Ads by Google Ads by Google

Alofa: Fa'avae ai Aiga— Vaega 133

“Se Tina, se soia ia, va’ai oe, milimili fa’alelei le ulu o Tama amata mai lava i ona mati’uti’u vae e o’o i lona ulu, ona totogi ai lea e Tama lou pasese e te sau ai, se’i e va’ai i le matalasi ma le lalelei o le Motu o Fiafiaga, Tutuila ma Manu’a, Amerika Samoa, o le Teritori o le Malo Tele o Meleke, e a le ga.”

Ua toe alu le ata a Eteuati ma tilotilo mai i a Loimata. “Ia tina, onosa’i mai i ina, e le toe o’o le salu i lo’u papatua, ona o lea ua ta va i le vasa, ae a fai sou loto, ia ona e a’au mai lea, a leai fo’i, ia 'ave se pa fa’i e te alo alo mai ai, e pei o le mea na e masani ai i lou aiga i tua.”

 Ua na o le ‘ata o Minalosa i lea tiami. “Eteuati e 'ese a au tala e fai i le lo’omatua.” Ua liliu nei Eteuati ma tilotilo ane i lona tuafafine pe mana’o e toe fia talanoa i lo la tina. Na luelue ane i ai le ulu o Loimata e leai, ona ua musu e fa’alogo atu o toe tagi mai lona tina i luga o le telefoni.

“Tina, ia ua lelei, ae ‘aua e te popole mai, o lea ua taunu’u manuia mai la matou malaga, alofa atu i a Tama ma Lolesio ma Emani, fai ia Lolesio ma Emani o le tele ia o tama’ita’i lea o lo ’o tau su’e ni ama i le Motu o Fiafiaga, aua o le na fo’i e tau su’e ni o la’ua ama, ua toe titi fuli i le lua e le toe maua.”

Na toe alu nei le tali e a Minalosa ma lona to’alua, ae ua saofa’i ifo nei Loimata i luga o le nofoa. Na matau uma e le teine tulaga o lo ’o i ai le aiga o lona tausoga o Minalosa, i lana va’ai i lea taimi, ua mautu mea uma o lo ’o i totonu o le fale. Na iloa ai fo’i e Loimataoapaula, e moni lava fa’amatalaga a lona tausoga e mafua lava ona le maua e le tagata se mea lelei, o ia lava, pe afai na te le iloa fuafua lelei ma fa’asoasoa mea na te maua.

Ua tu’u i lalo le telefoni a Eteuati, “O le lo’omatua lenei se, va’ai fo’i la oulua Minalosa ma Mikaele, na o Loimataoapaula lava lea e popole mai i ai, ae o le a fa’afefea a’u ia, ia ua lelei, alu ai pea i lau fika le na Tina, e te fa’igaelo mai lava i a te a’u, ae a leai loa sa’u siaki e tu’u i lona lima ua pei e gali e ni pi, aua e fai mai lava ia o kupe, kupe, kupe, ua na o kupe lava le olaga.”

Na tilotilo ane nei Loimata i lona tuagane ma ‘ata, “Eteuati, va’ai oe ua sao au tala i a Tina aua ua e mamao mai, ae o oe e le mafai ona e talia se 'upu a Tina aua e te iloa lava le tulaga e o’o i ai oe.” Ua alu le talie a Minalosa ma lona to’alua ma tilotilo ane i a Eteuati.

“Ia e a, o le taimi fo’i lenei o le a o teine e su’e tama.” Ua le toe ‘ata nei Minalosa ae ua liliu mai i a Eteuati. “Eteuati, o le a lau tala, fa’alogo lelei mai oe le tuagane, e sa sa lava ona ou fa’alogo atu i lau tala le na o toe fai mai. Ua uma ona fai la matou tala ma Tagiilima e uiga ia te oe, soia e te faia na uiga e le lelei. Va’ai oe i isi tama, ua maua a latou fanau, ua fai o latou aiga, o isi ua na ona fia teine ae le o ni teine moni.” Ua tau mafaufau nei Eteuati i sana tala e fai atu i a Minalosa.

“Se Mina, o outou ma tou mafaufauga na mai tua, ua malamalama Samoa ua le toe pogisa. O le faitalia lava o le tagata ma lana filifiliga, pe fia tama pe fia teine, ia pe fia mala fo’i. Se o tou manatu na o lo ’o pogisa pea, va’ai atu i le matagofie o le afiafi. O mea ia na faia e le Atua e olioli ma fiafia ai tatou uma, fiafia la’ia ma usu mai le pese malie a le fa’ili.” Ua le iloa e Minalosa pe ita pe ‘ata i lea taimi, ua iloa lelei lava, uiga fa’a’afa’afa o Eteuati.

“Eteuati, soia ia…..” E le i uma mai le tala a Loimata ae fa’asalavei ane e lona tuagane. “Loimataoapaula, ua uma ona ou fai atu ia te oe le mea e fai, o lea ua ta tulau’ele’ele i le Motu o Fiafiaga, fiafia la’ia, ‘aua e te toe fa’anoanoa. O le isi itu Sis, ‘aua ne i e toe fa’aigoaina a’u i a Eteuati, o lo’u igoa o Cindy Rose.” Ua ‘ata Mikaele ma fesili ane i a Eteuati, “O, ta’i manaia lou igoa palagi, a’o ai la lou fa’ai’u?” Na nofo nei Eteuati ua tau mafaufau po ’o ai se igoa palagi o ona ia manatua e ta’u atu i a Mikaele e fai ma ona fa’ai’u. “O Cindy Rose Clinton.”