Ads by Google Ads by Google

Alofa: Fa'avae ai Aiga— Vaega 90

Na toe fa’apea ane nei Eteuati, “O le tulaga fo’i lea e i ai Loimataoapaula, aua ou te iloa e to’a limasefulu tolu le aofa’i o le latou vasega, ma o le upu moni a ia, e tu limasefulu tolu si o’u tuafafine o Loimataoapaula i le latou vasega."

Ua alu nei le talie, ae na tu a’e i luga le teine ma savali ese mai le laulau ma lona le malie i lona tuagane o Eteuati. “E, aua le faia fua si o’u Sis, e sau nei Sis ma le mea atoa o le aso lenei, o le a tatou va’ai i ai, a Sis.”

 Na toe liliu ane nei le lo’omatua o Tagiilima i a Eteuati, “E a, o a ga sisi a Eteuati, o a sisi na e ta’u mai, tautala fa’alelei ma fa’amanino lelei mai, ‘aua le fa’anunumia le faiga o fa’amatalaga, va’ai fo’i oe i o’o atu i ai lo’u lima ae tatou te le i o i le lauga togi a Loimata.”

Ua na o le nofo o Eteuati, ma fa’apea ifo ona mafaufauga, ‘Talofa e i si o’u tina, o le mea lea e maua, e tuli atu e lona tama e alu i le a’oga, ae alu pele pinesulu, se mea a fa’aletonu o nei mea, o le ituaiga fausaga o afi nei, o fausaga o afi tuai mai aso la. E fiu lava le inisinia e tau fa’asa’osa’o paipa ae ua le mafai leaga o afi nei, o afi ‘agagata ua tau le maua ni inisinia lelei e toe fa’amalosia afi ia, leaga ua amata ona pala ma ‘elea. Ai se’i iloga o inisinia fa’apitoa la e faia pomu atomika ona fa’atoa mafai lea ona fa’asa’osa’o.” O mafaufauga ia o Eteuati na ‘ata ai nei ma tu a’e i luga, ua ao ipu sa i luga o le laulau ma fa’anatinati loa i tua, ne i te i ua toe lavea i se fa’amatalaga a lona tina.

Ua alo atu nei le Kolisi mo le laugatogi a le fanau a’oga, fa’apea ma le tufatufaina  o fa’ailoga, ae maise o lipoti mo le fa’aiuga o le tausaga a’oga.  Na va’aia i lea taimi le fa’atumulia o le lotoa atoa o le Kolisi i le mamalu o matua, o uo ma aumea mamae i lea aso. O nisi o matua, ua o atu sauniuni lava mo le taliaina o fa’ailoga a o latou alo ma fanau, o nisi, e tau matemate pe maua se fa’ailoga a fanau pe leai.

Ua savavali atu nei Lameko ma Tagiilima ma le la tama teine o Loimata, ae mulimuli atu i tua Eteuati. O se savaliga na mata’ina e tagata, ona o le va’ai mai i le savali atu a le teine o Loimataoapa’ula, o se tama’ita’i e lalelei tele. O lea la ua taulia atu ai nei ma Eteuati, ona e tutusa lelei foliga o Lameko ma lana fanau, ae se i vagana ai Eteuati, e so’o i a Tagiilima le tau nenefu o ona foliga.

E fai lava tala a tagata, o le so’o uma lea o Tagiilima, o le tama o Eteuati. E le popole i ai Eteuati i lea itu, e sisi lava le fu’a a Eteuati latou e leai se mea e popole ai fua.  Ua iloa lelei e Eteuati e fai uma e tina o le ekalesia ma le nu’u fa’amatalaga e uiga i si ona tina, ma e fai so’o lava e le tama le tala e fa’apea, “E a, e uliuli a le tu’u’u ae otagia, a’o le pa’epa’e a le sugale e ma’imau le taimi, e le aoga i se fa’alavelave.” E talie nai ona matua pe a fa’alagilagi e Eteuati lona itu lea, ae maise ai pe a o’o ina fai tala a le autalavou. E fai ma fa’aluma Eteuati i aso e fai ai fiafia a le Autalavou ona e tali e ai le Faifeau ma lona faletua i ana amio ma ona uiga.

Ua amata nei le sauniga i lea taeao, e le i umi ae alu atu le solo a Lolesio ma Emani, ua fa’ate’ia le lo’omatua ma le toeaina, ona e leai se tala na fai e o atu uma le la fanau tama i le laugatogi a lo latou tuafafine. Ua na o le tilotilo ane nei o Lameko ia Tagiilima, ae ua le tautala le lo’omatua i lea taimi. Na iloa lelei atu e Tagiilima lana tama o Loimata, ona o foliga lalelei o le tama’ita’i, lea e i ai taimi e sioa i ai tagata. O lona pa’epa’e o le itu o lona tama, a’o le mata manaia, o le itu lea o lona tina. O lona laulu fo’i e so’o uma lava i le lauulu o lona tina o Tagiilima.

Ua nonofo fa’atasi nei Lameko o Tagiilima ma le la fanau tama e to’atolu, na mata’i uma e tagata le aiga lenei i le taimi o le sauniga, ona o le mananaia o tama ma le tino lelei o tama. E le i ano lava i ai le lo’omatua o Tagiilima i lea itu, ua na o le tilotilo atu nei i lana tama teine, ma lona mafaufau pe o le a fa’amanuiaina le a’oa’oga a Loimata pe leai, e ala i le maua o sana fa’ailoga.

Na muamua le fa’afeiloa’iga a le Pule A’oga, o le ali’i papalagi lea na pule i le Kolisi i lea vaitaimi, ona soso’o ai lea ma le Sui Pule A’oga i lana tautalaga i le gagana Samoa, e tusa ai ma le autu o le aso. Ina ua ma’ea lea, na alo atu loa mo le tufatufaina o fa’ailoga a vasega ta’itasi e pei ona i ai le polokama ua ma’ea ona fa’ataoto e le Kolisi.

Na muamua lau fa’ailoga a le vasega a Loimata, ona o le vasega muamua lea i le amataga mai ma le fa’asologa o le polokalama. Na alu alu le fa’alauina o tamaiti ua maua o latou togi ua tau mou atu ai ma fa’ailoga o lo’o i luga o le laulau. Ua na o le pupula atu nei o le lo’omatua o Tagiilima, o le a uma atu lava fa’ailoga e leai se igoa o Loimata o fa’alauiloa mai mo se fa’ailoga. Ua le tautala le lo’omatua i lea taimi, ua o’o fo’i i le toeaina o Lameko, ua pei na misa ma se tagata. O tuagane o Loimata ua na o le punonou nei e foliga mai o se lotu o lo’o fai.