“Pau lo’u mana’o ia matou mafuta pea ma la’u fanau"

O le fa’aiuga ua faia e le tama’ita’i o Loimataoapaula, o se fa’aiuga ua ia iloa ua silisili ona faigata mo ia ae maise o ona matua. O se fa’aiuga sa momoli talosaga pea i ai, ina ia fa’ailoa mai se tali pe tatau ona fai pe leai.

O se fa’aiuga, ua mautinoa e le tama’ita’i, ua talafeagai ma ana fuafuaga, fa’atasi ma ona fa’amoemoega mo se fale mo ona matua ae maise o le ato ta’ita’i a lona tina. Na lagona e Lameko ma Tagiilima le tiga ina ua maua le telefoni mai Tutuila, ua faigaluega Loimataoapaula.

O le vaiaso lava na taunu’u ai le malaga a Loimata ma Eteuati i Tutuila, o le vaiaso fo’i lea na talosaga ai Loimata i le tama o Mikaele mo sana galuega.

E le i iloa e Lameko ma Tagiilima le fuafuaga na faia e Loimata a’o le i tu’ua lona aiga i Samoa. O fa’ailoga ma tusi pasi na maua e Loimata mai le Kolisi, o lea ua alu ma ia i Tutuila. E tasi lava le mana’o sa i ai i le tama’ita’i, ia mafai ona alu ‘ese mai i lona aiga, ma ua na o le pau lea o le fesoasoani ia te ia, ina ia taunu’u ai ana fuafuaga e pei ona i ai nei.

 O le sikolasipi na ia maua, ua fa’apea lona manatu, o le a ea le aoga, a’o lea o lo’o i ai mea o lo’o manana’o i ai ona matua, ae maise o si ona tina, o lona uiga pe o le a le finagalo o le Atua i lona tina, e le maua lava sana ato ta’ita’i, ae a faigaluega, o le a maua se ato ta’ita’i lelei mo lona tina. O ona mo’omo’oga ia na fa’amautu i ai lana fa’aiuga, e sili pe a nofo e faigaluega i Tutuila.

Ina ua logo e Minalosa ma Mikaele ia matua o Loimata i Samoa, e le i uma atu tala a Minalosa ae tapuni mai e Tagiilima le telefoni. Ua ‘ese fa’alogona o le lo’omatua i lea taimi. Ua va’aia e Lameko suiga ua o’o i ai Tagiilima, talu ona alu’ese mai Loimataoapaula, e le gata i lea, ae o suiga ua fa’aopoopo mai nei ina ua maua le tala o Loimata ua faigaluega i Tutuila.

Na i’u lava ina vala’au Loimata e fia talanoa i lona tina ma fa’ailoa ai fuafuaga ua ia faia. Na pau le upu na tautala mai ai Tagiilima i lana tama, “Loimataoapaula, ou te le mana’o i ni tupe, ou te le mana’o i ni fale fogafalelua, pau lava lo’u mana’o  o lo’u  fia va’ai atu ia te oe, fo’i mai i le aiga, o lea ou te fa’atalitali atu.”

Ua tapuni le telefoni, ina ua tau le lagona le leo o Tagiilima i lona tagi mai i le telefoni. E ui ina tiga i a Loimata le mana’oga o lona tina, ae sa ia taumafai pea, ina ia taunu’u lona fa’amoemoe. Na toe manatu le teine e fa’apea, afai o le a le maua se falefoga falelua a ona matua, ae tau lava o se ‘ato ta’ita’i mo si ona tina, ona o lona mana’oga lea o lo’o teu pea i lona loto. O le isi itu na mana’o ai, ia maua se ‘ato ta’ita’i a lona tina, i lona lava malosi ma sana taumafaiga, ae le mana’o e maua mai i se isi tagata. O le ala lea, na ausulusulu ai mo sana galuega a’o i Tutuila.