E fai lava tala a le lo’omatua i totonu o le ta’avale, ae ua na o le pupula mai o lona tama i le fa’ata, ma ata mai i lona afafine lea e nofo i le nofoa i le pito i tua. “Loimata, va’ai lelei ou ofu a’oga ne i ma’anuminumi piliki, tu’u le ta’alo, na o le tama e ta’aalo ma mimita vale, a’o le teine, e tausi lava lona mamalu.  Ia e usita’i i le faia’oga, ou te fa’alogo loa i sina tala e uiga ia te oe, ia ua e iloa lava le tulaga e te o’o i ai, na ona ou sau lava toso fa’atata lou ulu, ae matamata tamaiti a’oga ma faia’oga e, ia e iloa lelei le tulaga le na e te o’o i ai, pe a e le usita’i.”

 Na o le tilotilo o le teine i fafo ua le fia fa’alogo i tala a lona tina fa’atasi ai ma ona mafaufauga lilo ua na o ia na te iloaina.  O le loto o Loimata o lona tama, ai ona o le fa’apea o le ‘ote o lona tina lea e fa’apea ai uiga o le teine i lona tina. Ua tu tonu nei le ta’avale i luma o le falea’oga ua a’apa ane nei Loimata ma tatala le faitoto’a ina ia la’a  ai i fafo, e le i faia ia tulaga e le teine, ae ua leva ona i fafo vae e lua o le lo’omatua. “Loimata, sau ta o e momoli oe, ou te fia feiloa’i i le faia’oga se i fai i ai sa’u nanu pe mata e lelei.”

Ua na o le ‘ata o le toeaina o Lameko, “Se Tagiilima, sau ia ta o, tu’u le teine e alu, o le a tuai a’u i la’u galuega.” E le i ano ane i ai Tagiilima i lea itu, ua a’apa mai nei ua u’u atu le lima o Loimata ma alu loa ma le solo i le falea’oga. Ua tilotilo mai nei faia’oga ma tamaiti a’oga i le solo lea e alu atu a Loimata ma lona tina. O nisi o tama a’oga, ua amata ona ‘eu’eu e le tasi le isi, ma fa’asino le savali atu a le tama’ita’i o Loimata.

O se tama’ita’i e lalelei, o se tama’ita’i, e tau mulimuli i ai mata o tama tane, ona o le lalelei, tu’u ane i lona faitino, o le faitino uma lava o lona tama lea e maua e le teine. O lona laulu e uliuli fa’asasa’o ua toe titi o’o i ona tulivae. Ua leai se laulu o Loimata e le o momoe i lalo, i le taeao lea ua o ai Tagiilima ma Lameko e momoli i le a’oga, ona ua toetiti uma le fanu’u Samoa, ona fa’amomoe ai, ma toe selu ma toe selu e lona tina.

Na ona taunu’u lava o le solo i totonu o le ofisa o le Kolisi, fesili loa le lo’omatua po’o ai le pule a’oga, na sau le tali e fa’apea, o le palagi o le pule a’oga, a’o le Samoa e pule lua.

“O, ia ou te fia feiloa’i la i le Pule Lua pe afai e maua so’u avanoa fa’amolemole.”  Ua fai nei le talatalanoaga a Tagiilima ma le pule lua, ae o lo’o fa’atali pea Lameko ua tuai i lana galuega. “Lau susuga i le ali’i Pule Lua, afai lava e fa’alogogata la’u tama, ia e logo maia a’u, ua uma ona a’oa’i Loimata i mea e ao ona fai.”

Ua tilotilo nei le Pule Lua i le lipoti a Loimata mai le A’oga Tulagalua sa a’oga ai i lo latou nu’u, na fa’ateia le tamaloa i lipoti a le teine o Loimata ua ia taua’aoina nei, e leai se mataupu e pau, e amata mai lava i le vasega muamua, e o’o i le vasega lea na fa’au’u mai ai, e ave ave sili lava Loimata i le a’oga. Na tilotilo ane nei i a Loimata ma na iloa ai e le Pule Lua, o se tama’ita’i filemu ona uiga, e le o se tagata e tautala so’o, ma ua maua fo’i vasega o le a ave i ai Loimata, o vasega ua na o tamaiti e maualuluga togi e i ai.

Na iloa lelei mai e le Pule Lua le sogi atu a Loimata i lona tina, ma ua savali ‘ese loa le lo’omatua. Na toe liliu lava ma vala’au mai i lana tama, “Tofa Loimata, ou te sau e avatu oe pe a tu’ua le a’oga.” Ua tu le teine i lea taimi ma tilotilo, i le savali ‘ese atu a lona tina. Na fa’apea ifo i lona loto, “Talofa e, i si o’u tina, o le a ou toaga i la’u a’oga ina ia fa’afiafia ai le loto o lo’u tina.”