matua o Lolesio, “E ‘ese lava Tina latou, sa ou fa’apea fo’i o le a ou alu na o a’u, se i o’u tafao o’u toe vave mai ai, a’o lea fo’i ua fai mai e leai, o ia ma te o i tua”. E leai se tasi o le fanau po’o le tama fo’i o le aiga, na fa’ailoa i ai e le lo’omatua o Tagiilima le mafua’aga o le a o ai ma Loimata i lona aiga. Ma e o’o lava i le taimi ua fa’ae’e ai i le pasi, e le i logoina e Tagiilima lona to’alua o Lameko, i le mafua’aga ua fia o’o ai i lona aiga i tua.

E le i umi lava se va, ae fa’apea ane lona tuagane o Loleiso, “Loimata, fa’alogo lelei mai lava oe, ua uma ona ou talanoa atu ia te oe i ou uiga ia. Ua fa’alogo so’o tele o’u taliga o e muimui i lo tatou tina, e sa, sa lava ona e faia lea tulaga. Loimata, po’o  le a lou poto ma lou atamai le na e i ai, e ave’eseina e le Ali’i, pe afai e te le iloa ona ava i lo tatou tina. Ua e fa’alogo mai, ia e nofo uta i la’u tala lea ua fai atu ia te oe.”

Na liliu nei Lolesio ma savali ‘ese ma lona le malie i lona tuafafine. Ua nofo Loimata ua le tautala, ae ua fa’asolosolo ona mafaufauga i le tulaga o mea uma ia ua talanoa ane ai lona tuagane i lea taimi.

Ua sauni le malaga a Tagiilima ma Loimata e o i tua e asi le aiga o Tagiilima.Ua lagona le fiafia o le lo’omatua, ona o lea ua maua le avanoa se i toe o’o ai i si ona aiga. E moni lava e fai ma alu, ae se i vagana ai o fa’alavelave ona fa’atoa feiloa’i lea ma lona aiga.

O le isi itu na mafua ai ona fia alu le lo’omatua i tua, ona sa ia maua le tala mai i lona tuagane e fa’apea, o lo’o i ai le fuafuaga a le aiga, o le talanoaina lea o le suafa matai o le aiga, ma e tatau ona aofaga potopoto ai le auaiga atoa.  O le ala lea sa fia o’o ai i tua Tagiilima, se i talatalanoa ma ona tuagane e tusa ai ma lea mataupu.

Na mana’o Lameko se i o’o i le fa’aiuga o le vaiaso ona o latou o lea i tua ma Tagiilima ma Loimata, ona o tulaga o lo’o i ai lana galuega, peita’i, ua le mafai le lo’omatua lona fia alu i lona aiga. Na avea le mana’o, ma ala ua tau ‘ese ai fo’i manatu o le toeaina latou, ae sa fa’amalamalama e le lo’omatua le tulaga ua i ai lona mana’o, i lona fia o’o i tua i lona aiga, se i nofonofo tasi ai mo sina vaiaso ona toe fo’i mai ai lea. Ua malie le loto o Lameko, ma o le a fa’amuli atu ma tama, ae o la’ua ma Loimata, ma ua fa’apena ona fai.

O le isi mana’o o le toeaina, ia alu le ta’avale e momoli la’ua i tua, ona ua va’ai atu nei Lameko i le anoano o le uta lea o le a avea nei, peita’i, na leai mai i o le lo’omatua o Tagiilima, ona o lona fia ti’eti’e i le pasi ua masani ai si ona olaga, a’o talavou. “Tagi, ua ou le iloa la le isi tala o le a toe fai atu ia te oe, o lea ua ou malie atu e te lua o ma Loimata, a’o lea fo’i ua e le toe talia mai le isi o’u mana’o, ina ia momoli oulua i tua i le tatou ta’avale.O le aoga lea o le ta’avale a le tatou aiga, o lea fo’i e tu mai le ta’avale e fa’aaoga i le fa’atoaga, a’o lea lava e te le mana’o e momoli ai oulua.”

“Lameko, malie maia lou loto, va’ai oe, e i ai fo’i le mafua’aga ou te fia ti’eti’e ai i le pasi e alu i tua, e tele lava mafua’aga, o le mea muamua, se i o’u toe ti’eti’e i le pasi sa masani ona ou ti’eti’e ai ma ou matamata atu ai i fale o aiga, ma le lau usisui o le vao o lo’o i luga o le mafa. O la aso, e alu alu lava le pasi malolo, e maua ai le avanoa e matamata ai, a’o aso nei, ua le toe i ai na tulaga, ua alu atu lava le pasi ma alu sa’o loa i tua.”

Ua le tautala le toeaina, ua na o le tilotilo ane i lona to’alua. Na tau masalosalo le toeaina, ae na vave lava ona mou ‘ese ona fa’alogona ia, ina ua ia toe manatu i tausaga e tele o le la mafutaga, e leai se mea na fa’aletonu, leai se tulaga e ono iloa ai, ua fa’asipasipa le savali a Tagiilima i lo la va. Na toe ‘ata nei Lameko ma fa’apea ane, “Malie fo’i oe le lo’omatua, o nai masalosaloga lava, ae o mai e o ma lau tama se i e o’o i  lou aiga, ae matou fa’amuli atu ma tama i le fale, ma va’ai le fa’atoaga.”

O le mea ua tupu, ua galo nimo i le lo’omatua le fa’atoaga lea e pule ai, ina ua ta’u le la malaga i lona aiga ma lana tama teine o Loimata. O lea fa’atoa ona manatua o le fa’atoaga lea o le a ti’ai ae alu.

“Lameko, va’ai oe, e leai lava ni mea e tele o le fa’atoaga e faia, o lea ua uma ona fa’atonu tama faigaluega i mea e ao ona fai ma o le a galulue ai lava latou i le vaiaso atoa lea ma te o ai.” Ua te’i le toeaina i lea taimi ina ua fa’alogo atu, o le vaiaso atoa lea e alu ai le tafaoga a lona to’alua ma le la tama teine i tua.

 E faia pea!