Ads by Google Ads by Google

Alofa: Fa'avae ai Aiga— Vaega 137

O Lameko i lea taimi, ua na o le punou ifo ma u’u mai le lima o si ona atali’i, ona ua iloa e le toeaina ua tigaina Eteuati. O tausaga e tele o le mafutaga a Lameko ma Tagiilima, e le o’o le lima o Lameko i lana fanau. O Tagiilima, e le mafai ona tu’ua ana tima’iga ma e i’u lava ina o’o i ai lona lima i lana fanau, e o’o mai lava i le taimi lea ua matutua ai tama. I le amataga mai o le aiga, e fa’ata’afili e Tagiilima lana fanau tama i le salu tuaniu, a le o le na o le i’ofi o le umu, e ta’aalo ai le lo’omatua i lana fanau.

E le fo’i lava le sasa i a Loimata, po o le fai mai o tagata i a Tagiilima e alofa i lana tama teine na o le to’atasi, e le fo’i le sasa a le lo’omatua. E o’o lava ina matutua tama ma le teine, ua le toe sasaina i le salu tuaniu, ae ua falo i ai le taumatau o le lo’omatua. O le tulaga la lea ua o’o nei i ai Eteuati, ina ua taunu’u atu i Samoa.

Na iloa e Lameko ua fai lava si tigaina o si ona atali’i i le malosi o le a’ao o Tagiilima. Na a’apa ane nei ma tau fa’atu i luga Eteuati, ae fa’alogo mai o mea masei mea ia ua fai atu i tua. Ua felelei solo ipu, o mea uma o le fale ua na o le u’u lava e le lo’omatua ma ato i le isi itu. Ua le iloa e Lameko se tala o le a fai ane i a Tagiilima ina ia malie ai lona loto, ua le iloa fo’i e le toeaina po o le a se auala o le a ia faia ina ia filemu ai Tagiilima, ona o lona popolega na e te’i ua oso se ma’i fatu o lona to’alua.

“Fanau leaga, fanau le alolofa, ua maua vae ma lima ua maua le poto ma le atamai, a lea, le ituaiga atamai la lea ua maua i aso nei, ua fai loto, e tainoino e, ua tausi tausi ua ola, lea ua pei e fai mai o latou loto.” Ua mou ‘ese atu le pa tia pa ta o le fale, ae ua fa’alogoina nei le tagi aue aue, o le lo’omatua.

Ua manava ane galuega a Lolesio ma Emani i lea afiafi, ae ua fa’ateia i le tau muamua mai i lo la tama o Lameko lea o lo o tau fai atu i le ie malulu foliga o Eteuati. Na o la iloa mai nei lo la uso la’itiiti, o le fesili muamua lava, po o fea o i ai Loimata. Na tali e Lameko le fesili a tama, ua na o le lulu o ulu ma tilotilo ane i a Eteuati. “Eteuati, sa tatau lava ia te oe ona u’u le lima o Loimata ma 'au mai, ua e sese i le itu lea. Sa tatau ona fa’aaoga lou mafaufau i le mea e tatau ona fai, ua e fia fa’alogo la i ai.”

O le mea ua tupu, ua le toe fia alu Eteuati i Samoa, ua fiafia e nofo i Tutuila, ona ua amata ona masani i isi ona uso ia e i ai lava o latou manatu o latou o teine moni, ua le toe fia alu ai la, aua e le sao ana faiga ia i lona tina.

“Tama, o fea o i ai Tina, ua ma le va’ai mai fo’i o nofonofo atu e fa’atali le ma manava mai?” O le fesili lea a le tama matua o Lolesio, e le i umi, ae toe fa’alogo atu Lameko ma lana fanau tama ua toe sau le tagi aueue a lo latou tina.

 “Eteuati, toe fo’i i Tutuila, fai ia Loimataoapaula, ua ou fai atu, e tu’u ifo lo’u tino i le tu’ugamau, ou te le toe fia va’ai atu i ai. E, se mea a leaga o mea fa’apenei, ai loga e iloa e nei fanau, ua fofo’e atu pa’u ma a’ano, ua na o lo’u fatu lea e totoe, ua leai, ua alu ma Loimataoapaula lo’u fatu ma lo’u loto atoa….”