Ads by Google Ads by Google

Alofa: Fa'avae ai Aiga— Vaega 73

Ua tilotilo ane nei Emani i lona tama lea o lo’o nofo i le ulu o le laulau ma fa’alogologo i le fetalia’iga a lana fanau lea e fai nei. Na geno ane nei i ai le toeaina e fai sana tala i lona tina.

“Tina, e leai se tala, o lea na ou fai i a Loimata, po’o ia manatua o taeao e tatau ai ona alu e talatalanoa ma le pule o le Kolisi.”

“O, ia o le na la, talanoa fa’aSamoa mai, ona ou malamalama ai lea. Ae le o le tou fenanui mai o lea ou te nofo. Mafaufau lelei lava, o le atamai lea ua outou maua, o le atamai na maua i lima nei e, o lima lava nei na galue malosi, ina ia totogi ai a outou pili o le a’oga. E moni lava o le tou tama e faigaluega, ae le taitai ona lava le fa’asoa mo a outou a’oga. Ae a, o lima nei na fa’atinoina mea uma, le na ua tou atamamai ai. Aua, aua lava ne i outou fa’apea ifo, o le tou tina e valea, e le i lava ana a’oa’oga e. Ia outou nofo uta i ai i la’u tala le na ua fai atu ia te outou.”

Ua tu nei i luga le lo’omatua ma tulei i totonu le nofoa ma savali ‘ese loa mai le laulau’ai, ua le iloa e le toeaina ma lana fanau le mea o le a fai. Na tu a’e nei i luga Lameko ma savali mai i luma ona o lona fia malamalama pe o le a le mea ua tupu. E le i umi lava, ae fa’alogoina e tamaiti le tagi tautala a le latou tina.

“Lameko, e mafua mea uma nei o oe, e te fai tama leaga, a ou ‘ote i tamaiti, na o lou nofonofo lava. E foliga mai ua tou ula mai ma lau fanau ia te a’u. Va’ai oe, e faigofie lava, na ona tapena lava o a’u mea, ou toe fo’i i lo’u aiga, ae tu’u ai oe ma lau fanau faitalia outou.”

“Tagi, ua e fa’apena mai ea o le a ia te a’u ma tamaiti, e leai lava se manatu o tamaiti fa’apena, afai fo’i o le a sau fa’alogo mai, ia malamalama lou mafaufau, ua aga’i i luma le olaga, ua le toe pei o tulaga sa ta i ai.” 

E le i uma mai tala a le toeaina ae toe tali atu e le lo’omatua, “Lameko, ua ou lagona le fa’anoanoa, va’ai fo’i oe, po’o le a lava lo’u le lava, ae taumafai lava le fa’atoaga ma mea fafaga, ona o lo’u va’ai i le ta fanau, ae maise o lou aiga, i le fai fa’alavelave so’o, fai fa’alavelave so’o. E sea sea fai mai ni fa’alavelave a si o’u aiga i tua. Ae va’ai oe, ua tu’i lo’u ola i lou aiga ma lau fanau, a’o lea ou te va’ai atu e ‘ese faiga ia ou te va’ai atu nei i ai i le ta fanau, ona fa’anoanoa ai lava lea o lo’u loto Lameko. O le itu e leaga ai, e te le tautala, taumafai e tautala i tamaiti, o le a e lafo mai ia te a’u le mamafa o le avega, ae fa’afefea oe ma ou tiute, o oe o le ulu o le aiga. O le mea lea ou te va’ai atu nei i ai, ua ulu a’u toe si’usi’u, ma o se tulaga ua sili ona le fetaui lea tulaga Lameko. “O le tofi lava ia o le tama, o ia o le ulu o le aiga, a’o le tofi o le tina o le si’usi’u, o iina e maua ai le feavata’ ma le tulaga e tatau ona i ai le fa’asinomaga o le tagata.”

Ua na o le moeiini o mata o le toeaina i lea taimi, ua le iloa se tala o le a fai ane i le lo’omatua. O talanoaga nei e fai a Lameko ma Tagiilima, o lo’o fa’alogologo mai nei i ai le la fanau.

Ua na o le punonou o tama ua leai se tasi e toe tautala. Ua punou ifo Loimataoapaula ma ona loimata i lea taimi. Ua lagona i lona loto uiga o upu o lo’o lafo e lona tina i lona tama. Ua tu a’e Lolesio ma savali ‘ese mai le umukuka ma ua saofa’i nei i talane o lona tama i le potu malolo. Ua fa’asolosolo ane nei le fanau, ma ua amata ai loa le mafutaga a Lameko, o Tagiilima ma le la fanau o Lolesio, Emani, Eteuati ma Loimataoapaula.