Ads by Google Ads by Google

Alofa: Fa'avae ai Aiga— Vaega 87

Ua ‘ata’ata Lameko ma fa’apea ane i lona to’alua, “Ia o le a fai fua e a Queen Charlotte latou.” Ua alu nei le talie a Lameko ma Tagiilima. Ua fa’asolosolo nei a la tala i le uso la’ititi o Lameko, le tama o Lipine.

O Lipine, ua alu lava i ta’iga a fa’afafine, o le uso lea o Lameko e auau lava i ai Tagiilima, ona e le galo i le lo’omatua le faiga o ia e Lipine i po po fou o le mafutaga a Lameko ma Tagiilima,  e le pei o se uso o Lameko, ae ua pei o lona tuafafine. E fai fai mea fa’atasi ma Tagiilima, e le mafai ona alu ‘ese. Ae ina ua matua nei, ua le mafai ai ona tu’ua lana amio lea. So’o se mea e mana’o i ai Lipine, lea ua fa’aigoa nei i a Queen Charlotte e le to’atele o tagata, e alu ane lava i a Tagiilima. O nisi o aso, a mo’omia e Tagiilima i le su’iina o ie e teuteu ai lona fale, e tuli lava le tama e a’ami mai Queen Charlotte. O itu fa’a’afa’afa la ia o le uso o Lameko, lea ua so’o i ai le la tama o Eteuati.

Ua manatua vave e Lameko ia talatalanoaga a ona matua a’o soifua i la’ua, e talatalanoa fa’atasi e uiga i lona uso la’ititi o Lipine, o le ala lea na fa’apea ane ai i a Tagiilima, “Se e leai lava se mea e leaga ai Tagiilima, afai lava na ola mai Eteuati, o ona uiga ia, ia ta onosa’i, o galuega mamana a le Silisili ‘Ese, e le fa’apito mo se to’atasi. O a fo’i fuafuaga o i ai le ta a’iga, a lea ta te molimauina le alofa o le Atua e auala ‘ese’ese mai mo ta’ua ma tamaiti, tu’u ai pea le tama latou. Aua ta te fa’apologaina lona loto ma lona mafaufau, aua a fa’apea loa o le a ta faia ia tulaga, ona o’o ai lea i nisi tulaga ta te le fia va’ai atu i ai. A ta talia ea la na o mea lelei, ae fa’afefea mea leaga, o le olaga lenei o le filifiliga lava a le tagata e manuia ai.” Ua le tautala le lo’omatua, ae ua fa’asolosolo ona mafaufauga I lana tama o Eteuati.

Ua o ane nei Lameko ma Tagiilima ua fa’asavilin i luma o le la fale ma talatalanoa ai. O luma o le fale lea, o lo’o i ai se toga la’au ua sili lona matagofie i le va’ai. O le taimi lea o le afiafi, ua fa’alogoina le filemu ina ua ma’ea talosaga o le afiafi fa’apea ma le taligasua a aiga. O lea la ua fa’aaoga le taimi lea e mafuta ai aiga ma talatalanoa ai matua ma fanau. O le tulaga lea ua o’o nei i ai le aiga i lea afiafi. Ina ua ma’ea le tapenaina o le mea na a’ai ai, na alu ane loa le solo a tama i fafo e fia talatalanoa ma o latou matua.

Na muamua taunu’u ane Eteuati i fafo, ma ua talatalanoa nei ma ona matua. “Tina, e le i toe sau Lipine?” Ua alu nei le tali e, a le lo’omatua ma le toeaina, ona ua mafaufau fa’atoa uma nei lava ona talatalanoa i a Lipine, a’o lea ua fesili mai i ai le la tama.

“E ‘ese lava oulua ia, o lea fo’i ta te fesili atu, ae ua lua talie, o mea fa’apena e fa’aoso masalosalo ai le tagata.”  Na vave ona motu le ‘ata a Tagiilima i lea taimi, ina ua fa’alogo mai ua leo teine atu Eteuati. “Eteuati, tu’u lou leo le na e, ou te le fia fa’alogo atu i ai, tautala mai i lou leo na e ola mai ma oe a’o e la’ititi, leo tama mai ona lelei lea o si a ta faiga, ae le o le fa’ai’i mai o lou leo o lea ma te talatalanoa ma lou tama. Va’ai fo’i ta’ua i o’u tu atu i luga ia te oe.” Ua le tautala Eteuati, ae ua na o le fa’amimini o ona tau’au ma saofa’i i luga o le nofoa. Na fa’apea ifo ona mafaufauga, “Ua leai fo’i se mea na ou sau ai fua i fafo, lea ua utia ai i le va lea.”

E le i umi, ae taunu’u ane le teutupe ma le failautusi a le lo’omatua. “Lolesio, ua uma ona tapena mea i tua, a’o fea o i ai Loimata?” O le fesili ane lea a lo latou tina. “E Tama, ma Tina, ai fo’i o alu Loimata e fa’apuna i totonu o lona potu, ma fai ai lana tatalo le leoa, ia maua sana fa’ailoga taeao.” Na ona savali atu lava o Lolesio, tau ma le po i le ulu o Eteuati. “Tu’u le tautala so’o pe a fa’alogo atu e leaga lima.” Ua tali e, nei Lameko ma Tagiilima ma tilotilo ane i le la fanau.

E le i tele lava i se pito, na ona liliu ane lava o Eteuati, “E a ali’i Lolesio, a fa’alogo atu le tagata na te mafaia ona tautala lea, a fo’i o le mea lena e tele ai a’u tala, aua e lava mea faigaluega e fa’atino ai.” Na toe liliu mai nei Lolesio, ae ua alu i le atoa  Eteuati ma fa’aumu, e ula mai i lona uso matua. “Lolesio, e a, ua e ‘asi mai fo’i i lo’u lima taumatau e alu atu se i tau i ga gutu.” Ua alu nei le tali e, a Lameko ma Tagiilima, ae taunu’u ane loa ma Emani, o le tama lona lua lea o le fanau a Tagiilima ma Lameko.