Ads by Google Ads by Google

Alofa: Fa'avae ai Aiga— Vaega 136

Ua faigaluega Loimataoapaula i Tutuila, ma o se galuega ua sili ona mautu, o se galuega fo’i e tele le tupe e maua ai. Ina ua mautu le galuega lea a Loimataoapaula, sa taumafai ina ia toe maua se isi ana galuega, pe a i le fa itula pe a manava mai i lana galuega lea. Na i’u ina alu le su’ega galuega a le teine i le faleoloa o se ali’i Kolea ua leva ona fai ana pisinisi i totonu o Tutuila. O le galuega la lea a Loimata, e amata i le lima i le afiafi ae manava i le sefulu tasi i le po. Na iloa lelei e le ali’i Kolea uiga o le teine, o se tama’ita’i e galue malosi, o se tama’ita’i e fa’amaoni i lana galuega, o se tama’ita’i fo’i e tausa’afia ona uiga pe a feiloa’i ma tagata.

O le ali’i Kolea lenei, e au mai i lona aiga i Kolea mea uma o le faleoloa, lea e i ai nei i totonu o Tutuila. E le o iloa e Loimataoapaula, ua vala’au le ali’i Kolea i lona aiga, ae maise ai o lona uso o lo’o fa’agaioia a latou pisinisi i Kolea, ma fa’ailoa i ai o lo’o i ai se tama’ita’i lalelei e fetaui tonu ma ia.

O lea la e pisi Loimata i le fa’atinoina o lana galuega, ae na te le o iloaina tulaga fa’alupelupeina lea e fai nei e le ali’i Kolea. Ua tofia e le Kolea le tama’ita’i o Loimata na te fa’afoeina le masini tupe o le faleoloa, ona ua mautinoa e ia o se tama’ita’i e fa’amaoni i lana galuega. Ina ua amata Loimata i lana matafaioe lea, e leai se sene mu mu e pau i le faitau a le teine. E leai fo’i se lisiti e tasi e fa’aletonu o fa’atauga a tagata, e o gatasi lava lisiti ma le aofa’iga o le tupe e maua i lea aso ma lea aso.  Ua tu’u atu fo’i le fa’amoemoega o le Kolea i a Loimata na te va’aia le faleoloa tele lea, ona o lo’o i ai le isi faleoloa o lo’o i le taulaga i Fagatogo. E leai se fa’aletonu o Loimataoapaula i le tulaga lea, e le mafai ona fa’atamala le teine i ona tiute e tatau ona fai. Na toe maua le fa’asiliga i le totogi o Loimata e le ali’i Kolea, ona o lona va’ai i le galue malosi ma le galue fa’amaoni o le tama’ita’i.

 O le siaki muamua lava a le teine, na fa’atau ai le ato ta’ita’i mo lona tina o Tagiilima e pei ona i ai le mana’oga o lona tina lea o lo’o teu loto pea. O le ato ta’ita’i lenei ua sili ona matagofie i le va’ai fa’atasi ai ma le tau o le ‘ato, ae sa le i popole i ai Loimata i lea itu, o lea ua fa’atau e le teine mo lona tina. O le isi itu na ia lagona ai le fiafia, ona o le tupe sa maua mai i lona afu, ma ana taumafaiga.

Ua tonu nei i le manatu o Loimata, ua sili pe a alu Eteuati i Samoa e feiloa’i i o la matua ma fa’amatalatala i ai fuafuaga ua la malilie fa’atasi i ai. Ua alu nei le malaga a Eteuati i Samoa e logo o la matua e tusa ai ma lo la fa’amoemoe, ae maise ai, o le fa’aiuga ua la faia ma Loimata, o le a nonofo i Tutuila e faigaluega ai ma fesoasoani i lo latou aiga i Samoa.

O se fa’aiuga na lagona ai le le fiafia o Tagiilima, ae maise ai o le fa’aiuga lea ua nonofo lava Loimata ma Eteuati ma fai, ae le se i talanoa muamua atu i a la’ua. O mea uma na alu atu ma Eteuati mai Tutuila, ua le fia pupula ane i ai le lo’omatua. Na i’u lava ina o’o le lima o Tagiilima i lana tama o Eteuati, ua le lava e le lo’omatua tatali lona le malie. Ua na o le nofo o le toeaina o Lameko e le tautala ae ua liliu ane nei Tagiilima ma lona ita i lana tama.

 “Eteuati, o le a la le mea na e toe sau ai nei, afai ua oulua malilie ma Loimataoapaula o le a oulua nonofo i Tutuila, fai le mea ua oulua loto i ai. Ua tausi tausi oulua ua lua maua le ola ma le atamai, a lea ua fai ai lava o oulua loto. Ia o e fai tou loto, o a’u fo’i, ou te fai atu Eteuati, ou te le toe fia va’ai i se isi o oulua, fai la’u tala lea i a Loimataoapaula, o a fo’i galuega lea e fai mai ua maua i Tutuila, ou te le fia ‘ai atu i ai, ae o e fai lua loto, ua sa fo’i se isi o oulua ona toe o’o mai i le aiga lenei.”

Ua tau to le sela o le lo’omatua, ina ua uma ona o’o lona lima i a Eteuati. Ua na o le punou o Eteuati ma ona loimata i lea taimi.

E faia pea