“Le paia ma le mamalu ua aofia potopoto i lenei aso, ae maise o le paia i auauna a le Atua, o lo’o fa’afale le malu i lea itu ma lea itu o Samoa, ona o le Atua ma lona finagalo. Le paia ma le mamalu o matua, fa’apea le vasega o faia’oga o le Laumua nei. E le gata i lea, o alo ma fanau a le atunu’u ua fa’atasi mai i lenei aso.

O se aso taua lenei mo outou le fanau. Ou te fa’atulou atu. Se’e maia i ou se’etaga malu, ae o le a ou liliu e faigata le paia ma le mamalu o le aofia ua fa’atasi mai i lenei aso.”  Ua taletale le lo’omatua o Tagiilima ma fai lana manava i totonu toe fa’asau i fafo, ma ua amata loa ma lana lauga. “Ua ou tu nei i si’upapa…..tu i falagatete, e pei o upu masani a le atunu’u…..e taliu le tauta ae popo’e….e ta matalafi fo’i le agai……ae atu i le taufale…aua ua mamalu ma maualuga lenei aso.

O se aso sa lupe, o se aso fo’i sa taumate pe tua ma ni a le fa’amoemoe o fanau. A lea ua tini le uto e pei o lea upu, ua mapu fo’i i Fagalele le tautai matapala, aua ua a’e i le manuia taumafaiga na alo i ai ni o outou alo ma ni a tatou fanau, malo le onosa’i, fa’afetai i lo outou titi faitama.” Ua leai se tasi na toe pisa pe toe pa’o, ua sao le malae atoa. Ua na o le fa’alologo nei o tagata i upu ua lafo e le lo’omatua o Tagiilima i lea taeao.

“O Loimataoapa’ula, e to’atasi lava ia, ae to’atolu la ma fanau tama. O lea o lo’o auai i le sauniga i lenei taeao. E le mapu le fautua, e le pe fo’i le lamepa o le a’oa’i i mea lelei ma le aoga mo sona lumana’i.  E tasi lava le upu ou te fia tima’i atu ai i le mamalu o matua i lenei taeao, “Ia ‘aua ne i mate lau lamepa, ia sulusulu atu pea, e a’oa’o ai fanau, fautua ma tima’i, fa’atonu i mea lelei e ao ona o latou faia.  O a’u o se tina e fai i ai tala a la’u fanau ma tagata o le matou nu’u e fa’apea, o a’u o se tina saua, o a’u o se tina e le taofiofi, aua e le mapu le sasa. A ou manatua atu, pe tusa i le tolusefulu aga’i atu i luga ia salu lima a le matou aiga, a ou va’ai atu ua tau leai ni tuaniu o le salu lima, ou te taumafai ia toe fafau se isi salu lima fou.  Ae ou te ta’utino atu i le taeao lenei, o le aoga lea o le salulima, ona o lea ua tula’i mai i le manuia a’oa’oga a Loimata. E ui ina fa’apea e to’atasi ia e leai sona uso, ae e le mafai ona taofia ai le sasa ma le fa’atonu, a’oa’i ina ia ona iloa ai tulaga e ao ona fai. Taga’i i suiga fou ua i ai le olaga i nei onapo, e ese le faigata, ua tele vave suiga fou nei ma ua lamatia ai ola o fanau.”

Ua toe manava i totonu le lo’omatua, e leai se lagona o se li’a pe fefe fo’i, ua to’a lelei Tagiilima i le momoliga o lana fe’au ina ia malamalama ma silafia le uiga o lana folasaga. “O tatou matua, o le papa ma le fa’apaologa, e malu ai a tatou fanau, aua so latou lumana’i manuia, ia ‘aua ne i o tatou tu’u fau i a tatou fanau e fai o latou loto, ae ia o tatou galulue malosi e puipui ma a’oa’o i tulaga lelei ina ia ‘aua ne i toe te’a ‘ese ai. Mo alo ma fanau, ia outou maua le agaga o le tauivi i a outou a’oa’oga, aua tou te le mafuta pea ma matua i lenei olaga, ia outou usiusita’i ma fa’aaloalo i o outou matua, ona outou maua lea o se olaga e silisili ona fa’amanuiaina.” Na liliu nei Tagiilima ma tilotilo atu I le itu o lo’o saofa’I mai ai lana tama ma lona tama, “Loimataoapa’ula, ua e fa’afiafia o ma loto ma lou tama i lenei aso, fa’afetai i lou tauivi, fa’afetai ua e talia tima’iga ma fautuaga e tu’u atu ia te oe, ae ia fa’aauau pea, ia ‘aua ne i motusia, ia fa’asilisili lou mata’u i le Ali’i, ona manuia lea o lou olaga. Le mamalu o matua fa’apea le mamalu o faia’oga, ua ma’ea le folasaga a le lo’omatua, ae ou te momoli atu le fa’afetai, mo le avanoa matagofie ua mafai ai ona ou tula’i atu i lenei taeao, ia manuia toe sauniga o totoe o le tatou aso. Soifua ma ia manuia.”

Ua fa’atalofa nei Tagiilima i le ali’i Pule Lua o le Kolisi ma fa’amalo ane i le matagofie o le tima’iga ma le lauga a le lo’omatua e pei ona i ai i lea taeao. Ua liliu nei savali atu i le itu o lo’o saofafa’i mai ai lona to’alua ma le la tama teine e to’atasi e pele i lona loto. Ua fusi mai nei e Tagiilima lana tama teine e toatasi, le teine e fa’alogogata, le teine e tali upu i isi taimi, le teine e fia papalagi ma ona uiga, e pei o uiga o le aiga o lona tama. Ua maligi ifo loimata o le teine i le ofu o lona tina i lea taimi. Ua tali mai le Ali’i i ana talosaga i taimi uma ina ia fa’afiafia ai loto o ona matua, e ala lea i lana taumafai atu mo ana a’oa’oga.

 Ua alo atu nei le aiga atoa e sami le fa’ailoga a Loimataoapa’ula i lea afiafi.Na fa’atumulia le fale atoa o Lameko ma Tagiilima i a la uo, o aiga ma aumea mamae. Ua manuia le taumafaiga a le la tama teine, o lea na malilie fa’atasi ai ina ia faia se ‘aiga e fiafia fa’atasi ai le aiga atoa, ona o le fa’aeaea aiga o le tama’ita’i o Loimataoapa’ula.